毛里求斯渡假+馬達加斯加麵包樹之旅2017-05-23第四天Part 2(天晴)

星期二...小朋友終於開哂學喇~~~~太好喇~~~係d籌度可以反映到出黎~~~~~~夜晚無去做運動...諗住幫媽媽係屋企樓下抽d行李番屋企~臭佢之前自己食飯~我揀左小上海煎餃(呢日煎得十分之好!底好脆~~)+恆友......勁耐無食過呢個組合~~~恆友我最鐘意食火水丸(火腿丸)...芋絲同埋海帶脆肉瓜哥d....無乜會食丸類既野~~因為佢d辣好襯食蔬菜好吸味~~星期三...番工還好~放左工就去左做運動...今日淨係快行+慢跑5.28km.....然後健身教練教左我少少收手臂動作~~加油~~星期四...番工時又俾個男人話...話我地無將佢個籌叫出聲...大佬呀..成個場咁靜就知無野叫出聲啦...人地又入到counter既..得你一個入唔到既....去麥當勞買餐都自己睇mon睇編號攞野食啦...佢又有叫你名攞餐咩..你咪唔好食囉~放工快行+慢跑5.24km...單車2.78km.....今日狀態挺不錯~~好野~~~終於到左星期五喇聽日~~~~可以訓晏d喇~~(唔係喎...周末係朝早去做運動喎~)



2017-05-23
Day 4---Part 2(毛里求斯 Mauritius)
差不多中定既時候我地就到左我地呢晚既酒店喇~我地揀左St.Regis Mauritius Resort~~~我第一次住St.Regis咋!!!!好緊張~~~~而且個價錢對我黎講係天價..(對我黎講)~




一到既時候已經有人出黎迎接~帶我地去Bar哥邊~坐低先~





個Bar係對住佢地個泳池架~~(呢日又係勁曬~)




咁佢就幫我地去搞check in既野~我地就負責飲welcome drink~~~~~~~都幾透心涼既~~又酸酸地幾醒胃~不過我覺得Hilton哥杯好飲d~





我地要求左早d有房~但佢話暫時仲未有房~仲執緊~所以我地唯有去食中午飯先啦~佢有5間餐廳既...其中一間就係我地依家要試既Bar & Grill...叫The Boathouse.....係一間海邊餐廳黎既~






我地呢晚酒店揀左Half Board既(包早晚餐)....但午餐無包~所以就睇睇佢有咩好食啦~(其實中午佢淨係得呢間餐廳開...其他都係晚上先開)...佢有d Daily Special既...我地決定叫d呢個...又叫d餐牌入面單點~




叫左野食上麵包先~但麵包不特別吸引(我覺得茶園哥日好食好多)...失望~




我叫左杯St.Regis's creation Cocktails....揀左杯The Lychee Sensation....Rs380=86.3hkd.....wow~幾唔錯喎~好少女~好解暑~




我同衰婆都係叫左Pan Fried Crab Cake做前菜Rs780=177.2hkd........好好味~~~加埋墊係底d牛油果同埋旁邊既ginger dressing(我又好鬼仔喇~).....真係開胃又好味~呢個俾高分~





衰公同毛寶都係叫Shrimp Couscous with Passion Fruit Dressing...Rs600=136.3hkd....這個都不錯~但與Crab cake比起黎就Crab Cake完勝~




毛寶個主菜係Daily Special度叫既....係Lamb Curry, Rice and Condiments.....Rs800=181.7hkd.....個咖哩味好好味!但係肉實在太多~~~~咦~~~嫌人地多餸得滯添...d客真係難臭~~~同埋個羊太鞋囉~~~~




衰公呢個都係Daily Special既....Pasta with Cheese Sauce...Rs800=181.7hkd.......食第一啖覺得ok既....但唔可以食多一啖囉...勁漏~~~同埋個咖哩羊同呢個意粉一樣錢既時候我覺得個羊既性價比好似高d~




衰婆的Slowly Grilled Lamb Shoulder, Chimichurri Sauce....Rs1,020=231.7.....這個慢燒的很不錯吃唷~~~~





我的Grilled Tuna Medallion, Smoked Onion Puree, Asparagus and Tomato Salsa....Rs780=177.2hkd.....我覺得燒得剛好野~我仲驚佢鞋添~(我到底有幾驚食好鞋既野)....加埋個汁一齊食仲有d小清新添~(我覺得我個主菜係4個之中最好食的~感到驕傲~因為我好少唔踩地雷~)





幾好喎~黎到呢度又無咩烏蠅無咩蚊喎~又唔算太熱~食得幾舒服~




招積到係酒店既沙灘有馬騎.....你好野~




叫左一個甜品同毛寶share黎食....Pineapple Infusion with Strawberry Sherbet....Rs520=118.1hkd.....正常野~但不特別驚喜~最特別應該係佢畫係碟上面既花囉~我開頭以為本身隻碟有架~畫得幾靚~




