日本大阪自由行之旅2017-12-10第三天Part 2(晴天)

上星期五...呢個星期五既工作好正常呀!咁我梗係知點解先會咁正常啦~當我傻豬咩~放左工去試一間新開既西式素食~都唔錯~叫尚膳蔬食~之後去左探菓子軒~~家陣佢學識左傳波呀!!叻仔!!!...上星期六....我又俾樓上臭小孩嘈醒!!!(落少少詳講!!!!火!!!)....中午食左心醉吧~因為我上次食完有coupon~~但今次食又無上次咁好食喎..又唔掛住喇~下午搵和歌山mapcode~好乖~我搵哂喇~夜晚去左威尼斯人~~~行街~~食北方館~~~睇Bruno Mars演唱會~~~~~~好好睇呀~~~~~火星人好勁呀~~全場觀眾勁high~~~(其實我內心好想聽the lazy song同埋count on me~~可惜無唱~~)...星期日.....中午去左順軒飲茶!下午去左戀愛電影館睇西班牙片死無對證(The Invisible Guest).....勁緊張好好睇!!絕對估唔到既結局!!......夜晚去參加菓子軒一歲生日會~~~咦...我發現我呢日無俾過錢食野...拜菓子軒所賜~~~~星期一.....番一日工~~心情係唔同d既~~~(雖然多野做到痴哂線...)...放左工..由於我娘去左旅行..我去左毛寶度痴餐~~~食飽飽就去UA睇復仇者聯盟3~~今集出多左好多個英雄喎!但又唔怕分得太散好緊湊好好睇~呢幾日我睇左好多表演+戲~~~星期二...勞動節假期....中午去左食羅浮咖啡~唔想去茶餐廳俾人加二加三一定要走入去酒店食啦~下午在家幸福忙~夜晚叫澳覓外賣pizza~星期三....估唔到有個外表正常既人叫我主動去問人係咪低能....好好玩.....放左工去跑跑~跑左3.47km.....哈哈~但跑完食左個酸辣粉~解我上班既無理事件......星期四~朝早明明曬親人.....夜晚放工就個天黑哂同埋落狗屎~好野~~~聽日星期五~~~~~~~~~



2017/12/10
Day 3---Part 2(日本,大阪 Japan,Osaka->京都 Kyoto->枚方市 Hirakata Shi->大阪 Osaka)
食飽飽行飽飽錦市場....我地就坐巴士番去京都駅啦~當時已經有聖誕樹係駅入面喇~~




係京都駅唔係搭JR...今次係要搭近鉄線呀!!(上次去奈良都有搭過近鉄線)




搭近鉄京都線向奈良方向...至丹波橋駅落車~然後行去另一條線~都係丹波橋駅但要行去京阪本線!!呢個真係第一次搭真係要俾個叻俾自己...好彩兩個唔同線都相通架je~好好紀錄一下~






京阪本線d車都幾靚~我地依家係搭京阪本線淀屋橋行...我搭左班特急既....車廂靚到係我以為自己坐錯d指定席車箱...驚緊哥時仲要有個職員鞠躬行入車廂我以為佢查飛...點知只係行過~XD




去到枚方市落車~我地要黎一個新景點~就係枚方T-SITE...地址：大阪府枚方市岡東町12-2....係京阪本線枚方市南出口一出就會見到~~~呢個係關西新地標~文青必來的~除左有蔦屋書店~仲有生活百貨同埋超市~仲有餐廳~一出站就會見到~






一到就急急腳上唔記得3樓定4樓賣書既樓層.....特登黎呢度一睹呢個書牆!!!華~~~好高呀~~~華~~~好靚呀~~~華~~~好文青呀~~~




另一邊書牆仲有埋聖誕佈置~~~





華~~我真係好有型~~




行上一層望~真係幾靚~






癡漢偷睇我睇書呀!!!




有d攰又上住低食少少野~(唔知攰d咩~)...千揀萬揀呢間最岩輕食~




我真係完全頂唔順佢地開暖氣既環境~都係坐室外位好d~我地坐室外位佢仲貼心到俾張被我地吸腳~坐外面幾好丫~境觀唔錯~





完全忘記毛寶叫咩茶飲...我就係上圖哥個...Orange Chamomile.....550円=38.2hkd...一飲...wow~甜到就黎糖尿~





無理由齋飲既~叫少少野咬下~Angel Food Cake Vanilla Caramel....550円=38.2hkd~華!!估唔到喎!!超級軟綿綿呀個蛋糕~~~好少女~~~d cream勁好味!!讚!




