新加坡熱辣辣聖誕節之旅2017-12-22第一天Part 1(晴天及後大雨)

星期五...勁多野做...做完最後一個籌...坐係個counter度我覺得有啲暈暈地既感覺...放左工去食千笹..呢日唔錯地好味！再去左探菓子軒..驚覺無見佢兩個禮拜大個左好多！這小子真神奇！...夜晚回家睇左死侍..dead pool真係好低能......星期六..中午約左公子去食齋...好正呀！下午耍廢..夜晚去左食風味居..再去埋睇死侍2！好好笑！星期日....中午去左食Enjoy Deli Cafe~呢個天氣食泰國冬蔭功米最好~食完我真係忍唔住要去買杯凍冰冰既沙北筋勞解解暑...真係好熱....下午又在幸福忙~夜晚食海榮外賣~佢個糯米滋真係好好味~星期一....好多好多野做...好攰.......聽日放假都無去放肆大吃!反而去左跑步...好熱好熱!!!!跑左3.52km....熱到都無心機食野.....星期二...公眾假期~好開心~中午去左食有間咖啡館(間野真係叫有間咖啡館)...嘆左啡~開心哂~下午在家寫blog...我家陣d blog既庫存量好少.........可能隨時停駛~~夜晚食左家和魚蛋！！好味！跟住去左睇世界女排...中國對波蘭..勁緊張...雖然中國最後輸左..但場比賽確係精彩！星期三...好x多野做呀.....好攰.....放工快快上去跑個快步....3.5km~好熱呀....不宜跑太多~星期四.....其實今日一樣咁多野做....不過我靠住星期日可以睇仕燊既信念黎幫我渡過~~~話哂聽日係星期五~~~~放鬆心情啦~~~~星期六仲約左公子們去燒烤!!!!!!!我地7公從未試過燒烤架!!!!!!!好緊張呀~~~~~~



新一個旅遊blog突然出現~



2017-12-22
Day 1---Part 1(澳門 Macau->新加坡 Singapore)
yeah~聖誕節有得放5日假係開心既~咁舊年聖誕節難得大家都放假~就梗係去去旅行啦~~~~d孝順女要帶爸媽去旅行呀~咁順便帶埋我呢個小孩去啦~~~~~~出發前兩日...我打去book電召..點知我遲左兩個鐘起身...book唔到...唯有搵朋友車........



我地今次係搭Tiger Air既...一早買左機票同埋俾埋錢買座位..因為想一齊坐又唔想坐咁後....但去到機場check in時發現...我地本身買左11行既...張登機證寫我地坐第2x行(係成隻機既尾二)....我地問點解...佢解釋係因為依家佢轉左隻細機飛..因為無第11行(第10行之後就到第12行)...所以轉左另一行俾我地...但我地話：我地俾左錢架喎....地勤答：所以咪幫你地安排番一齊坐囉......我：但係我俾錢買前d既行數....依家你求其俾尾二哥行我地一齊坐.....我使咩俾錢買前d既座位?.....然後佢咩都唔幫我地做...無資訊俾我地...就想水我地走....一係對我地既提問發呆...差!!!!!!!!!!!(佢連毛寶都激得嬲係好極都有限).....之後轉另一個外籍員工幫我地...雖然其實都無咩實際幫到我地..但佢好細心解釋因為虎航係澳門無辦事處..如果要追討就要係新加坡哥邊問....我地就係想你就算你幫唔到我地搞...都話我地聽可以後續點搞~多謝呢位人兄~



俾呢個人一出發搞到個氣場好嬲.....我算數係因為我唔想影響自己出遊心情..但你既工作態度真係好有問題.....算喇算喇~呻完~開開心心出發吧~~~今次既團友有我啦~毛寶啦~大比啦~阿sam啦~毛寶爹娘~~~~~毛寶爹娘係第一次去新加坡呢~~我去程時的行李係10kg~喂!我戴左made in japan既眼鏡呀~




好~又入lounge爽爽先~由於呢日係聖誕節第一日假期~所以超多人呢~~人頭湧湧~油炸鬼超~~~難食~




我地係搭Tiger Air既TR903號班機係10:35由澳門直飛到新加坡~~~~呢日係澳門出發時一粒雲都無~曬~




廉航就點呀?無電視睇囉...無電視睇咁點呀?悶囉....我自己帶左超多過期雜誌....解解悶...除左睇雜誌之外....呢隻窗就最解悶喇~飛左無耐見到....咦!!!!奶係咪!!!!錢薜中既趕芝咬大橋話??!?!??!