呢餐食左Rs7,559.99=1.717.3hkd...每人429.3hkd.....酒店價囉~以中午黎講~算貴啦~但味道ok就算喇~




食飽飽去搵番幫我地check in既姐姐問下有房未啦~佢就話有房喇..不過都成3點幾4點lu~即正常入住時間無早到~再經過多次泳池正面~好曬~




入房前佢建議我地訂埋今晚晚餐既餐廳先.....頭先講佢有5間餐廳既..咁中午我地就試左The Boathouse....仲有一間法國餐(即早餐地點)..一間印度餐..一間亞洲菜..一間日本菜......本身想試法國餐...但佢話今晚法國餐係做自助餐...唔想食自助餐....又唔想食印度餐....日本菜又唔包half board...如果食既話會有8折...但唔想浪費個half board...咁Bar & Grill中午食左...雖然食左但唔想相同餐牌又食多次....唯有揀左亞洲菜既Floating Market~




揀好餐廳我地就有專人車去我地去我地間房喇~咁叔叔一路揸車一路向我地介紹下酒店周圍有咩啦...健身房呀SPA呀reception呀之類之類~






黎到我地間房喇~~~~我地兩間房係隔離既~~我地住地下哥層~~




好緊張呀~~我同毛寶住411呢間房~~~~要推門入去喇~~~第一次住咁貴既酒店咋~~~~




一入房~wow~個落地窗係幾吸睛既~我地出發前訂酒店時就話好想住一晚貴酒店....結果揀左呢間喇~~房價一晚係.....5,601.4hkd............................好貴...真係好貴~~我好似成世人都未住過咁貴既酒店.................每人每晚2,800.7hkd.....諗住人一世物一世....點都要試下既~而且呢個價錢係Half board嘛~(其實第一次訂好貴~訂完之後幾日再睇無啦啦平左...好彩有得免費取消~重新再訂每人平左500hkd)





床隔離有梳化~




浴室勁大........佢舊番皂超香~~用黎洗衫一流~淨左哥舊忍唔住攞埋走~~






浴室咁大係因為包埋書枱係入面..有d怪呀可~書枱係浴室入面....不過咁樣佢就可以望住窗出面個景囉~




書枱旁係一個衣帽間~如果長住我荷包一住穿哂窿...(其實坐多晚都唔掂~)




超有誠意的迎賓果籃~~~~~~~好多生果唷~~~~(但菠蘿有點難為情喇~~唔識開~~)





如果薯片都免費就好喇~




仲有要極度推薦仍房入面對拖鞋!!!!!超級柔軟超級好著!!好著到衰婆話帶埋番屋企~未著過咁舒服既酒店即棄拖鞋~




小孩表示很興奮~因為跟住我地去咁多次旅行終於有一次豪一豪~




呀~推開落地窗就係咁架喇~~呢個就係我地揀住樓下房既原因(比樓上房貴).......一推門行出去就係酒店私人沙灘喇~~~~




我地間房既外觀~




人家話要把握時間曬太陽呀~~好fitfit呀~





大家都知我極度怕曬極度怕熱~我拖張櫈係樹蔭下睇書食薯片算喇~(呢個就係人地可以show身材你只可以喱埋一邊既原因)....唔係咯~~都話係因為我怕曬咯~~前面哥兩公婆搞咩~




佢地個沙灘都算係幾靚架~不過行到近水既沙就粗d有d吉腳~~





我同衰婆去左叫野飲~點知叫完諗住講房號時哥個野話唔使...話請我地飲喎~~仲唔係睇中左衰婆~~~~~我叫左virgin mojito~衰婆飲virgin colada~




一路食薯片一路飲virgin mojito一路睇書一路吹海風真係幾爽既~(雖然本書我睇黎睇去仲係頭兩頁)




左邊海面天氣好似好差咁...唔通海哥度落緊雨?




離譜呀!!海邊有骨妹呀!!!放開你手上面既女仔!!!!!過黎按我~~~~~~~~~~~(衰婆按摩真係好舒服~~)




咁嘆完一輪海風咪衝入去沖個涼囉~點知洗好面想跑入去沖時衰婆通知有日落喇喎~~咁快既~~~好靚呢印度洋日落~~





最衰最底度有d雲唔算太清~~好彩衰婆有叫我睇咋~日落得超快~大約10分鐘度~




影左個印度洋日落既縮時~

睇完日落就番去沖涼啦...係我碌哂衫諗住沖涼時..有人敲門...我以為係衰婆...諗住唔理佢沖左涼先..點知佢見無人應門竟然開門!!!!!!!!!!!!!原來係St. Regis既管家問我地夠唔夠毛巾.....大佬...我全裸中........好彩你係女既...唔係我一定大叫!!!!!!嚇屎我咩..................................其實無人應你咪和平散去囉....嚇到我即刻落哂所有鎖.............................................................我幾不滿意呢點喎.....



