天團蘇格蘭高地之旅2018-10-18第五天(晴天及後轉陰)

星期五....呢日多野做就梗啦~但d客係有禮貌既就算係咁啦!仲想點~....放工去睇戲...睇戲前有30分鐘所以終於試左kfc新既咸蛋黃雞~~~好野~試左~雖然唔係特別的好食..但咸蛋黃味是心癮~呢晚去左睇綠簿旅友(Green Book)....然後睇完去左食渡小月~再食埋澤賢記既雞蛋仔!!又係終於食到!!!好好味呀!!外脆內黏!!!!!有機會真係要試試佢!麥公子真係無推介錯~.....星期六....中午去左食魚湯粉!!!好開心新年前話要食今日終於食到~~~~之後又去左百老匯買Rethink既筋勞+澤賢記既雞蛋仔...點解今日哥底無噚晚哥底咁好食既!..我今次俾機會rethink既熱筋勞(邊個求你俾機會佢呀XXD)....但我都係鐘意飲Black/Bloom多d~~....下午在家上網又睇濕爬紅館演唱會...我求下你地出番隻演唱會DVD賺下錢啦好無呀!!!我好辛苦呀!!!!!XXD...同埋我又睇最後晚餐既acoustic version MV喊左XXD....夜晚去左金沙城間葡餐慶祝我地貞公子既生晨~~~~(最開心係~~去接麥公子哥時佢抱左八寶落黎俾我同毛寶玩左陣~~心情愉快~~)....星期日......本身想食方丈架!但無位泊車~~然後想食永安...又無位~最後走左去Root食~個style一百八十度轉~下午追劇~仲睇左套Fat Amy做既戲但勁悶.....夜晚痴痴貢~星期一.......不尋常的多野做~真係好多~某類別既人仲特別串~你好野~....夜晚乖乖的去跑跑...因為我見呢個禮拜好似都有雨.....襯今日懶好天跑跑佢~點知跑跑下落勁大雨....我成個人濕哂....濕到隻鞋每行一步都咇到水出黎......落湯雞仔跑左3.49km.............



2018/10/18
Day 5(北愛爾蘭,貝爾法斯特 Northern Ireland,Belfast->Finn Lough Resort)
早呀早呀~本身我地呢日安排左去St. George's Market行下食下早餐~但前一晚睇原來佢淨係開星期五.六.日.....呢日係星期四~所以緣慳~咁都要食早餐架係咪~梳洗好我地就出發搵個地方食早餐先啦~好好天呀~~~~





行過埋噚日伕下午茶啡哥度...




揀左呢間House~~~地址：59-63 Botanic Avenue, Belfast, BT7 1JL, Northern Ireland




入到黎又覺得幾靚喎~~同埋見到佢擺哂d包呀~果汁呀好似自助餐咁~先諗到...哦!原來係佢係一間酒店既餐廳黎既~我地係非住客都可以黎單點食~






呢間餐廳d裝修都好靚下~









yeah~我份早餐呀~人地上班時自己嘆早餐是特別的舒爽~




我叫左杯熱既筋勞~£2.5=26hkd




我份早餐我叫左Half House....£9=93.6hkd....華~咩都有d~好大份呀可~除左茄汁豆~我全部食哂~~~(因為我最憎茄汁豆~我請左阿sam食~)




叫呢個早餐因為有我想試既野~本身如果今日去到St. George's Market既話我都會試試看~~~就係呢舊Black Pudding~~係用動物既血..內臟同碎肉做成既香腸......er...大家都似乎唔係太欣賞呢款傳統食物...但....我ok~




仲有呢個係愛爾蘭同北愛爾蘭都好流行食既soda farl~~呢個梳打麵包又幾好味喎~質感黏黏~我鐘意~




毛寶的Veggie Breakie...£9=93.6hkd...




早餐食左£44.9=467hkd......每人食左116.8hkd....好愜意的早上~(查實放假本身就讓人很愜意~)




好~~~食飽飽我地就出發喇~我地今日要做既就係...由一間住宿...移動去另一間住宿........XXD....呢日天氣好好呀~~~~






呢日越駛越郊區~~~見草地多過見到人~





到喇~~~~~個閘鎖住既~~落車望番轉頭好似去左神秘莊園XXD...我諗起毛寶成日係手提玩既莊園主人XXD





我地呢晚既住宿叫做Finn Lough Resort...地址：41 Letter Road, Aghnablaney, Enniskillen BT93 2BB, Northern Ireland....有咩咁巴閉我地呢日淨係安排去呢間酒店?...好!我唔話你知住XXD





我地泊好車就有人帶我地去Reception度check in先~咁我周圍影影看先~~呢邊係大堂可以坐下既....勁有人地屋企既感覺....仲要有一大盆朱古力曲奇放係度俾你食~




