與毛寶慶生快閃台北之旅2017-09-29第二天Part 1(晴天)

星期五...好得意喎...托賴工作量還好!放左工去食八分目!!好耐無食晚餐既八分目~今晚所有餸菜我都未試過~~~有個酸酸地既菇好正~仲有兩款湯試~食完飯之後又去買番我對番工鞋..係..佢又唔生性...又開口問我攞飯食!...今次開到見到我每日著咩色既襪~....星期六..一起身諗住跑步..唔開心呀!落哂雨咁..再訓!...中午約左皮皮同企鵝去食前兩篇寫過既Root..我上網訂哂位..收埋confirmation e-mail...點知我地4個去到餐廳...發現佢根本無開..我再check e-mail...佢係今日凌晨差唔多1點先send e-mail通知我話cancelled左我個booking!!..今朝電話都唔打個..嬲!!!落咁大雨仲要我再去搵另一間餐廳!!!最後去左對面金麗華入面既Naam食泰菜......下午.....訂左本年度第一張機票喇~~~~~yeah~~夜晚叫左外賣食Pizza~(落左成日雨)..之後回家好努力咁寫哭福袋呀!!出完台灣blog就會出佢啦~期待下啦~寫左我個幾鐘架~...星期日...好開心咁訓到12點~~中午食左麥叔叔...之後去左睇玩轉極樂園(Coco).....夜晚食左齋~食紫來坊~~~咁又一個禮拜~星期一...今日放工後....我明白到到....其實我同做保險差唔多......呢度真係好好玩呀~~~~~~~~~~~今日番凍喇~~大家著多d衫呀~~~放工時d風亂吹...d雨又亂打.....希望凍得黎好天啦~



2017-09-29
Day 2---Part 1(台灣,台北 Taiwan,Taipei)
早呀早呀早呀~有人生日呀~生日快樂~~~~~我地間酒店望出去個景~雖然唔係d咩景~但有窗就是心曠神怡~




一起身既節目就係襯去中午食飯地點之前~去完成某d營養目標先~梗係即刻衝左去屈臣氏先啦~~~呢日又做緊唔知咩周年慶呀~某d貨品第二件有半價...又瘋睇一輪~不過我想買既野不在此列~我既目標....就係舊年去台灣買過好好用既3M牙線~~~~~~~~~~佢聲稱挑戰市場最低價!!NT$124=32.8hkd一盒..有150支....即0.2hkd多少少一支....對我黎講都算幾抵~因為真係好好用!!!勁滑!而且不易斷~你試下就知有幾好用~(雖然舊年聖誕節係賣得仲平d..舊年賣NT$109=28.8hkd....但都要買~)....重點係...依家澳門某超市有得買!!但賣79mop!!!!!!!!!!!!勁貴..呢個價係台灣買到兩盒有多~




另外極度推薦呢個十八銅人爽聲潤喉丸~去台灣前一個禮拜有一日我無啦啦感到自己開始要喉痛了!(我幾易喉痛)....朗公子請我食左粒呢個.....食完成個人天朗氣清~隻味幾似八仙果的~澳門代購價50mop....原產地買只需NT$119=31.5hkd....抵好多~~~~即掃~~~(我唔知岩唔岩你食架~我推介左毛寶佢都話ok...同埋上次Sunny bb黎澳門哥時我就係送左呢隻喉糖過佢~唔知佢有無食呢?諗起都怕醜醜~)




以前好少女架...去屈臣氏會狂掃防曬同埋化妝品...依家??睇下我買咩?老了~(但見到呢個購物籃我異常滿足~彷彿得到全世界~)




買完老餅喉糖....彈跳左去買one day con(又係去親台灣最愛買的~).....早上的西門町真的很安靜~




買完con攞哂d野番酒店就出發去食生日大餐喇~~~咁呢~我地係搭的士去既...但我懷疑司機唔係好識路~揸左好耐都未到~~~~由於毛寶睇地圖見仲有唔係好遠路~咁我地就建議落車自己行啦~~點知我地都搵左好一陣子~撞下撞下先搵到~佢躲藏係民生社區入面~遊客應該唔會撞入黎~




我揀左呢間富錦樹台菜香檳作為毛寶生日午餐呢~地址：台北市松山區敦化北路199巷17號1樓...電話：+886-2-8712-8770.....我有做網上訂位的~(官網好似無...我係去佢fb留言訂位的~因為之前睇人地d blog話好多人~)





佢室外有一張長枱的~其實我覺得幾靚~秋天坐係度食應該幾舒服~奈何我地去哥時9月尾係有36度高溫~~~~




佢地裝修都唔錯架~有多多採用日光~我最鐘意呢d餐廳~





我地哥日被安排坐係窗口附近~(但哥日佢好似唔係好夠冷氣~)