又填下入境表啦~都幾多野填喎




又影下雲相解悶~今日d雲勁靚~







坐廉航去新加坡真係好悶.....坐左成4個鐘終於都見到陸地喇~~





到喇~好好天咁噃~






降落既時候仲見到周圍有工程!!(後尾聽的士大哥話好似機場又在起新既terminal~)





好野~~14:15就到了~早左25分鐘到~




但唔知係咪因為Tiger Air係廉航...所以呢個Terminal都舊舊的~~




而且過關等左好耐好耐...我諗差唔多有一個鐘..超無效率...因為真係見到佢超慢...救命...行李一早就係輸送帶轉左好多個圈了~~~~~~~~~~~




由於同埋老人家一齊出遊~咁就費事搭地鐵轉黎轉去轉到頭都暈啦~直接搭的士去~





排到我地哥時咁岩係一架貴d既Silver Cab....但我就話我地想搭普通的士~我地6個人分兩架普通的士啦~依家咁得閒講下匯率先~我有成兩年幾無黎新加坡喇~~依家匯率係SGD$1=5.813hkd....咦!又開始多雲番~去新加坡旅行好方便..我都唔使留意天氣預報~~因為基本上每日都可能有雷暴~帶定遮實無衰~遮太陽擋雨都ok~




出市區時已經見到Sands~~摩天輪~~~




酒店我地今次終於唔係住Swissotel Merchant Court...但係揀住係Clarke Quay.....揀左另一間係佢附近既Holiday Inn Express...地址：2 Magazine Road, Singapore 059573....




雖然lobby唔算大~但係就幾舒服同埋新淨喇~睇下~有好大棵聖誕樹~~我地check in時順便叫reception幫我地打去tiger辦事處問問頭先俾錢買座位哥單野....搞左佢超耐!但佢完全無唔耐煩仲要加超好禮貌!我俾個讚你!




一入房~唔錯喎~一晚963hkd~每人481.5hkd~你要知道...新加坡d酒店都貴桑桑的~呢個價有呢種房我都很滿意了~(仲要包早餐...我無食但我望過一般)..不過地點就真係不及Swissotel Merchant Court既!因為係holiday inn express行去最近Clarke Quay MRT站都要5分鐘....






仲學人有Wifi攞出街用喎~不過唔知係咪我地哥部壞壞地呢?差極都差唔滿電...同埋攞出街唔係好用到





唔理啦~~帶d老人家去濕濕個口先啦~~~中午飯都未食~~~我地帶左佢地去試試亞坤(Ya Kun Kaya Toast)先~~~(其實依家澳門都有..但我唔係好敢好試...因為怕佢整得無新加坡咁好味會覺得浪費胃口)...我地揀左係Swissotel Merchant Court對面間商場入而既分店(Clarke Quay Central)....地址：6 Eu Tong Sen Street, #01-31, Clarke Quay Central, Singapore 059817




次次食都好似係叫餐既~




我叫左個set A同毛寶分享分享~SGD$4.8=27.9hkd....個set有杯咖啡或茶....我幾鐘意佢地隻細細杯加上平時食麵既湯匙黎飲啡..幾有特色~有個咖央多士~仲有兩隻半生熟蛋~~




主角咖央多士仲係咁好味~佢個啡啡包真係好好味~加埋牛油與咖央醬既融合~重點我鐘意佢唔怕太甜~




個半生熟蛋加d豉油胡椒就咁搞爛佢食又得~用多士點蛋漿黎食又得~得左~!





由於我唔想黎到第一日就訓唔著我無飲到杯奶茶~我仲單點左個凍腐竹薏米...SGD$2.8=16.3hkd(Reg)....佢地個腐竹薏米真係好正!!!好足料~好好味~~~重點係我諗唔起我當時點叫呢杯野...因為個英文原來係叫Silkyz Barley....就算係普通話我都唔見得我會講到...到底我當時點會咁醒目叫到呢?









我星期六買左支香檳...
係真係香檳呀!!唔係汽酒呀!
買左支Moet諗住星期六去珠海送俾Supper..
諗住賀佢地上到紅館..
保佑我企到第一排同埋我會送到啦~
(我係咪好痴線~)
如果無仕燊呢場show...我呢個禮拜根本捱唔到!



去睇死侍2之前我就係前一晚睇左死侍1...
我真係覺得死侍好好笑....尤其佢生番出黎隻手...
我笑到失控.......
比起其他marvel既super heros...
我依家更愛Deadpool~~<3
(對...超過了iron man....但超過唔到Robert Downey Jr.~也沒有超越Mark Ruffalo)



2018/05/24的開心事：
星期六....同公子燒烤~~~~~~
吃吃吃!!!!!!
星期日....去見仕燊~~~~~~~~
無見好耐喇~~~~~~~~~
快d集氣我企到第一排啦~~~



報時：距離和歌山嘆溫泉自駕遊之旅2018仲有---24日~
報時：距離與毛寶慶生泰國食揼嘆之旅2018仲有---126日~
報時：距離天團蘇格蘭高地之旅2018仲有---142日~
華!!!!!得番24日咋!!!
好開心呀!!!終於有旅行去喇~~~~~~~~~
好辛苦呀番工~~~~~~~