冰島格陵蘭自由行之旅2015-10-07第十一天Part 1(晴天)

有時d野就係咁反高潮~~你以為平時星期三好多野做?佢中午又真係幾多野做既...但下午番去可以差天共地~~~好想聽日同後日都係咁呀~~~~



2015-10-07
Day 11---Part 1(冰島,胡斯維克 Iceland,Husavik->米湖 Myvatn)
今日約左觀鯨活動~不過唔趕的~12:30先出發~起身慢慢食個早餐先~點知呢個Fosshotel超唔掂......佢見差唔多夠鐘停供應早餐(其實仲有一個鐘而且仲有好多人落黎食)...佢就唔再出新野食....搞到得d碎濕濕既紅黃椒同埋麵包...好彩我攞得早...唔係火腿都無.........而且呢間真係連食早餐既地方都超舊...見到張枱布都唔開胃~:P........我地住咁多間最唔掂就係呢間Fosshotel Husavik!




食飽飽上房坐一陣同埋執好行李~我地今日將會去米湖區住3晚!!!!!!於是我又上網查下極光指數~呢晚我地係紅圈位置~~下~~~無雲~~~仲要係6~~~仲要係very high~~~好緊張呀~~噚晚5都爆到咁..咁今晚咪....唔好講出口~(其實好期待~因為我地住番之前住過既Stong~哥度係一大片平地~成個地區都係民宿主人~無其他人~)




好囉~check out左出黎行下先~咦~幾好天喎~




成個Husavik我淨係見到呢間手信鋪.....不過d貨品一般~唔吸引我買~~淨係買左呢個價值ISK995=62.2hkd既Puffin磁石~真係唔平呢~





個出海tour係12:30出發~我地12:25到碼頭~首先報到先~發覺我地係最遲到..個個已經換好哂衫~~好驚~~~記得人地約你12:30...其實係要準備好哂所有野已經出發~~~~~唔好好似我地咁呀~~~最好提早15分鐘到啦~~~




然後佢目測大家既身材搵一件岩我地著既衫~~已經著到XS~~但仍然很大件~(難得的是我都著得落~)....我地本身裏面已經好多衫~





呢班人係咪仲以為自己好醒?其實係外國人眼中我地4個可能好似侏儒XD




好野~今次終於坐到橡皮艇喇~~~~~我無記錯...好似係我第一次坐橡皮艇呢~~~~唔好話我唔提大家.....搭呢種船....食定暈浪丸出發是必需的必需的必需的!!!!!!!!!!!!!!!!!!!!!!!!(因為很重要所以必定要重覆說3次!!)




咦~架船竟然坐唔滿~我地最尾上船~所以我地坐係船尾好鬆動~兩個人坐3個位~




上左船之後靚女導遊就向我地解釋要注意既事項~例如開船中就唔可以站立同埋行走~




好~出發~~~~~~~~~開緊好快哥時幾好玩~因為佢首先要坐10幾分鐘出到去深海~




坐左好一陣~就迎來第一條鯨魚~其實船長去到深海就停低~再用佢驚人既視力一見到就即開快艇行到最近鯨魚既位置停低~~~~~都幾近呀可~~





通常一見到佢都係見到佢噴水啦~背鰭啦~尾巴啦~重覆一兩次咁樣上黎抖氣之後佢又再深潛落深海架喇~









你點先知佢已深潛?就係當係見到水面有一大撻好平...好似撻油污咁樣~咁代表佢已深潛落海暫時唔上黎住喇~~大約6至7分鐘後先會再上黎~(但唔知佢已經游左去邊個點上番黎~)




之前坐大船就回程時派好似洗碗水咁既熱朱古力俾大家飲~今次俾多d錢坐橡皮艇飲既野都高級d~~~有傳統冰島酒飲~~幾好飲喎~~~~~甜甜地的~但酒精濃度都幾高~~~




4個入面得我一個飲....佢地兩個唔飲唔奇~因為佢地平時都唔飲酒....毛寶都唔飲喎......事後佢話：我當時好想嘔~...........其實隻船一無野睇時會關引擎靜止係海...都幾拋下...(大浪嘛)......有哥時先開引擎去追~~好彩有食止暈丸~~唔係就慘喇~..我就係唔舒服既...但你知啦~食左呢d藥就會好眼訓....我同大比兩個常常在靜止時伸直隻腳訓左~.....阿Sam說：唔怪得望過黎你兩個個姿勢咁怪啦~~~~




同公司的另一艘大船~




俾個短片大家睇睇~~~鯨魚真係好可愛~

原來有幾次我地係睇緊同一條鯨魚架~







點解佢地會知係同一條?因為原來佢地既尾巴就好似人既指模一樣~所以睇尾巴就知道佢地係邊條~每年佢地都會統計有邊幾隻會番黎呢個海域~有幾多條係新黎既~~張相影得巧近~




阿Sam影得條魚尾好粗壯~~




好咯~睇埋最尾呢次上水喇~(其實我覺得佢地既噴水好可愛~<3)





回程喇~我同大比終於醒喇~




原來頭先我地睇既都係同一品種既鯨魚~叫Humpback Whale......同上次黎睇既都係同一品種~~~~好想下次睇d大隻d既品種~(貪心)






噚晚我已寫好公子哭福袋篇唷~
聽日會準時出哭福袋大派笑彈送禮物俾大家唷~
大家記得來看~



2015/12/16的開心事：
今日見到毛寶~好開心~
然後我依家同佢一路講緊電話..一路打緊blog
佢係電話話我：你好大隻!
好多謝你今日對我既稱讚<3



報時：距離台北跨年倒數之旅2015仲有---14日~
報時：距離南美洲4國新奇探險之旅2016仲有---63日~
報時：距離"七公子"帥帥出使東京之旅2016仲有---289日~