再黎一個White Chocolate Cream Waffle...780円=54.2hkd....個waffle林林地既...個waffle唔掂..放咩都唔掂~最正係頭先個蛋糕~




叫做坐下~hea下~我地好少去日本會咁坐係度傾下計~幾舒服~




坐左陣又去行下~由上而下咁行落去~估唔估到呢層係咩??係銀行呀!!!!!!!!!救命!好靚~




跟住有一層係專係小朋友既~有好多好多玩具呀兒童圖書之外~仲有野玩~






有無人會親手整鞋仔俾自己小朋友?我覺得好有愛亦好可愛~




特登影呢盒陀螺...因為想俾大家睇下玻璃樽入面有一個超細粒既小陀螺~~我好想試下玩~




又行過~又影下~夜晚拉開左個簾靚d~




送個全景俾大家睇下~




係靚既~但d書其實攞唔到~~~~但我都見好多日本黎影相~





個架咁高唔知呢個小孩想攞咩禮拜呢?XD..個小孩好細粒~




有層係賣生活離貨的~





地下都有兩層賣書呀~雜誌哥d~都係望下架咋~又唔識睇日文~





有時佢賣某一類型既書會有相應既物品放係隔離賣~例如刺繡書會放埋d線呀~靚剪刀呀係隔離~




其實賣咩書都唔關我事~因為我淨係參觀下書牆架咋~最精神都係行地庫既超市~




睇個名就好有氣勢喇!!!!都幾大個好想試..不過諗起酒店仲有晴王未食哂...放下...就是擁有~




五顏六色既茄仔我係最不能抗拒既!!!好!我入手!(根本把尺就係我度~)





係凍櫃見到...喂...我忍唔住喎!!!!點好呀!!!




如果我坐係呢張枱讀書應該會好分心喎~




呢度除左有樓高兩層既書牆之外.......仲有一幅咖哩牆!!係幾有氣勢既!!








藍色既咖哩....er........我唔係好敢試..(我淨係諗起透明奶茶...)




自從上次去完四國之後我就對鰹魚產生左好感~(好似講緊對個男仔產生好感咁)




寫住過有480種架~唔知有無人去數呢?




呢兩樣都入手!!





然後話不如買少少野濕濕個口咯~佢收銀機後面有好幾張枱俾你坐低食野~唔錯~




買左天然鯛霜降...598円(稅込)=41.6hkd......同埋買左頭先既海膽~1,180円(稅込)=82hkd.....




好味唷~~




食海膽時個味....咁....特別既?因為覺得同平時食既味好唔同...見佢有寫產地.....咁咪問下google老師囉~點知google老師既回應係：智利......真係估你唔到...但哥時係智利食既海膽又唔係咁既味喎!呀...是但啦~過下口癮je~




回程都係搭京阪本線淀屋橋行...去到淀屋橋駅...就轉番地下鐵搭御堂筋線新大阪行去梅田駅番酒店~呢個車廂就係京阪本線快速急行既車廂!!係咪好靚?好似上左銀河鐵道列車咁~




原來毛寶想頭先濕濕完個口個晚餐就算.....我即跌入萬尺漩渦.......下?!今晚無晚餐食??....毛寶應該知我心意...即問：你係咪想食野呀?.....我：係呀~~~~~~~~~~~~~........即衝去Lucua 1100既7F食Bills~~~~~哈哈~我想試好耐~因為之前佢係東京開既時候我知自己根本無本事排...大家都知我唔鐘意排隊架啦~我寧願開店前早d去~知佢大阪開左我心痕痕想試...仲要係我地酒店咁近既Lucua 1100開喎~要食食先~~佢都係開幾早...朝早開08:30-23:00.....呢日我地成夜晚9點黎到...都!仲!要!排!隊!!!!!!!!!!!!!!!我瘋了..我以為避開尖峰時間會唔使排.............




好彩二人枱易等d~等左10分鐘度~餐廳入面其實估唔到佢咁大...不過燈光好昏昏暗係我最憎的~




望一望餐牌....下!??!!?原來夜晚無蛋料理食架?!?!?!我想食all day breakfast喎!!!!輸!!!




好彩我最想食哥個hotcake仲有je~~定d~




叫左杯Hibiscus and Lime同埋Mandarin....完全唔記得邊杯打邊杯~各730円=50.7hkd.......兩杯都唔好飲....我哥杯仲要勁甜(前)...




Snapper ceviche, avocado and blood Orange....1,320円=91.7hkd.....華~有ceviche食~都整得幾好味~但個汁都係偏向東南亞風味~





Wagyu burger, grilled swiss, pickled greem chilli, herb mayo and rocket...2,200円=152.9hkd....由於唔係太肚餓...所以就咁叫左一個和牛漢堡兩份食.....上次係澳門文華東方食過和牛漢堡覺得好好味....正諗緊呢度比唔比得上佢時.....一咬........勁多肉汁!!!!!!超好味~~~~薯條質感不錯~但不喜歡佢配泰式甜酸醬~





查實我入呢間野係為左食你咋!!!你個衰妹!!!Ricotta hotcakes, fresh banana and honeycomb butter....1,500円=104.3hkd......wow~好多塊呀有~




隆重推介呢舊充滿蜜糖既牛油~巧滑~~hotcake熱力約其融化....wow~




呢度唔係食空氣感很重的那種...係實打實作既!但幾有蛋香~我都不錯地欣賞...但不能一人獨吃一份.........




