日本大阪自由行之旅2017-12-11第四天Part 2(晴天及有陣雨)

星期二...番工遇到兩個自以為自己好岩既人...鐘意你就繼續自以為是啦下~放左工去跑跑~跑左3.52km.....跑得好少....因為我好驚呀!!!好多飛蟻~~~~又多蚊咬我!!(我已經噴左蚊怕水...多蚊到恐怖!!!!!!)....星期三...er..唔..呀......番工都係咁啦~無麻煩客算係好彩喇~估唔到仲俾人嫌我地做野慢~其實我地永遠都係睇到人地既缺點...就算你再有優點...別人也懶得去發掘~我無去跑步呀~因為個場呢日噴滅蚊水~梗係唔去聞啦~星期四....我好x攰呀....呢日好x醃悶......d客好麻煩.......呢度真係好好玩~我好想快d到明天6點半呢個時刻...............



2017/12/11
Day 4---Part 2(日本,大阪 Japan,Osaka)
好啦~我夠鐘去玩禁忌之旅喇~幾時睇霍格華茲都係咁靚既~






好彩~要等90分鐘~如果唔係我買個express黎做咩~





先搵個locker放好自己的東東~全部袋都要入哂locker架~




講左十世都仲未排隊去參觀城堡~今次都係無~










有express真好~5分鐘都唔使就玩到~我同毛寶都覺得!!佢入面有d場景唔同左呀!!!!!!好似話之後都會轉場景!!!好想去~~~~




行紀念品店...竟然無咩野毒到我~




玩完出黎已經日落中喇~




又排隊入奧利凡德魔杖店...雖然上次入過~但係上次我係哥個被選中的人嘛~我掛住置身其中都無好好睇個表演~係咪好想重溫我做被選中的人呢~~請按我~~





上次我已經俾人揀中一次~今次唔同d後生爭囉~讓d位出黎俾後輩體驗下~睇下個小朋友幾開心~~






睇完出黎差唔多入黑喇~~~~最期待既野出現喇~~因為我次次入哈波園區都係日光日白入既~~今次難得臨近聖誕黎梗係要留到夜晚啦~(呢個就係我地遲d入園區既原因..因為唔想一早入等太耐先入黑~~好彩冬天早日落~)......霍格華茲都著燈喇~




企係前排霸個靚位等一陣...就有表演睇喇~~(勁凍)....有各個學院既同學仔講左一輪野~~~佢地揮一揮魔杖......





霍格華茲就開始有燈光表演喇~~~~好靚架!!












毛寶為大家影左呢個用霍格華茲做投射背景既燈光表演縮時~請大家欣賞~~~(我唔識為段片滅聲~~縮時d聲變得好八婆~)

做完一陣咁散場走啦...但因為都好多人....所以等疏散都好一陣子~慢慢行緊一路走時佢又黎多次表演喎!!原來係不停播~~唔使驚睇唔到~~~由於行遠左個城堡....發現呢度個景觀原來更好!!!(有時d野唔一定要企第一排先得~)...睇下第一幅相...影哂4隻學院既雪人幾可愛~~








好啦~睇多左次都夠皮啦~又行過聖誕樹哥度~夜晚有燈好靚~~




夜晚著左既活米村燈仲靚~~~~~第一次睇夜晚~





蜂蜜公爵同桑科的惡作劇專門店其實內通的~蜂蜜公爵櫥窗大大的巧克力蛙好吸睛~~(巧克力蛙仲識打開架架..留意下第一同第二張相)....仲有超大張的巫師卡....(好想要)....仲有大大粒的柏蒂全口味豆(我不想吃)







又要去桑科的惡作劇專門店睇下有無新野...好彩無~~~(有我實買)








又走入貓頭鷹郵局看看....但postcard無新的~





淨係對呢個有興趣~但係放下....就是擁有~係咪好難想像我話呢舊野得意呀?因為有條繩一拉佢會識震...就好似想咬我咁~我覺得好可愛~




出左哈波園區見到今朝合照既聖誕樹著左燈好鬼靚~佢隔離係用建築物投射緊做燈光表演~靚~





我竟然係臨走時係最大哥間手信店先失守!!!!!哈哈~同埋走時見到退稅超勁多人排隊...根據上次係度退過稅既勁慢經驗...我放棄喇~




番到出去梅田我地就去左算係近酒店既磯丸水產食啦~地址：大阪府大阪市曾根崎2-8-12...開24小時~




好耐之前係東京哥間食....由全部日文睇圖叫餐...到有中文餐牌...到依家用iPad點餐!!!仲要有4種語言~




有中文睇...仲將d野食分門別類~好野~




有d中文係咪問google老師呀你?咩叫喝在鎖呀?咩叫沒分裂的酒直呀?~~~~~其實我想叫梅酒..佢會問你咩形式飲....有個好似係on rocks..一個好似係溝梳打~笑屎~




小菜~(聽講好似日式餐廳d小菜都會收錢~好似我地飲茶d花生咁~佢地好似唔興好似我地咁退番唔要...但我又無咩所謂~因為日本d小菜都好好味~)....應該係沖繩哥時食到既水雲加左d山藥~勁開胃~




極品紅魽....755円(稅込)=52.5hkd...我覺得幾好味..毛寶話有d腥~




通心粉沙拉...323円(稅込)=22.4hkd..好味~次次都有叫~




毛豆....323円(稅込)=22.4hkd.....一大盤!




