2018年7月9日 星期一

Karen生日會2018@8餐廳

星期二....過得很好的上班日...放工去左跑跑....跑左3.55km....星期三...放左工同左美國回來既表姐們同埋以前幫我地補習既姐姐在花道飯聚...唔知點解我耳背同耳下啲神經(定淋巴?我分唔清)....扯住扯住痛..搞緊乜?...星期四...放左工去左同diana慶生!去左食喜粵8號...還好...我媽煲左乜乜腮清熱氣湯俾我飲...好左d!.....星期五....放左工去左食灃收火鍋..慶祝我唯四既大學同學露仙牛一!拿...我都話我呢個禮拜好忙囉XXD....星期六.....朝早起左身屁屁痕拆利是~....中午去左食sip sop soup~唔錯~下午在家打打blog~好耐無打過blog..無咩存貨XXD......跟住毛寶幫我剪頭毛~夜晚又痴毛寶家的住家飯~見到菓子軒~飯後又打overcooked~星期日....中午食左Terra(係呀又食呀)...之後番左屋企執野....執左成14袋大黑膠袋垃圾...但對我家仍然絲毫無損...好利害!!夜晚食左酸辣粉~.....星期一...又悶又多野做....blue monday經常出現~我媽上星期有煲哥d清熱氣湯我飲...飲左有好d...但都仲係有痛...一郁就痛....耳下到鎖骨位成條頸痛....再係咁我要去睇醫生喇.....



一個旅行blog完結~又用個食記間一間場先~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



今日呢間餐廳...我好耐好耐之前同屋企人去食過.....覺得一般....隔左好耐......我上年生日Diana請我再去試~又覺得唔錯喎~咁一年內.....我又唔經唔覺食左3次~所以又想寫下~但係前兩次d相都係舊電話....所以淨係講最近食既第3次!



呢間餐廳叫"8"餐廳....位於新葡京酒店2樓....訂座電話:8803 7788.....係位於新葡京入面既中餐廳~今次黎食我地係為我唯四既其中一個大學同學Karen慶生~




經過一條地下有金魚投影既長走廊~就會見到餐廳座位~佢環境都裝修得幾靚~呀~唔記得講....呢間中餐係有米芝蓮3星~




雖然有米芝蓮3星....食頭兩次我覺得佢服務唔算太好.....有禮貌係有禮貌....但係就覺得佢不停咁催你點餐同食野進度.......第三次服務係最好的~而且以我食過澳門既米芝蓮餐廳黎講.....呢間規矩係最多的~其一係唔準影餐牌....但網上有得任睇~(可能唔想俾人抄佢設計卦...但我覺得除左封面之外同舊葡京既日麗差不多~)




餐廳招待的餐前小食~係幾有氣勢既~有羊肚菌同埋鮑魚~佢會建議你叫一個$4X既佢地自製既XO醬一齊配呢個前菜~但我食3次都無叫...因為其實已經好夠味~而且其實都幾好味~




老陳醋海蜇頭 $90.....去3次都有叫呢個前菜~勁好味~其實去邊度食我都好鐘意叫呢個前菜~




椒鹽龍脷仔 $90....又係去3次都有叫~因為佢炸得好夠脆~椒鹽又好味~




玫瑰蜜汁叉燒 $160......是挺不錯的味道....以瘦叉黎講呢度算係幾好味~有咬口唔怕鞋...好過麗軒那個~但我鐘意半肥瘦~所以很想念玥龍軒那個~





火焰醉翁蝦 $320(敬請預訂...未必有).....前兩次黎食還是$280....$280係真係幾抵食既!酒店喎~米芝蓮3星喎~加到$320還是我可以接受的範圍!先用酒灌醉d蝦~




之後起火~






繼而爆炒~






影呢味餸都有唔同規矩!仲要次次不同~第一次我問佢影唔影得...佢仲我講唔可以影到爆炒個侍應樣....第二次就同我講唔可以影....第三次就同我講淨係唔準影短片~所以最好影之前問問可唔可以影穩陣d...廢事俾佢話你話到面矇矇~佢都爆炒得好認真架炒超耐而且d火超爆到超高~~~~~~~







而且上碟排得超靚~我鐘意~




我超鐘意食...因為佢整得好好味~又夠入味~佢個豉油都好正~不過點唔點豉油都一樣好吃~出色!





菊花魚圓(每位) $150....一個字講哂:就是賣刀功!.....菊花狀的係豆腐整架!!勁!!!!!!!!!!!個湯又唔算話好好飲....濃濃的雞湯~但係係幾靚~





本身想每人叫隻蟹鉗咬下...點知佢話賣哂~真係記得下次訂位要訂蝦之外仲要訂埋蟹鉗~算啦~唯有叫隻雞咬下~濃湯浸蝦乾雞(一隻) $360....但我覺得一般~雞也不夠滑~以為雞會有蝦乾味~但又無~不推~(早知試芝麻鹽焗雞或者豉香陳皮雞~)




米皇腿片浸時蔬 $140.....下面哥d好似粥既質地....重米香~我覺得清清地的話不錯~之前食過啫啫芥蘭也做得不錯~




桂瑤魚翅炒米粉 $220....查實我幾鐘意食炒桂花翅的....所以一見到呢個炒米粉就覺得好特別~即叫~




毛寶話覺得佢太乾~但我就係欣賞佢炒我夠乾身!!我覺得好味~





然後戲玉就係我地係度預訂左個火焰紅豆椰子蛋糕(兩位用) $120.....預訂時話佢知係生日蛋糕佢就會幫你寫生日牌~而且最特別係咩呀??蠟燭唔係插上去的~是直接在蛋糕表面生火~~~~~(之前我生日...Diana約我黎呢度食..我黎先既...個侍應竟然問我:x小姐~你預訂左個生日甜品呀係咪?....我:我唔知呀~我唔係x小姐.......然後坐低之後又有另一個侍應問我係咪預訂左個生日蛋糕?........其實你可否confirm我係訂位既x小姐先問我有無訂蛋糕?....生日的人都無驚喜了!)




