日本四國自駕遊之旅2017-10-20第七天Part 2(雨天及後轉晴)

星期五....繼續病假中休養...咳咳咳....夜晚出左去食...去左園林..但去到已經無哂我想食既豬扒....所以咪去篤左少少魚蛋安慰番自己囉...夜晚又有少少頭痛....但無啦啦見到Mr.開fb live...唱番幾首舊歌..d回憶又番哂黎....星期六..頭痛痛醒.....又再聽一系列既Mr.舊歌...流左幾滴馬尿(但我係房流馬尿哥時我聽係我媽係廳度聽緊Supper)...中午食左八分目..買杯筋勞飲飲...因為有Promo 2點後買有多5粒星星~去左拜老豆~下午都在做文人看書(我睇銀仔同港女本橫渡非洲呀..好看!)...毛寶幫忙剪頭毛...夜晚叫外賣關東煮.....星期日...中午買左Bless...下午至夜晚都在忙....星期一.....我懷疑我吸入太多拜山時哥d燒香既煙...我既氣管有d敏感......本身食左藥已經好番好多....呢日咳到我痴哂線......然後又再度頭痛...咩玩法?咳一下個頭又痛一下.....搞到我好想咳又好驚咳.....講野又講唔得大聲....今日坐counter都盡量超細聲講野.......快d好好唔好?



2017-10-20
Day 7---Part 2(德島縣,德島市 Tokushima-ken,Tokushima shi->鳴門市 Naruto shi->兵庫縣,神戶市 Hyōgo ken,Kōbe shi)
由停車場行過黎都有好一段路~終於行到黎渦の道入口~





先購票~成人510円=35.4hkd~





如果大家有興趣既可以去坐船仔近睇下漩渦~我地就選擇睇鳴門大橋附設既渦の道步道....高空咁望落去~




購票仲附送明信片~~入面仲要有隻紙鶴~~





好咯~進入渦の道喇~呢個渦の道其實就係鳴門橋底下~~所以點解搵唔到呢度個mapcode呢...點解哥時搵錯呢....因為.....就係搵到橋面個mapcode......哥時gps顯到左....但我地仲係條橋度行緊~~~~呆左~~~





wow~好刺激呀~




行呢條路都會聽到d車行過既聲~~好有氣勢~~






行到咁上下就好似見到兩邊既海水係度撞下撞下~




搵到個位企係度睇下~見到個海兩邊既海水兩邊互撞.....我懷疑就係咁撞下撞下撞出漩渦~(不靠譜的描述)





但個人認為佢又唔算撞下撞下撞得成一個漩渦喎.....呢個算唔算?!我真係望左好耐都唔覺....





行去另一邊睇...但係仲多遮擋物...好難睇~~




想唔想知點解會有漩渦呢~好啦~俾d資料你地睇啦~唔好睇我亂up喇~




再努力捕捉.....呢個又算唔算係?





你除左可以係橋上面睇之外...仲可以坐船仔架!我阿媽話佢坐過!我睇人地d相覺得應該坐船仔可能睇個漩渦會似d...我依家咁樣高空望又唔覺得佢好漩喎....







呢隻觀光船成隻海賊王咁~~~




我覺得呢幾張都算係幾明顯架喇~~~放過我啦~~~~~哈哈~~我媽話上次黎個漩渦係勁明顯的....車...蝦我既








去完一轉鳴門漩渦.....你會發現自己手提會多左好多一式一樣既相................




好喇~走喇~行番出黎哥時睇到現場擺係度既相...唔係喎~睇下人地個漩幾咁漩!!!





原來意大利同埋美國都有架!!




行番停車場哥時見到可愛花花~





係喎...今朝食完starbucks都無食過野喇喎~停車場隔離有個小餐廳~好啦~就揀你啦~




選擇唔多呀~毛寶同我媽媽每人一碗竹輪烏冬.......我就食炒麵...各500円=34.8hkd~....我就忍唔住叫埋炸雞~400円=27.8hkd......價格算平~味道就不過不失啦~但我鐘意佢d野夠哂熱~




好!起程去今晚既酒店喇~回程路上突然又藍天~






去程時見到既摩天輪呀~~~(記得當時路上勁黑嗎?今日終於到到真身~)




由德島縣既鳴門市經淡路島再到兵庫縣神戶市~呀~差唔多到喇~






淨係呢程跨兩縣既既高速公路費用已經差唔多200hkd~




介紹番先~我地呢個旅程有好多程算長程既車~毛寶一覺眼訓都係食呢個救命稻草提神的~呢個乾乾硬更既昆布...其實個味幾好食~而且幾有咬口~推薦長途車司機服用~雖然係7仔牌...但唔係間間7仔都有呢隻!




經過一小時40分鐘既車程...我地就由鳴門市去到神戶既大倉酒店~地址：兵庫縣神戶市中央區波止場町2-1....Mapcode：12 337 654*48.....有收費停車場...1,000円=69.5hkd泊一晚~我第一次住大倉咋~好和式既大堂裝修~




攞左房...華~都幾大喎~每晚1,521.3hkd...每人每晚507.1hkd....挺不錯~(可能同噚晚間房反差太大~呢度新d光猛d冷氣又涼d~噚晚.....er.......)





我地間房係對住高速公路...好彩又唔怕好嘈~另一邊唔知係咪對住神戶塔呢?





廁所都算幾大~沖涼係相既左邊~影唔哂~用品都有俾足3套~而且用品都幾足~算係咁~





我地小休息一陣~因為到達酒店時才下午3點幾4點~等毛寶休息一下下~~我就攞番前幾日買既透明檸檬茶試下~~~又唔算好好味既~~但一定好飲過透明奶茶囉~~~




跟住就收到我中學同學send俾我既whatsapp...記唔記得呀~我第一日出發時係機場個lounge撞到哥個同學仔呀...佢話我知...因為佢呢日走...係機場影到10月22日開始航班有可能受影響呀!!!因為又有一個颱風吹緊去日本呀!!(仲要超近四國!!!)...好彩我21日回程!!今次又係出發時有個8號風球係港澳....回程有個勁風去緊日本....