濕下咀仔..食左6,998円=486.4hkd...每人234.2hkd




食飽諗住行出室外抖抖氣..因為餐廳太熱太焗....突然見到.....我終於搵到我搵左好耐既大阪駅內聖誕燈飾!!!!!




即衝落去拍拍!!!唔係好大型既~但睇到都開心~







跟住番去要食下頭先超市買既蕃茄仔~~~真係唔同色唔同味~~~








我樓上有個臭小孩...
但唔係長期係度住..有時係度有時唔係度..
佢係極度嘈..因為佢會狂!!!...係狂!!跑黎跑去
跑完再喪跳....我講哥隻喪跳..
唔係普通跳兩下...係痴左線哥隻狠狠鋤地跳!!!!!
我忍左佢好耐...點解忍佢?
佢無犯法丫嘛...佢有權係自已屋企做任何野丫嘛
我之前有試過忍唔住上過一次去...
因為佢又係周末嘈醒我......
哥日係星期日.....你無權嘈嘈貢喇卦?
原來佢係得閒先係佢阿(女麻)度住下....
我哥次上去我同佢講：我求你保持安靜!!!
唔該你!!我想休息!!我想訓下!!係咪要我跪係度求你?
(我擺明係串個臭小孩屋企人...其實我媽都上過去話佢)
到上星期六......我又終於再忍唔住要上去話佢..
因為佢係喪跳到嚇到我成個彈醒!!!!
我望下電話.....大佬呀....8點半咋!!!!!!
(我想講由我第一次上去到上星期六其實係有不停嘈...只係我唔想搞到咁彊無再上過去)
澳門有法例係每日晚上10時至翌日早上9時...
"不得在住宅樓宇進行任何可產生騷擾噪音的日常生活活動"
咁.....我可以上去xx佢啦下話?
我牙都無擦...頭都無梳...亂過打風衝上去....
個阿(女麻)開門都知咩事...
節錄我同佢既對話...
我：請問你可唔可以叫你個小朋友安靜d唔好跳?
廢老：佢無跳喎!你有無聽錯?
我：佢係我主人房頭頂上跳喎...咁都有聽錯?
廢老：我"覺得"佢無跳囉...佢無入過主人房喎
我：你"覺得"呀?但事實上佢有囉
廢老：佢無跳呀可能係其他住戶發出既噪音!
(其他住戶可以做到係我頭上跳既聲效?你好野!)
我：其實你個小朋友係到達可教育既年紀你可唔可以教下佢?
廢老：我個小朋友得1歲咋!點教?使唔使抱俾你睇?
我：(因為我之前見過佢小朋友)有個1歲..仲有另外一個呢?
廢老：5歲................
我：咁都唔去教?!?!?!?你知唔知你咁樣好嘈住人休息?
廢老：依家又唔係星期日..你理得我做咩?
我：你知唔知澳門有法例監管由晚上10時至早上9時既噪音?係每日適用?知唔知我可以報警?
廢老：咁我都建議你報警囉...
(條廢老勁無賴....講完繼而睇錶)
我：唔使睇喇....仲係8點幾咋
我：你知唔知番工既人得兩日休息?我淨係想朝早訓個好覺...你係合法既時間狂跑喪跳我有無上過黎話你?我都話之你啦!
廢老：你都無湊過小朋友!!!
我：我有無湊過小朋友同你要有公德心有咩關係?
(大佬呀...我迫你個仔生架?你個仔生左小孩我要負責任架?我無湊過小孩所以我無同理心呀?我其實無責任對你個臭孫同你個廢老有同理心架..你有無同理心過我?)
廢老：我住咁多年我都無見過你d咁既鄰居!
我：我都住咁多年都無見過好似你咁既人!!!!
(我大大話話住左係度廿年...我頭10幾年有無上黎見過你?大家相安無事咁多年..點解近幾年先見?因為你個乖孫囉!)
我：有你d咁既家長教小朋友你小朋友大個一定"好出色"
廢老：我都覺!
有無見過有人咁無賴?
我到星期六先知...由相熟看更報料
個乖孫個老豆係著名作曲作詞人喎
作過幾首幾紅下既歌.......
你d歌作得幾好都無用...因為你都唔識教仔!!
你同你作既哥首歌既歌名一樣...唔怪得你作到!!!!
妖!!!!!!!!!!!!!!!!!!!!!!!!!!!!!!!!



2018/05/03的開心事：
今晚我阿娘仲未番~~我去左買cheap壽司自己開餐~
依家已經流緊口水~~~~~



報時：距離和歌山嘆溫泉自駕遊之旅2018仲有---45日~
報時：距離與毛寶慶生泰國食揼嘆之旅2018仲有---148日~
報時：距離天團蘇格蘭高地之旅2018仲有---163日~
我好乖咁5.1勞動節在家幸福忙~
睇左d泰國酒店同spa~
雖然仲係咩都未訂...
但睇完d spa都覺得自己好似已經做左咁舒壓~
(p.s泰國真係好多spa)