日本四國自駕遊之旅2017-10-18第五天Part 1(陰天微雨)

星期二...做到痴哂線.......我唯有自我調適......放左工去跑步...但見雨粉粉...跑兩圈算了~跑左3.61km....開跑時撞到哥哥....經過呢兩日...我知原來我好掛住哥哥!!又唱：我為何讓哥哥走~~一走哥哥永遠再不回頭~~~(睇得明既人就會明....但講明唔係兒女私情..因為我自己翻睇都覺得好嘔心)....跑得哥少少又學人食酸辣粉晚餐!(唔關我事呀..我媽呢日番..佢叫我跑完步幫佢買晚餐...咁..我咪順便買埋俾自己囉~).....星期三...我唔明..點解全世界無假放都可以咁多野做~~~今日仲要ot添...攰...唔飲筋勞完全無力......我知...聽日只會更多野做丫嘛..因為聽日係38婦女節d小孩又放假丫嘛......夜晚又去跑跑...本身跑得唔錯...但因為我又著錯衫.....熱到我就黎爆炸..點知今晚熱過噚晚je!!跑得哥3.58km我就熱到頂唔順要拉筋走人!!星期四...法定筋勞日~番工唔x講喇~~阿媽係日本買番黎d零食好好味呀~~~~~~



2017-10-18
Day 5---Part 1(高知縣,四万十 Kōchi-ken,Shimanto->足摺岬->中土佐町 Nakatosa chō)
早晨~噚晚一早訓~依家又早早食早餐喇~(唔知7點定7點半~)




噚晚食飯睇唔到出面既景~依家日光日白睇好光猛好正丫~出面有好多樹~




入到去已經set好哂早餐等我地啦~~~~~






對比起噚晚哥餐...早餐平實好多~哥pat海苔醬送飯好正~






最正係有隻日本生蛋撈飯食!!!!好好味!!!!





食飽飽入房執好d野~找埋房數就走喇~計埋所有野..房+晚飯酒錢.....3個人57,680円(稅込)=4,008.8hkd...每人1,336.3hkd...比起之前哥晚既蔓橋平~之前哥晚要83,400円(稅込)=5,796.3hkd..每人1,932.1hkd...呢間真係平多~




好~出發~喂...搞咩今日又係陰天!!




我地玩既地方都好似好郊區咁~幾靜~好正~




我地呢日去既第一個景點條路又係不停咁上山!!我知你有d眼訓~(因為我都係~~)




大約58分鐘車程就到左~哈哈~~一到左就有一大堆貓咪出黎迎接~~~




我地黎到足摺岬(あしずりみさき)~佢係四國最南端~~地址：高知縣土佐清水市足摺岬....Mapcode：907 197 381*34




佢好似有好多個點可以行~不過我地無得行哂啦~




救命~~~呢度勁多蜘蛛網~~~~~~~~~~~




行過見到有鬼鬼祟祟係樹窿生出黎既厚菇...睇你幾厚肉幾好味~




原來行行下已經見到燈塔架喇!!咁望出去又幾靚喎~可惜又係陰天~但燈塔係襯陰天架嘛!係咪?!(只準答係)





一路行一路見到有足摺七不思議...但...我唔識日文睇唔出個不思議既點係......?仲無見齊七不...淨係睇到兩個~






應該行左10分鐘都無就行到黎~hi~(途中有好多好多不同的...大大小小的....蜘蛛網及織蜘蛛網的本尊...嚇到本人大呼小叫的~






行番出去觀景台哥邊~




呢個角度影其實都好正~






點少得毛寶幫我影既帥照~~~~條褸真係出色~你估咁多人都著得好睇架隻色?!我係其中一個著得好好睇的人~




頑皮呀你~




佢好似有另一條路去睇燈塔~又行下囉~不過無咩唔同~係行遠左少少睇囉~見有少少雨仔落出~走咯~





好~走喇~毛寶話呢條路好特別..叫我影低~




同足摺岬一分鐘車程就會黎到万次郎足湯...地址：高知縣土佐清水市足摺岬482-1....Mapcode：907 197 480*87.....一到....發現點解對門咁難推既?....望下本書...下?!星期三休息?!?!?!?!?!今日咪星期三囉!!!點解我會留意唔到既!!!!




點解我咁震撼呀?...因為我好想去呀!!!!呢個足湯係俾隻腳仔浸住溫泉然後望住個呢個白石洞門呢個景架!!超靚架!!!重點係咩呀??呢個足湯係免費的.................我呆了...




