日本四國自駕遊之旅2017-10-16第三天Part 2(雨天)

星期五...多野做好攰~但好叻捱過了~放工去左食千笹~之後去左親親菓子軒~...星期六...中午去左Communal Table~想食下焗時仔嘛~(點呀鐘唔鐘意我d鄉音呀)...下午在家幸福忙排緊台北行程~夜晚去開貞公子生日P~好好味呀隻蟹~~星期日...中午又訓到12點...呢幾個周末都好懶無去跑步添.....起身去左試Toff.....係想試佢既樽仔米粉既...但個湯麻麻...反而其他野唔錯~下午又在幸福忙~夜晚好懶...用澳覓叫外賣~又叫左我之前好鐘意叫既哥間燒烤...但點知佢今晚燒得麻麻~失望~星期一....華~我忍得住番工無買筋勞呀~~(個原因係因為我遲左出門口).....雖然今日番工好悶好多野做~但係今日仲有利是收真係好開心~



2017-10-16
Day 3---Part 2(香川縣,高松 Kagawa-Ken,Takamatsu->德島縣,祖谷 Tokushima-Ken,Iya)
睇完小便小僧就再去祖谷のかずら橋(藤蔓橋)~~Mapcode：357 130 587*55.....但個mapcode應該係指你去一個賣土產既土產店かずら橋夢舞台...哥度都有停車場..但都要收費...而且望望下都唔似由呢度再入藤蔓橋....再揸車前少少看看~見到有d私人收費停車位(真有商機)...咁泊哥d啦~橫掂兩邊都要俾錢~梗係揀個近d啦~終於都見到祖谷のかずら橋喇~~~好靚丫~~可惜呢個俾我認為係重點行程既景點...又係落雨~~~如果有紅葉一定好靚!!!




點先!!我件新買既外套靚嘛~~靚啦~~帥啦~~




老夫人留影~呢條藤蔓橋係用軟棗獼猴桃樹枝整成~~(原來係迷你奇異果!!)...好似話1915年試過攞鋼纜代替..但為左振興旅遊業之後又用番樹枝~依家基於安全考量...承力最大既地方都係用鋼纜既~再用樹枝包裹~(網上資料)




話哂係日本三奇橋之一...一場黎到點都要行下啦~行落去搵入口~先去買飛~成人550円=38.2hkd





行到入口...喂!乜條橋d木隔得咁開咁梳既咩???我已經打緊冷震......




老夫人真堅挺!!已經率先衝左上橋..我幽幽的問：你驚唔驚呀??......老夫人：驚咩呀??.....然後影完相一支箭咁標走左.....剩下我孤單的心痛(其實毛寶係我後面)





鼓起勇氣踏上這無盡~~旅途~~(華~~唔好無盡呀條橋..好驚~~)....我係想叫毛寶幫我拍帥氣照...但驚到攬住條橋死都唔放~~咁點樣做帥氣的人呀?




妖!!!!!我一路行一路腳震!!!!!好勁驚!!!!我無畏高架...我無吹水呀...木同木之間真係好闊架....真係sip到隻腳落去架.....上網睇仲話係特登整到咁闊等你地可以睇到下面既溪流喎.............條橋又左搖右擺.....木與木之間又闊...我心中只想：不如襯行左唔係好遠..行番轉頭咯?......之後望到老夫人已經差唔多行遠...又心諗：喂...佢咁老都搞得掂..無理由我認輸架?!........然後心中哼住Supper既歌...頂硬上行哂佢!!!!!!!!!!!!(行時係雙手攬實條橋)




我終於都行完喇!!!!!好驚呀!!!!嚇死阿媽個女喇!!!!!!!!!!行完拎轉頭幫毛寶影相~~睇下人地幾輕鬆~




行番上黎難得條橋唔算多人..影多兩張走人...





