天團蘇格蘭高地之旅2018-10-23第十天Part 2(雨天及後轉陰)

我番黎喇我番黎喇~~~我見到有好多人掛住我~~~(你係邊度睇到XXD)....上上星期二.....開OT嘛~呢日做多一個鐘~~~好攞命~放工衝番屋企執埋d行李~~跑步?NONO~~上上星期三....番工到3點半..放假喇~~~~出發喇~~~~~~然後咁就玩左開心11天....講真...我覺得仲攰過去南美XXXD..定係因為我老左3年呢?????其實我噚晚番到澳門....但係一番到澳門我就覺得頭痛....所以我今日請左病假休養...唔知係因為我太攰定係因為港澳真係太濕?我係摩洛哥玩左咁多日一日都無頭痛過~但我頭痛緊都仲記得今日係星期一出Blog~



2018/10/23
Day 10---Part 2(蘇格蘭,格拉斯哥 Scotland,Glasgow->Puck's Glen->Finnich Glen, the Devil's Pulpit->Onich)
去完Puck's Glen好似都已經係中午...但係今朝早餐都幾飽~所以跳過中午哥餐去下一個景點......就係Finnich Glen, the Devil's Pulpit....入去網址有教你點去同埋邊度泊車~....由於本身係噚日去(但昨天時間有點晚+天氣好像要下雨)但依家要去就係回頭路....如果揸車回頭要花好一陣子時間....點知Mapsme教我地連人帶車過海喎...真係得???揸車去到佢叫我地去既位置.....又真係有個碼頭喎!!4個人連人帶車俾左£24=249.6hkd....每人62.4hkd....搭20分鐘唔使....就慳左兩個鐘車程.....抵搭~重點可以俾司機大哥休息休息一下~






免兜彎坐船直線過真係好~






噚日個小小凹位今日泊滿左車....所以泊左去前少少既兩條公路交匯處~呢邊可以泊多少少車~




泊好車就要行番轉頭~~條路由於今朝落左少少雨有d濕~~爛泥路~~(因為其實唔係一條正式既行人路...只係公路隔離...要小心行~)




好!!今日再挑戰!!個警告有d嚇人呀下~其實由呢度行到噚日個小入口就唔係太遠既je.....10分鐘度會行到....





鼓起勇氣!!!又濕又滑!!!d級又高~~~~個身要窿到超低慢慢落~~~~





以為全部有級落~~又唔係~~因為d級有d係唔適合我地身型行落去~~~最後又要行過隔離sir落去~




經過一番努力~~條褲都沾上濕泥~終於落到去啦~~~~呢個可以話係
"蘇格蘭百大秘景之一"!!(個朵我地自己作架咋XXD)





不過要再深入既話就要涉溪而行喇~~~於是~~大比貼心的幫我地淘左索溪鞋(個名好正XXD)...好~~換換鞋先~我地型唔型呀~~





你地四個就乖乖地咁等我地番黎喇~~~




望望d水有幾深先!





第一個勇士!!!!一落水毛寶說：ok呀!無野呀!..........3秒後：x!好x凍呀!!!......XXXXXXD





一落水....咦...真的還好~....但真的3秒後....小腿以下像比刀片劃過一般......................好痛好凍呀喂!!!!!!!!呢度d水啡啡的...令我諗起塔斯曼尼亞哥條可以飲既河~又係咁樣茶色既~呢條我無飲架~~~因為澳洲哥條我都唔敢飲~~~~




d鬼佬好高...可以一直係條溪行過去~(仲要係赤腳!)...我地人又矮又覺凍...只可以靠住d石慢慢行過去~~~~





我攀到整親腳....終於都攀到過去蘇格蘭百大秘景Finnich Glen, the Devil's Pulpit!!!!






帥!




呢度都係十分好影的~~~不枉我地換哂索溪鞋行入黎~~





望番轉頭個景都靚架~不過我就覺我今日差咁d陽光啦~





係呢舊大石影既又係靚!!大比攞既景影得一定靚~






回程了~俾大家睇睇d矮既人係點樣索溪!XXD不過真係要讚下索溪鞋!因為係石上面行都唔怕跣腳~

番到頭先開頭落水哥度條大樹幹都很好拍~



一齊坐係大樹幹影相~天團一秒前帥氣一秒後又唔正經XXD






上番去又是另一難題XXD....換番爬山鞋先~




又窄又難爬!不過叫做成功挑戰左呢個秘景~





然後直接去我地呢晚既酒店啦~不過發生小風波...本身酒店下面有個餐廳既....但最近都唔開....但佢又無reception.....咁...我地點check in呀?...於是我地去附近既guesthouse問問...點知佢好似慣左呢間酒店d人有呢個問題XXD....同我地講話佢應該有Send e-mail俾我地知keybox密碼攞鎖匙...大比再翻mail box...完全無囉....跟住個guesthouse主人好人到幫我地打電話俾酒店員工......點知完全唔聽電話....民宿主人好人到話不如去佢地個Lounge度坐下飲下熱飲等....勁好人...之後連民宿主人個老婆都忍唔住幫我地再打電話XXD.....終於問到個密碼攞鎖匙~真係真係好多謝你既熱心幫忙!!!!!!!我地呢晚既住宿係The Corran...我地會住3晚....兩房3晚共£465...每房每晚£77.5=806hkd....每人每晚403hkd....呢間係我同毛寶既...唔知點解特別大~~~~~~~~~~~







呢間房包早餐既...但.....原來早餐係雪櫃.....我以為有即煮熱辣辣早餐添....................




由於呢頭超黑...而附近都無咩餐廳...所以我地今晚各自係房休息同食下自己帶黎既麵同無印湯~~~~~




由於中午無食飯~~~~我同毛寶飲完湯食完媽媽米仲係好餓~所以........我地決定消滅哂雪櫃所有食物XXD...我其實好憎食呢種包裝蛋糕...但係....又幾好味喎!唔怕乾~~~朱古力也不怕漏~




同埋呢個乳酪又唔錯喎!!可以齋食~~又可以溝醬食~








2019/05/06的開心事：
中午食左粥同炒麵....成個人回哂魂~
精神爽利~



報時：距離狂歡三寶台北快閃瘋食之旅仲有---30日~
報時：距離九州自駕遊之旅仲有---152日~
難以想像~仲有一個月要去喪吃了~~~
期待已久的狂歡三寶之旅~