沖完涼休息左就去食飯.....我地無叫車出去..自己行出去咋...因為我地間房唔算係好遠~




我地揀左The Floating Market........原來日本餐係同一個入口~




不過我唔鐘意黑Munk munk燈光既餐廳.....梗係覺得黑Munk munk係d野唔好食想分散我注意力.......





先上餐前包......我從來未食過咁難食既餐前包包..........又硬...又凍.....味又不討好.....質感又怪.....我身在St. Regis嗎??




衰公叫左毛里求斯啤Phoenix...Rs190=43.2hkd....不錯飲~




我叫左Classic Daiquiri...Rs390=88.6hkd....好味~但我鐘意中午哥杯The Lychee Sensation多d~




佢地個餐牌有中文架...吹佢唔脹(但你明咩事架啦)......我地呢晚係half board既....所以揀佢餐牌某d野唔使錢....某d就要加錢......我地叫左4個唔同既前菜share黎食......呢個係蟹肉糕,青木瓜沙拉和芫荽醬....單點Rs980=222.6hkd...Half Board不用加錢.....一般..有少少辣辣地咁.....但原價既話係完全唔值




鴨肉與香蕉花沙拉....單點Rs780=177.2hkd....Half Board不用加錢........d鴨肉係炸到零食咁脆....然後成口油....然後......然後你諗下好無食......




呢個係Signature Platter...單點Rs900=204.4hkd....Half Board不用加錢.....有蝦和花生泰式春卷....炸雞肉雲吞..檸檬香草牛肉卷....er.....唔係好食囉.....唔識講喇....又話係signature既?




生吞拿魚,黃瓜和蘿蔔沙拉....單點Rs780=177.2hkd.....Half Board不用加錢.......呢個算係最好食最正常~但...唔使煮架喎.....好擔憂主菜呀~




香草蒸爐魚,辣椒和蝦餃....單點Rs1,120=254.4hkd....Half Board不用加錢........er...外觀唔係幾美觀~~~咁蒸食落又唔覺得好鮮~~~點哥個豉油幾好味~~




紅咖哩與椰漿炖蝦....單點Rs1,220=277.1hkd....Half Board加Rs600=136.3hkd.....咖哩味道很好~但蝦質仍然是木的~




烤和牛配春卷和胡桃.....單點Rs2,400=545.2hkd....Half Board加Rs900=204.4hkd.......查實食落唔似食緊和牛架....似食緊普通牛柳.............................原價點既話我會無言.....我地仲叫左兩份....




除左飲品同埋另外加錢既主菜唔包要俾錢之外...其他都包既...咁呢餐我地另外再俾左Rs3409.51=774.5hkd.....每人要俾193.6hkd........唔係好抵囉....因為呢間餐廳唔係幾好味喎........(侍應叔叔問我地係邊度黎...我地話澳門..佢話佢係第一次聽有人係澳門黎呢間酒店喎....世界之大~點會我地係第一人~).....中午食哥間好味d...對呢晚既晚餐完全失望~




食飽飽行番房時見到好多星星~即刻番入房攞腳架跑出前面個沙灘度影下先~~~唉呀~勁大風~長曝時影埋d大風吹既樹~




華~係靚既~~但仲係唔小心影到棵樹~




行番埋d影啦~但又影到屋頂喎~




好啦~行出沙灘影啦~不過d沙好軟呀~~要搵張枱俾個腳架做固定~~~~好靚呀~~~終於影到喇~~~~~~周圍咁光都有星河都離哂譜既!!!!!




有粒星特別光既!唔知叫咩名呢?




同埋影左一陣呢發覺d星郁得超快喎!唔怪得咁多人影星軌啦~....雖然呢次既星星真係上次係塔斯曼尼亞睇到既咁多....但同唔同既人睇..唔同既地方睇都有不一樣既感受~我都好享受呢晚既星空呢!呢度係酒店都睇到咁多星..不期然咁期待去到馬達加斯加會有更多既星~









2017/09/07的開心事：
今日跑步可以跑耐左~~開心~~~
以前跑5分鐘已經氣喘得不得了~
依家覺得自己老而彌堅~~yeah~



報時：距離與毛寶慶生快閃台北之旅2017仲有---20日~
報時：距離日本四國自駕遊之旅2017仲有---36日~
報時：距離日本大阪自由行之旅2017仲有---91日~
報時：距離新加坡熱辣辣聖誕節之旅2017仲有---105日~