千呼~萬喚~~始到達!!!!!!呢晚....我地係住溫泉旅館呀!!!!!!!我第一次住咋!!!!!!!!!!!!!!呢間叫做新祖谷溫泉飯店蔓橋(新祖谷温泉 ホテルかずら橋)......地址：德島縣三好市西祖谷山村善德33-1....Mapcode：357 159 135*65....由祖谷のかずら橋黎呢度好近架咋~我地係佢官網做預約既(因為agoda哥d無我地想要既房型同埋一泊二食)..你係佢官網做預約佢會幫你link去一個叫e路東瀛既網址做預約...係中文的~易用~而且呢間溫泉酒店係超爆的...請提早預約!仲有人係門口歡迎你~




我地本身上網預約時講左話17:30到~但係我地16:00就到了~(早到早享受~好彩今日既行程早左開始~)....做好check in之後就帶我地入房啦~我地間房天神呀!房價係81,000円(稅込)=5,629.5hkd....每人每晚1,876.5hkd....華!!!!!!不過一泊二食嘛~即係包左早晚餐~




好~入房睇下先~房就幾大既~但..我覺得有d舊~




房對住呢個景~




我諗通常溫泉酒店都有呢d俾你一路嘆茶一路食既野啦~




沖茶位~




沖茶位隔離仲有心思位~




廁所同洗手盆係分開的..太好了...但我要講一講...個廁所係智能野....一feel到有人行入去...個廁板會自動升起等你去....去完又會自動吸埋沖廁....本身我都覺得好好.....但當我一坐左落去痾左一陣時...佢竟然吸埋(即吸係我背上面..)....我即刻大叫：個廁所要食人呀!!!!(係咪好低能XXD)





仲有一堆用品..係浸溫泉用既...浴衣係你留宿期間係酒店範圍都可以著住走黎走去唔使換衫~有分男同女唔同色~而且著哥時件衫點樣搭都有規定架!!唔好搭錯!!應該係將右邊吸係身...再用左邊搭住右邊咁著(如果我無記錯既話).....佢應該都會有指引俾你...記得睇~~~仲有d防水袋仔俾你袋野同埋毛巾去浸溫泉時用~




點解我地個房價有點偏貴呢?除左因為一泊二食有兩餐食之外....其次就係...我地訂左間房係有私人風呂架~~~(所以係無浴室的~~浴室就係呢度~~露天的~)...帥不帥氣呀?有私人風呂~~




私人風呂望住既景~




好啦~快快換上浴衣~出去私人風呂合個照~我覺得我個樣咁諧星同d妹妹浴衣好唔夾~又無化個靚妝~(唔知幾多十世未化過~)...但老夫人著浴衣就異常地好看喎~






但我地好有型既...我地唔浸自己個私人風呂先既~我地去浸呢度好著名既露天風呂先~~而最特別既係.....去呢個露天風呂....係要搭纜車上去架!!!!!!仲要自己操控~~(其實只係按個鈕~)




睇下個纜車造型~~~好過癮架~~~~~~成間小屋咁~~~





真係好得意~~~就係坐住佢上山去浸溫泉~~~好正~~~

上去啦上去啦~~~~~~好開心呀~~~我第一次係日本浸溫泉咋~~~仲要上山浸~~~第一次係台灣~但哥次浸完..都對浸溫泉無咩特別好感~




分幾鐘就上左山啦~仲係落緊密密雨~但唔怕~好彩一路都有瓦遮頭的~




男女分開浸架~呢個就係女仔專用既樹海の湯~




因為入面唔影得相架~好多女仔架嘛~所以圖片係from官網架~...一入去覺得超靚!!!!!都係有瓦遮頭既~但個景真係一絕.....雖然有落緊雨.....但群山有d雲霧係旁邊....剎是有詩意.....個景100分!!!浸溫泉前放低個人物品....溫泉旁邊有沖涼既地方(有提供沐浴露及洗頭用品..但無風筒)....沖淨涼先好去浸溫泉呀~如果由一個溫泉去另一個溫泉浸最好係攞小盆盛d水係外圍沖沖個身d汗先再入另一溫泉呀~順便可以俾你睇埋男仔既雲海の湯~浸完溫泉成個人暖笠笠~~~~好舒服呀!!!!!(我終於衝破要全裸浸溫泉呢個心理關口)