祝靚靚生日快樂~~~~身體健康~~~~~~





d大學同學真係靚喇~~呢度影相環境都幾靚既~個蛋糕幾好~唔怕甜~但似雪糕多過似蛋糕~同埋4個人食會好d~兩個人真係食唔哂~





最後仲有餐廳送既餐後小點~蛋撻同奶茶~




個蛋撻偏甜~但幾酥脆~都可以一試~而且佢地有3種唔同既粉可以灑上蛋撻同吃~我加左朱古力味~另外兩隻味好像是雲呢拿同肉桂~(但我對我記性存疑)




杯奶茶又係甜到盲公陳開眼系列!!!!!係勁甜勁甜!!!!!!我次次用脷lam一下就算~(望到來張相都打左個冷震~)




呢餐食左$1,903...人均消費係$475.8.....我覺得...以呢個質素...呢個環境...米芝蓮3星晚餐黎慶生.....係值既~如果想好好睇睇咁同家人朋友慶生...呢度係一個不錯既選擇~(第三次服務我終於感受到係好既同埋無催我~)








哈哈~
數數今年d利是~
有140封~
多謝各位~
數埋有$6160~
夠我做好多野~
好開心~
岩啦~我遲下有用~
一次過將呢幾年既利是錢一炮過用哂佢!



2018/07/09的開心事:
今日毛寶個姐姐整左節瓜鮑魚蟹柳粟米蛋花飯~~~
中午食真係一個小確幸~~~~~



報時:距離與毛寶慶生泰國食揼嘆之旅2018仲有---80日~
報時:距離天團蘇格蘭高地之旅2018仲有---96日~
下!!!!淨番3個月度就要去修格蘭喇!!!
我好緊張呀!!!!
仲有一個旅行未買機票呀點算好呀?
泰國仍然無進展....擔心~

20 則留言:

  1. $500有米芝蓮3星食係好抵啦!! 仲要有咁既環境, 正! 80日左右係咪9月尾? 如果係, 我都會係泰國啊.

    回覆刪除
    回覆
    1. 都算係抵食架~所以我一年內都食左3次~
      係呀係呀~~~~咁岩既~~~

      刪除
  2. 新葡京內居然有間咁好嘅餐廳?新葡京污煙瘴氣勁少入去......

    回覆刪除
  3. 回覆
    1. 我都覺得係~第一次見哥時覺得好特別~

      刪除
  4. 祝妳朋友生日快樂!
    哩餐飯啲傳统粵菜好正,又唔喺貴喎,
    中菜甜點喺葡撻、奶茶幾特別,
    妳啲利是真喺多多,好多人祝福妳,都喺妳乖巧呀,
    大個囡喇...要還架,嘻嘻!

    回覆刪除
    回覆
    1. 多謝~
      係呀!酒店喎!仲要有米芝蓮喎!
      哈哈~可惜奶茶甜到震~
      野~好衰架~不過我好多謝大家俾祝福我~
      有排都未使還~~~~~~~好開心~~

      刪除
  5. 耳后痛多數係熱氣,不過都痛幾日同已經喝啲消熱湯水都還痛,都係看醫生好啲。
    Happy Birthday to Karen !!

    回覆刪除
    回覆
    1. 我媽媽有煲哥個魔鬼魚腮煲湯俾我飲呢幾日有好左d~但仲有少少痛~
      代佢多謝你~

      刪除
  6. 勁正的生日餐...生日快樂
    ═╔╗══════╔╗💕
    ╔╝╠═╦╦╗═╔╝╠═╦╦╗💛
    ║╬║╬║║║═║╬║╬║║║∧∧
    ╚═╩╩╬╗║═╚═╩╩╬╗║・ω・)
    ════╚═╝═════╚═╝⊂ノ
    █░▐█ ▄▀▄ █▀▄ █▀▄ ▀▄─▄▀
    ████ █▀█ █─█ █─█ ──█
    █░▐█ ▀─▀ █▀─ █▀─ ──▀💞
    💘💙💖💜💚💗💝💟*¨*💌
    🌈好友⛅早晨🌞午安好🎈週二
    ❦開心萬事得╠╣aΡpy向幸福前進

    回覆刪除
  7. 表演玩火,好大火下喎~~
    14袋垃圾,好勁呀)))(偷笑)

    回覆刪除
    回覆
    1. 勁大火~~~幾驚佢燒到自己~~~~
      今個禮拜繼續~

      刪除
  8. 唔難分,只有神經識痛...不過你係間唔中痛定係日日都痛?
    著火蛋糕第一次見~~有冇酒精味?

    回覆刪除
    回覆
    1. 日日痛呀....我估係太熱氣...因為媽媽煲左d清熱氣湯俾我飲完第二日好番好多!
      無架無架~無酒精味架~係喎...咁佢憑咩起火?

      刪除
  9. 食記間場?你唔係好多遊記未寫咩?
    火🔥燒蝦?好特別喎!

    回覆刪除
    回覆
    1. 邊有呀~得兩個之嘛...你估我係某~人~咩~~~~~(邊個呢可)
      呢個真係幾好食~

      刪除
  10. 碟蝦好正,睇見都想食.祝KAREN生日快樂!

    回覆刪除
    回覆
    1. 多謝~代佢多謝你~
      d花雕好入味~好好味~

      刪除