唯有行落万次郎足湯後面睇下可唔可以睇到白石洞門啦....點知.....我地企哥個高度睇唔到架...要佢開門浸住足湯哥個高度先睇到...睇下毛寶幾無奈~




我地只可以睇到咁啦!好多樹遮住!嗚嗚!!拜拜!(其實足摺岬哥邊有路可以行到落去既..不過我地開頭懶諗住呢度可以浸住腳睇嘆下嘛~點知大頭蝦無睇佢休息日~同埋我地無咁多時間行落去lu~)





算囉~去食中午飯~我地依家去足摺黑潮市場...地址：土佐清水市清水932-5...Mapcode：276 085 797*66...足摺岬燈塔黎到呢度大約15分鐘~




一入去...跟我想像的黑潮市場很不同...因為我可能想錯了和歌山的黑潮市場....我以為有好多海鮮賣既~但好似係土產多~




但都有一角落係餐廳~橫掂到中午時間喇~但吃無妨~





由於我地唔係太肚餓(你知啦係溫泉旅館個早餐太強勢)...所以單點刺身無叫丼食啦~....但番黎上網睇番先知原來呢度最出名既係清水サバ(清水鯖魚).....我地呢度叫既..無一樣係~




由於佢係日文餐牌....我地係亂點的~我地亂指既呢個魚...係熟左既魚....好腥...我覺得....而且d魚皮好恐怖...(我平時係食魚皮的)....1,550円=107.7hkd




又係亂指既魚....1,300円=90.4hkd...由於店員完全唔識英文...但佢極度努力想表達俾我地知.....最後佢都係請教google老師幫我地翻譯(你知老師有時d翻譯都係怪怪的).....但大約明白店員係話呢個刺身佢地已經用野醃左有處理過...請盡量享受佢既原味~係~收到~呢個又整得幾好味~個汁係酸酸地的~




呢個又係唔知咩細魚仔刺身~1,200円=83.4hkd....顏色好靚好鮮味~睇d銀色既魚皮!





呢餐食左4,580円=318.3hkd....淨係食左3樣刺身~哈哈~




咁食飽飽咪順便睇下佢d土產囉~買左少少野~買完臨行出門口見到有兜巨野...上面寫完話掂完會幸福滿滿....此3小女孩紛紛爭相觸摸......有無人知呢兜巨野係咩?




食飽飽再出發去下一個景點!!就係竜串海域公園...地址：土佐清水市龍串.....由於地址太不詳上網自己睇地圖......胡亂搵一個mapcode的：276 134 203*34....由足摺黑潮市場黎到呢度大約19分鐘車程....一路上都見竜串海域公園個路牌...但行行下就唔見到....搵左勁耐..係條公路來來回回咁兜左幾次....上網又無資料...之後又入另一間土產店問人先知.....將車泊係呢個停車場就岩喇!停車場免費的




泊好車諗住問下個竜串案內所既人呢度點玩同埋攞d資料....點知係無開的...............呢個人一落車就追貓玩~呢度又係好多貓..但好多貓貓隻眼盲左..唔知係咪打交搞成咁?




搵東搵西...終於搵到個指示牌喇(鬆口氣..你知啦..帶住阿媽..要搵路壓力真係好大)




好彩沿路都有指示牌~但係條路好似荒廢左十年無人行咁...行過有個鋪位既物體....入面係哂廢物...蜘蛛網同埋蜘蛛...好鬼得人驚......




前面行行下疑似無路喎....成個堤壩係前面!!!




原來係行堤壩隔離條樓梯上去架!!神秘到!!點會有人估到個景點會經堤壩過去!!




仲有路線圖~呢次無假架喇~~~寫住行一周約25分~




一上左條樓梯之後就見到....華!!!好靚呀!!





根據旅遊書所講：竜串海域公園係日本第一個被指定為海底公園海域..被海浪和風砂侵蝕而成的不可思議景觀~...地質野!!我鐘意~




有個女人指揮我呀...話：快d幫我影相!!......唔知要侵蝕幾多年先會變成咁?!但我對呢隻圓坑有點恐懼








行前少少睇...還是直坑紋比較靠譜~但呢度著爬山鞋黎會比較好...因為有d難行....我放心我媽行因為佢前幾日係日本買左對爬山鞋~~~~~~~





睇下直坑!!!幾靚!!!成塊洗衫板咁!!(這是那門子的讚美?)




其實我地想再向前行的~但越入...路越凹凸不平~費事媽媽行得辛苦...就係呢個位回程啦~





再係洗衫板影影裝c照~







華!!呢兩母女有型到丫!!!!!



好喇~要走了~呢個竜串海域公園真係超推薦...因為呢個景點望落幾宏偉~一大片地質任你踩住黎參觀...重點係我地玩左咁耐...一個人都無!!!!!最鐘意d景點係大範圍但一個人都無!!!呢個都係我當初鐘意冰島既原因..但第3次去已經多人到不得了....呢度有少少搵番當初第一次去冰島既感覺~有機會我想係度好好再行一趟一整圈的!











2018/03/08的開心事：
有得睇10點半既周遊東京係我既工作日唯一寄託~
Jarvis係我屋企有專稱架~
我媽叫佢做：周老師~~~~
好鐘意睇Jarvis做呢輯節目..
因為Jarvis食入口既野我都覺得好好食同埋食得佢好幸福!!
個真鯛湯麵我勁想試......親子丼又好想食....
好想跟Jarvis去一次日本呀~
一定好好玩同埋食好多好好味既野~
(今日我同朗公子係counter大叫：周老師好可愛呀!)



報時：距離與媽媽慶生台北吃喝之旅2018仲有---22日~
報時：距離和歌山嘆溫泉自駕遊之旅2018仲有---102日~
報時：距離與毛寶慶生泰國食揼嘆之旅2018仲有---205日~
報時：距離天團蘇格蘭高地之旅2018仲有---220日~