浸完行過可以俾人入去休息既地方...好傳統日本氣息~




等纜車番落去~




check in哥時已經問哂我地想幾時食飯幾時食早餐架喇~我地浸完溫泉番到房執下野就到食飯時間啦~係落去佢間餐廳食~(早餐同晚餐都係同一餐廳~~我開頭以為會係自己房~)...一坐低....佢就俾菜單我地睇先~呢個係我地呢晚既菜單~




同埋一入黎就已經擺好哂d野啦~~~~好靚呀~~~~




喂~~好有風味呀!!!我未試過~~燒魚好吸引丫~~另外一樣係係叫做人形燒~一舊舊哥d係團子~話好似成個人形咁所以叫人形燒~(係...有個係四川來工作的女孩話我地知既~)




好開心呀~我第一次住溫泉酒店同埋食佢地d晚餐咋~(我地唔揀食自助餐哥d溫泉酒店~最憎食自助餐~)...大家唔好驚~我無走光~我係一個好怕醜既女孩兒~我係浴衣入面仲有著睡衣~~請放心觀看落去~~






晚餐無包野飲既~我就叫左杯梅酒飲~650円=45.2hkd~




我有問四川妹妹有無話食邊樣先~佢話無咩所謂~咁我食刺身先啦~唔知係咩魚呢..幾好味~右邊哥個係蒟蒻~




呢餐係食鄉土料理既~呢幾樣都好好食!!!!






人形燒已經一早解決左~呢條爐邊烤魚超!!好!!食!!!烤得剛好~魚味濃~而且好易食~因為我唔叻食魚~




天婦羅做得不錯~我最鐘意食哥舊菇~




到湯~係熱辣辣~但入面d料太多..一般~




食食下佢就幫我地點火食呢個~係咩黎呢係咩黎呢~




華!!!!係牛呀!!!!!!!!!!!!!!!!!






烤到咁上下佢就叫我地落汁.....咋咋聲~好好聽~勁爆好味~~牛肉既脂肪好好味~~自己烤烤得剛好~(讚下自己先~)





佢見我地食牛問使唔使上埋飯~我地話好~點知原來仲有個蕎麥麵.....實在成個人full到上心口!!!!!!!!!!!!!!!!!!!!




仲有最後既甜品+生果~估唔到梨甜過蜜瓜~甜品都不錯吃~




食飽飽番入房~已經幫我地鋪好床喇~




今日我買左呢d呀~~~係咪好多呀~




因為我地無去小豆島~所以買包小豆島盛產既橄欖試下~仲有d漬物~~




仲有當時得令既記憶力香口膠~(之後澳門都有售~)




我最開心係買左呢堆野~功能性既野~屎啦..我係咪老喇?!?!?!?!我特登買哥個背嚢架~為免再發生上次係馬達加斯加行石林哥個背嚢太重既恐怖經歷~買個輕d既~可以摺埋既~幾好呀可~摺到咁細~影完戰利品~就早抖喇~超早訓~因為都無野做~第日又一早起身~












有人投訴我上一篇Blog好長..
睇極都睇唔完~



2018/02/26的開心事：
我今日決定左做樣令自己好開心既野...
然後又有人支持我喎~
好開心呀~~~~



報時：距離與媽媽慶生台北吃喝之旅2018仲有---32日~
報時：距離和歌山嘆溫泉自駕遊之旅2018仲有---112日~
報時：距離與毛寶慶生泰國食揼嘆之旅2018仲有---215日~
報時：距離天團蘇格蘭高地之旅2018仲有---230日~
今個周末起碼都排好左台北d野食...
而且仲訂得七七八八~
和歌山又租左車~
算係幾勤力下~