另一邊就有d產品賣~~




仲有間bar同圖書館~





大比仲訂左個下午茶去食~所以我地食埋先慢慢入房~餐廳係reception既上一層~今晚食飯都係呢度~





佢帶左我地去一間細房度用餐~很vip feel~








唔知做咩哥3個人迫埋係同一張枱...我自己一個人享受孤獨的浪漫~




個下午茶仲包每一杯茶~我揀左我最鐘意既chamomile~




明明我就係同你影緊同一塊牌...你就是影得比較矯情




上左茶之後......d野食就上喇.....越上....我地就越驚~~~~~~~勁~爆~多~野~食~~~~~~~~~~~~~~~~~~~~~~~~~~~首先有一個架既三文治~~~跟住一個架既甜品~~~~~~~~一張枱已經唔夠放~~~~~然後再黎一架腸仔薯蓉~~~~~~~跟住我地坐緊既兩張枱都唔再夠擺~~~~~





以為上完既時候..佢再捧住一堆野食入黎~~~~~~救命呀~~~~仲有蘑菇湯同屎kone呀~~~~~~~~~~~~~~





唔怪得佢俾呢個小空間我地啦~~因為根本唔夠地方放野食~~~~~~~~~~4人份的下午茶好像每人百多hkd.......完全唔會食得哂囉~~~~~~~~~我地哥時影左呢張相俾7公子睇....佢地問我地係咪開緊百日宴自助餐XXXXXD真係好多野食~




首先就係飲左個蘑菇湯先~(因為唔留得過夜~)一入口...超杰~~~飲完呢一小杯....我地4個好似已經飽了XXD.....跟住再食腸仔薯蓉(同一個原因).....真係搞唔掂喇~~~~~~好喇~再食一件三文治~~~~三文治其實OK的~不過食唔哂都無問題既...三文治可以打包~岩哂我地聽日既活動~




好啦~甜品都要盡食呀~佢某d甜品都幾好~但有d真係太甜~~個檸檬撻我就覺得又可愛又酸酸的幾好味~馬卡龍也不錯~....甜品我地真係差不多食哂~






食唔哂哥d野打包!...好想快d入房~~~其實我上網仲睇到佢呢間酒店有其他活動架....例如spa...釣魚...划船...單車...戲院...水上活動~~~~(當然另外收費)




我地去番大堂搵員工帶我地入房~~~~~華~~原來係要坐車仔入架~~~~(唔記得講...我地為左呢間酒店...前一晚執左一晚份既日用品係背包~~~無拖gip入去~~就係因為知有呢段路~費事拖gip重呀~




華~~到喇~我地既2號房呀~~~~~~~





我~地~今~晚~住~bubble~dome~呀~~~~~~~呢間係大比佢地既~~~~





呢間我地既~~今晚...我就是水晶球中的主角~~~~









黎~帶你地入房看看~~~入房前刷下對鞋先啦~~因為真係好多泥架~~~~




華~~~~有無趣呀~~好似直接係森林住咁~~~~一個Dome每晚£245=2,548hkd....每人1,274hkd...你話係咪要早d到享受多d喇~




床~我發現床鋪上好多蚊屍~~~~~~





唔使驚凍~~有暖爐架~~~~~同埋我當時post上fb原來大家最關心既係：有無窗廉落???....我：無架~.......大家：咁點樣換衫XXD.......................其實住呢個水晶球有頭先外面入黎哥對木門關既~......跟住入面呢個小樹林既空間就係我地架喇~無人行到入黎既~~~~~所以唔使驚~我赤條條咁行黎行去好多次~XXXD...(不過我有幻想過樹林入面有鹿跑出黎)




華~下~....咁好天~今晚約定你係床睇星~~~~~~~~





廁所就係床隔離...對門係用拉鏈開~廁所係我最憎哥種~就係一沖涼就會連廁所都濕哂去唔到哥種...同埋發現......房有暖氣....但廁所係無的~~~~~而且有草蚊係入面~~~~~~~~我眼中容不下昆蟲~~~我真係好驚~~~~~好凍呀個廁所~~但佢哥隻香茅味既沐浴露同埋Lotion真係好香好好用~~~~~





好啦~~影下外圍相先~~~~好靚呀~~~~




係咪好想買呢個水晶球番屋企呢~~~係咪好想連入面個女仔都買埋番屋企呢~~~~







套左個鏡頭再影全個水晶球你睇~好靚~好有特色~淨係影相我地都玩左好耐~





影完相走番入房有人說：送俾你既生日禮物~..............華~咁好咁遠都有生日禮物收~~~~~~多謝~~仲話要我帶去今晚食飯先拆~




影完相我同毛寶講：不如....我地襯未日落前沖涼咯~.....我驚今晚食飽飯先沖涼會仲凍~~~~~.....於是我就跑左去沖涼~~真係好凍~舒舒服服沖好涼我地攤係床(好無活力的兩個年輕人...呢間酒店有幾多活動都唔關我地事XXD).....聽下音樂~傾下計~(因為呢個dome係無wifi的...連大比帶過黎既兩個wifi都收得唔係幾好~~~).....咦...我約左人今晚睇星過生日架喎!點解咁多雲既?!