淺漬黃瓜...323円(稅込)=22.4hkd....都幾多!味道好出色~好開胃~




名產烤鮪魚骨間肉...971円(稅込)=67.5hkd.....一攞上枱...嚇到我同毛寶成個彈起!!!!超勁大舊....仲話：大佬...67.5咋喎!!使唔使咁大舊!!!...成個7公子咁既7字型行出黎





仲要佢骨中間收埋超勁多肉!!!!!勁鬼祟!!!!!但d肉又幾滑幾好味喎~




叫左個麵豉湯....215円(稅込)=14.9hkd...熱辣辣的幾唔錯!!勁大碗~




炸日本白蝦...431円(稅込)=30hkd....送酒岩哂~好好味~





我最鐘意既蟹味噌甲羅燒...539円(稅込)=37.5hkd........抵!好味!!我最愛!!如果係兩個人就適宜叫一個share~唔係既話會太漏~





串燒紅蝦(5隻)...755円(稅込)=52.5hkd...好味!(呢個佢幫我地係外圍燒埋先俾我地~因為我地坐bar枱唔夠位~)





錫紙烤魷魚和菇...539円(稅込)=37.5hkd....呢個係其他分店好似無見過!!極好味!!d菇好鮮!!魷魚又正~用魷魚再點d燒蟹膏又好正~~~~~~好好味~




燒北寄貝...539円(稅込)=37.5hkd(隻).....其實佢開左之後一隻係有兩邊~如果兩個人食就叫一隻ok了~我地叫左兩隻...即兩人有兩邊~第一次佢幫我地燒得過熟...第二次就燒得好d~




燒活白蛤....647円(稅込)=45hkd(兩隻)....一份已有兩隻~不過又係佢幫我地燒...但又係燒得過熟....失敗呀今次!




兩個人叫左勁多野食~之前去心齋橋哥間都係佢幫我地燒...但上次個姐姐燒得勁好食....呢間哥個有d失手!




iPad埋單~呢餐食左8,640円(稅込)=600.5hkd...每人300.3hkd....都ok既~因為我地真係叫左好多野食~





呢日我係環球片場買左呢d~




呢個就係我係入口最大哥間紀念品店失手買既野...係咪抵死喇!!!個小皮gip仔超靚!!!我好想下次cosplay時用!!!好得意!!!!!其實佢入面係裝曲奇既....但邊個得閒理入面d曲奇呀??攞番公司請人食啦~~~~好地地賣曲奇唔得既!!係要整個咁靚既gip仔既!!!!大拿拿成4,000円(稅込)=278hkd...但我真係忍唔住喇!





又係魔杖?我已經有好多好多支哈波魔杖~




佢抵死在...佢係一支魔杖筆!!!!!!!!!!!2,500円(稅込)=173.8hkd...都無唔買既理由啦~





今次既巧克力蛙我抽中之前無既赫夫帕夫學院創辦人Helga Hufflepuff~~~~~好野~~~~hey!!我差兩張就齊喇!!!!!我仲差史萊哲林同埋金色既鄧不利多就齊了!!!!!(金色鄧不利多應該很難抽中....嗚)





玩完機動遊戲佢咪會俾張野你去買相既?平時都係一張紙仔....哈波那張是硬卡紙而且圖畫超美的!(不過我無去買相...玩緊機動遊戲影既相點會靚)




呢4日買既野~好似好多又唔算好多~




再講多次~呢兩支真係好香~




呢~之前咪話買左條繩做運動既....就係可以咁樣做...不過番屋企做左一次.......er..唔..呀.........唔使問條野係邊喇....我寫係度警惕我自己唔好再買同類型既野喇~




執好哂野~沖埋涼~嘆下~第一日買既starbucks布甸依家派上用場~~~~~一個抹茶一個奶茶~




個杯都勁靚~~~我食完有洗番佢攞左番屋企~




奶茶味香濃滑~~~正~~






抹茶味我就覺得質感硬左d同埋偏奶味d~











我好驚呀!!
我噚晚發夢發左個失戀故事呀!!
我俾仕燊bb拒絕我合照呀~~~~
我傷心到呀!!!!!!!!
what a sad story.......<3



2018/05/10的開心事：
暫時無被消失網絡世界~要感恩~
上到一陣網



報時：距離和歌山嘆溫泉自駕遊之旅2018仲有---38日~
報時：距離與毛寶慶生泰國食揼嘆之旅2018仲有---141日~
報時：距離天團蘇格蘭高地之旅2018仲有---156日~