休息夠我地就搵左酒店附近既一個商場逛逛~行過去又唔係遠既..不過我諗都要10分鐘以上路程~所以都係揸車過去啦~華!佢有成11層停車場...然後可以連接另外三個商場...都幾方便喎!




商場地下既餐廳整到成個露天茶座咁~有日光哥時應該幾正~咦!好似見到...出面對住神戶塔呢!!!





雖然依家只係5點幾6點~但都係搵左野食先~費事陣間到食飯時間搵唔位食~穿去另一個叫Mosaic既商場睇下有咩食先~~




佢呢邊有超多間餐廳...食條食街咁~~




我地行左成個圈睇哂d餐廳.....最後揀左呢間!




揀呢間既原因係因為...呢間有神戶牛食!!!出發之前大約半個月度...因為我知我地最後哥晚會停係神戶一晚....所以就好想好想食神戶牛!我上網搵左間非常好評既餐廳...係某酒店入面既....於是我就上網訂位...點知....full哂..................唔開心左一晚~~因為無得試~最後去完旅行番黎........見到有段新聞.....就係呢間餐廳....用其他牛假扮神戶牛呃食客!!!!停埋業.................er...所以有時食唔到...都唔係一件壞事~




裝修普通~未有人入座~




睇黎好多遊客黎~餐牌有備而來~




我同毛寶飲梅酒~480円=33.4hkd....某人因為噚晚飲酒飲到個胃唔舒服嚇到我賴屎所以禁上飲酒~飲薑味飲料啦你~




叫左但馬牛涮涮鍋...5,500円=382.3hkd.....華!好貴!而且唔多!!菜又得哥少少...不過d牛係好味既!(但馬牛經嚴選後先會成為神戶牛~其實但馬牛也不錯~)





好喇~我地仲有叫神戶牛試試~神戶牛里脊肉牛排...11,200円=778.4hkd(150g)......一入口...er....無咩特別...普通牛柳一舊................






仲叫左Kobe Beef Chateaubriand...13,000円=903.5hkd(100g)......華!!!貴到!!!!!上網睇原來Chateaubriand係Tenderloin中央肉質最嫩既位....一隻牛係得兩公斤左右(係咪周老師上次講哥個部位呢?).....但...........我...又..唔..覺..得...好好好好好味喎..........但真係好貴囉...可能我唔識食........你地有無d好好食既神戶牛餐廳介紹我食?佢仲要咁貴....每樣牛都要自己加400円=27.8hkd.....先有個飯set囉(即飯..湯..醬瓜菜)....呢間勁貴.....又唔算好好好好食......我覺得我地第一日係高松d宮崎安樂牛烤肉好味好多....仲平好多添........






食飽行下啦~~竟然有我最愛既Kiddyland~




無咩野睇岩~就係想抽呢個索繩袋~我對索蠅袋無咩抵抗力~(你又點估到我又抽中最醜哥兩個je~)




呢邊有個室外位可以行出去影神戶塔~靚丫~




影完又去另一邊商場行行~




呢邊B1有超市~梗要睇下有無晴王或者其他靚生果買啦~點知...又係無.......點解?四國同岡山咁近點解會一抽晴王都未見過!?!!?!呢盒壽司都要有萬聖節主題~




行多一陣就番酒店~勁攰~唔知點解停車場個自助俾錢機唔俾我地俾錢....然後竟然有個家庭既媽媽來幫忙...佢識講普通話~~~佢話我地知話唔使俾錢~~(但唔知點解唔使俾~)...唔該哂你既翻譯~...商場既戰利品~最鐘意係件綠色褸~(依家一出街就著~)...同埋兩條Kiddyland買既叮噹毛巾~~~




知你地架喇!想睇又唔好意思出聲~我見made in Japan先買架~~~~好抵~~








聽完星期五晚Mr. fb live....
又記起自己曾經很迷四眼男神....(我諗呢度大家都知~)
其實佢地以前d歌真係好好聽...
我最愛哥首係"天下"同埋"未來在宇宙盡頭"
呢兩首相信無咩人聽過...因為係無派過台...
(但我有點意外四眼男神係fb live有好多歌都忘詞)
仲有好多都好鐘意~
"假使" "遇到了" "尋找一千遍" "無謂再假" "那年這天"
"想太多" "感動"....
實在有太多首歌打入過我個心....
至於點解我唔再鐘意佢地....
唔係因為為佢地唔再紅....
其實係有原因.....(原因我唔講..唔係我花心)
還是很多謝Mr.陪我走過一段歲月~
話哂佢係我第一個會去碼頭接船既人...
那次的記憶....還在
係咪好想睇番呢!!!我幫你!!
傳送門~
那時我仲未有皮膚敏感煩惱
那時我胖但面還很尖
那時我還很年輕(其實又唔係真係好年輕)
弊...我又在想當年了
(那是初老症徵狀)



2018/03/26的開心事：
毛寶上來我家吃飯



報時：距離與媽媽慶生台北吃喝之旅2018仲有---3日~
報時：距離和歌山嘆溫泉自駕遊之旅2018仲有---83日~
報時：距離與毛寶慶生泰國食揼嘆之旅2018仲有---186日~
報時：距離天團蘇格蘭高地之旅2018仲有---201日~
其實台北我淨係安排左食野..無安排其他行程
那就隨遇而安吧~看看會遇到什麼~
(其實係我懶~)