同埋實測當日唔算多人入座~我諗計埋我地中午得4枱人~可能熱潮已過~台灣太多新餐廳開~




睇睇餐牌先~~~望望餐牌..望望價錢..望望環境....應該係比較精緻d既台菜~對上一次食台菜係同我阿媽一齊黎哥次~但哥次有d失望~




叫左野食之後~叫得做台菜香檳~點少得叫埋香檳呢~但...佢一杯杯叫的...得一隻...其他都要整瓶叫~兩個人點飲得哂呀......唯有叫可以一杯杯叫哥種囉~(其實我都唔係識飲~)




先上送既小菜~醬瓜~~~~~勁好食~勁開胃~




華~~~要來了~~~我叫左杯Bernard Tornay CARTE D'OR(Brut)...NT$480=127hkd/杯.....一杯杯叫咪幾好~幾彈性呀~呢隻香檳都唔錯喎~因為口味偏甜~




酒蒸蛤蠣...NT$420=111.1hkd.....都幾大碟下喎~有海量既薑絲墊底~而且都酒味都幾入到落隻蛤蠣度~蛤蠣又夠飽滿~不錯吃~




油條蒜蓉鮮蚵...NT$450=119hkd(小).....呢個餸係網路上大推...咁我梗係要試下啦~隻隻蚵仔都勁飽滿~




將鮮蚵夾埋油條一齊食估唔到幾夾~~個汁都好好味~~~同埋我發現呢佢d蒜蓉食完個口唔臭架~~唔信你聞下~~(何~~~~~)....同埋佢d油炸鬼有d汁掂到佢架嘛...擺左好一陣子都仲係咁脆喎~




蒔蘿紅燒牛腩....NT$680=180hkd.....咁過癮既上面有隻溫泉蛋既~個牛腩味幾清...牛味都幾好味..但個牛肉質實在太鞋太硬...可能無咩肥...我唔欣賞呢種肉質~但係佢個湯好清~毛寶將佢飲哂~同埋d蘿蔔勁好味~哈哈~





樹子水蓮...NT$380=100.5hkd....炒得不錯吃~不過我諗菜好難失手啦~




寶島米粉...NT$350=92.6hkd(小)




點解要叫?因為毛寶最鐘意就係食呢種咁幼既米粉~佢呢個炒米粉炒得唔怕油而且配料亦都非常好~仲有d蝦米係入面~我幾鐘意~重點係食呢個米粉佢會送上佢地自家製既辣油~係非!常!夾!......佢地個辣油好好味!有點點泰式味..唔知係咪加左d九層塔係入面呢?勁香~





睇下毛寶幾欣賞...要為佢留倩影呀~




話實在~勁多野食~我地點餐時問侍應妹妹會唔會太多...因為我地唔知d野食有幾大.....佢話唔怕...兩個人都食到...事實上....其實兩個人係會食唔哂架...因為佢d野勁大碟....記得唔好好似我地咁叫四餸一米粉~好喇~飲杯香檳~生日快樂身體健康唷~你要陪我環遊全世界唷~




食左NT$3,311=875.9hkd.....貴唔貴呀?都唔算平呀...係台灣黎講~不過呢度個環境唔錯~米粉同鮮蚵都可口~開心就好了~




跟住又出發~~~(即係又去搵的士搭~~我話明呢次旅行我要做公主我唔行架~)...唉呀你做咩追住個女仔影呀...我知呢個女仔係幾靚~




又黎到松山文創園區~經過呢間書店覺得好有味道~




今次我地唔係黎睇展覽架~襯未到時間又周圍行下~





又行到黎松菸小賣所逛逛~






無咩野岩我~淨係買左3包咖啡俾我娘親同埋Diana試~





又周圍拍拍~








哥套玩轉極樂園...
係以墨西哥亡靈節做主題...
超好睇!!!
點解佢會咁無信心搵Elsa幫佢做暖場既?
淨係佢自己都夠撐場啦!!
散場時喊濕左我兩張紙巾...好醜怪呀!!
睇完後...
點解人地d亡靈節係開心咁慶祝同俾過世既親人番黎團聚..
而我地既鬼節就成個月出街都要小心d咁恐怖既?!
呢套野都有d特別訊息可以帶出架..唔係卡通片咁簡單
唔好忘記自己既屋企人呀!!同埋珍惜依家仲係度既人!!



2018/01/08的開心事：
好開心呀~有公子係工作上取得優異既成績呀~~
我就梗係無啦~~



報時：距離與媽媽慶生台北吃喝之旅2018仲有---80日~
係呀~出緊台北blog又訂左機票去台北喇~
不過今次復活節台北機票好貴!!比平時貴兩倍!!
本身唔係諗住去台北架..諗左某一個地方既..
但講左出黎阿媽好似有d擔心咁..
之後同佢講話去台北佢就鬼咁開心....咁好囉~
請你去台北啦~你開心就好~
好彩係酒店哥度慳得番je~
(都住得好好架~只係我有十晚送一晚優惠~減左兩晚酒店錢~)
wow~我又要搵野食喇~
你地有無咩景點係岩同媽媽去架?101佢又上過咯~