到左食飯時間喇~咁我地就行番出去頭先食下午茶哥間餐廳啦~不過呢段路極黑...係完全無燈的...我地係靠自己手提電話既燈行出去...行出去時心諗：唔會有黑熊衝出黎卦~~~~serve我地個工作人員係西班牙人....佢仲同我地講佢之前係香港做過野...仲過澳門食野好多次~~~~~~~~~~~




麵包唔熱的~但牛油同埋油醋都好好味~~




我地每人都叫左3 course.....£38.5=400.4hkd(每人)......前菜我叫左Cod Cheeks....炸魚塊~都OK~




毛寶揀左Wood Pigeon....呢個整得好好味~原來可以好似牛扒咁半生熟食架?好味~




阿sam揀左Risotto~




主菜部份全部都好麻麻~尤其豬d肉鞋到癲~(最尾兩張就係豬...應該用眼都可以睇得出有幾鞋~)....兩個Mcgoverns Beef....一個Erne Pork....一個Rockvale Chicken....擺盤幾靚...但味道真的一般~







多謝毛寶呀~呢餐飯係佢請我既生日飯~~食飽主菜之後西班牙藉既工作人員幫我地收碟時問：d野o唔ok(查實係外國食飯通常都會問)......大比回：good!(再加一個尷尬笑XXD)......點知個侍應作狀細細聲咁好似講秘密咁話：其實你可以老實話我聽架~我都唔係廚師XXXD.............頂...我笑了~





好喇~最後揀甜品~




我地揀左Buttermilk Pannacotta with Berry Gel & Honeycomb....仲有Sticky Toffe Pudding with Toffee Sauce+Vanilla Ice Cream......Pannacotta唔錯~Sticky Toffe Pudding估佢唔到係甜架喇..但甜得黎又幾好食喎~





食~飽~飯~小朋友可以拆禮物喇~~~~~




下?!..........




係我今年張生日卡呀!!!!!!!!!!!!!!!!!!!!!!!!!!!!係毛寶自己攞黏土整既河馬呀!!!!!好可愛呀~~~~好似係草地開party咁~~~你真係好了解我呀~~~送我雞脾蛋糕~~~~





仲有生日語句在河馬口~~~~~~




多謝你呀~~~~~*3*~~~~

臨訓時就知呢晚睇星無行...因為有雲.....所以聽完濕爬既good night city就訓lu......就係過左12點.....踏入我生日那刻....我睜開了眼......因為我無帶眼鏡...望向天....點解好似咁污糟咁既......帶眼鏡睇真d.......原來成天都係星星!!!!!!!!!!!!!!!!係咪上天送俾我既生日禮物呀??!?!?!?!今次我醒呀!拍醒毛寶呀如果唔係佢又話我咁自私呀......於是我同毛寶一齊欣賞星空~大約睇左半個鐘度.....就開始越黎越少星....原來係越黎越厚雲!多謝送我半小時滿天的星空~(依家一聽good night city就會諗起呢晚...同埋馬達加斯加那麵包樹下的星空:]..都很難忘!)







星期五晚睇哥套綠簿旅友(Green Book)...
好睇!!!
但我睇完都估唔到...其中一個男主角...
係魔戒既阿拉岡?!?!?!?!?
同埋一睇完我淨係想引用濕爬既歌詞：
偽善的世界...混沌了意義!!!!
(咁都可以拉埋濕爬黎講...證明仕燊真係入哂我血)
希望我將來不會成為一個偽善的大人!
相信如果我搭長途機遇到呢套戲我會睇多次~
同哥套The Bucket List一樣...一睇再睇~
仲有哥套喊到我屎滾尿流既About Time!!!



我今個禮拜開始忙忙的~
我會儘量蒲頭~*3*



2019/03/04的開心事：
食左舊好似細個食到既燴蕃薯~
係一個好靚既女仔整俾我食既~
我自己今日唔小心green monday左~
早餐食左牛油果多士...
中午素餃...
下午小休燴蕃薯...
跑完步晚餐係菜麵....
點算呀??我覺得自又瘦又靚<3



報時：距離六公子峴港嘆世界之旅2019仲有---30日~
報時：距離北非摩洛哥之旅2019仲有---51日~
報時：距離狂歡三寶台北快閃瘋食之旅仲有---93日~