2014年5月13日 星期二

澳洲探險自由行之旅2014-03-27第六天Part 1(雨天)

唉...我真係好憎幫d曳既小朋友做申請....今日有個仲曳到將我counter度門玩黎玩去仲"珊"埋佢....咁俾出面d客見到會點??????佢仲曳到跑黎跑去勁嘈...我已經出聲話佢:小朋友...你好嘈...嘈到影響隔離櫃檯做手續...麻煩你係出面d櫈度坐下等一陣.................佢阿媽輕輕話左佢一次...之後佢繼續係咁嘈..............曳到.....之後我叫佢媽媽....請爸爸入黎簽個名......佢阿媽叫左個老公3次...佢老公仲未入黎....最後阿媽話:你唔好同佢玩住啦入黎簽名先啦人地等緊你架........大佬呀.....你係出面同你小朋友玩又唔影響人我唔阻止你...問題係依家出黎係做緊正經野呀...阿先生....唔係成個世界圍住你家人轉架......小朋友咁曳一句都唔鬧......真心覺得你唔識教佢你就咪鬼生啦....害佢一世呀....帶住個咁曳既小朋友出街我會覺得好無面!!!不過睇佢阿爸咁(一入黎就串串貢).....終於明白咩叫身教....係呢度做真係見識好多曳既小朋友....以前讀書好鐘意小朋友...仲想像好想生一個似自己既小朋友....依家係越黎越唔鐘意!!!



2014/03/27
Day 6---Part 1(塔斯曼尼亞,朗塞斯頓  Tasmania,Launceston->西北地區 North West Coast)
噚晚係超市買左幾罐頭...今朝就要黎夾麵包食~(唔知點解...我都係覺得地捫粟米先係最好味~)...不過澳洲d牛奶真係好飲~
x梨仲未食哂~~~~~~~




今日一起身就落雨喇(泣).....睇個天色好似有排落咁添...仲要幾大雨下~




又有美麗既樹隧道~




今日既第一個景點係41 Degrees South Salmon Farm & Ginseng Farm....地址:323 Montana Road, Deloranie, Tasmania 7304, AUS....電話:+61-3-6362-4130....網址....落車時雨勢都幾大!!成身濕~




呢個係一個三文魚養殖場....亦係一個....人蔘養殖場!!!!完全估唔到呢兩樣野點解可以...一齊既?!?!同埋澳洲既人蔘又好似真係未聽過~(係我孤陋寡聞咋~)




一入黎又有得試食~不過女仔講得好鬼快同埋無乜表情~我食左覺得麻麻~其實我黎呢度之前一直以為.....係食煙三文魚或者三文魚刺身添~~~~(朗公子隨身己帶wasabi和豉油)..點知係急凍的三文魚同埋三文魚醬~興趣麻麻~






其實佢呢度可以俾錢參觀的...點養三文魚之類...仲有個濕地公園的...不過呢日落咁大雨...都係唔好搞喇~對三文魚產品又無咩興趣~(其實都唔知點拎...要冷凍的...我知佢有得代寄番澳門....但我懷疑郵費仲貴過佢條魚!!)....但其實試過佢d有人蔘味的香料唔錯的~唔知點解我最後無買~~~




但係揸到車黎...無理由咩都唔做je....我地就叫左個41er Salmon Burger試試....AUD8.50=59.5hkd.....揀左Dill Mayonaise呢個醬襯呢個包...食落...咦~~~又幾好味喎!!!d三文魚整熱左黎食真係唔錯~~~仲有其他三文魚既菜式~~可惜出黎之前食左早餐....團友們話飽食唔落(我就梗係食得落無問題啦~).....如果唔係真係叫埋其他試試!!!




離開41 Degrees South Salmon Farm & Ginseng Farm之後~10分鐘左右既車程就黎到呢個神秘團友好期待既The Honey Farm~地址:39 Sorell Street, Chudleigh, Tasmania 7304, AUS.....電話:+61-3-6363-6160....網址...外牆很可愛~~可惜下大雨的~




呢度有好多關於蜜糖既野賣架~蜜蜂造型都有~




亦有護膚品~不過唔算太平~又唔知岩唔岩自己~所以無試~




重點梗係有好多唔同既蜜糖買啦~~~真係有好多~呢度只係一部份咋~




而且一d都唔姑寒呢~多達50幾種蜜糖任試唔嬲~不過唯一唔好既係...當你試到第5隻時...又無水漱下口....你會覺得...試黎試去都係試緊同一隻味~毛寶醒目仔呀~攞左水落車~




發現有好多好搞野既味~呢四個係好正常~我認為最好味係Leatherwood同埋Blackberry~好清甜的~




以下都係俾我認為係搞事類既蜜糖味道~哈哈~生果味都算....果仁....甚至朱古力蜜糖....杰到呀~~~我諗都係查麵包食多~








我想知呢d一塊塊係點食既呢??




另外有一隻味都好騎呢架~~~呢隻好似蠔油咁色既Buckwheat....超難食.....有團友話好似食緊屎咁XD...仲要有回甘味~~~但問題係:團友你有食過屎咩?你又知屎咩味?!?!?




仲有d介紹蜜蜂採蜂蜜的小介紹~裏面真係有蜜蜂架~~仲有條小隧道俾蜜蜂飛出去採蜜(呢~箭咀指住架~)




呢4隻蜜糖堅搞笑!!!係辣味的~~~第一野就試Red Chili....諗住佢係最辣既所以試佢~點知...........................係臭狐味的.....真係好臭...你想像下將臭狐放入口係點~~~~




我最後只係買左Leatherwood同埋Blackberry味~仲買左杰d既Creamed Leatherwood~因為我想一匙匙咁食~~唔使沖水的~左邊大裝係AUD8.50=59.5hkd....右邊小裝的係AUD5.50=36.4hkd....其實價格我覺得真係一d都唔貴~因為澳門d澳洲專門店或者超市買都幾貴的~我買左細哥d~因為好送禮~加上易拎d無咁重~之後先知原來係Tasmania先有Leatherwood既蜜糖出架~~真係無買錯~好味~




仲有雪糕賣喎~~~無食芝士廠哥個~都要食番呢個補下數~




AUD3.90=27.3hkd....hehe~我又係叫左Leatherwood味~~唔錯喎~又係清甜類~值得一試~呢度有蜜糖Nougat賣~不過小小的一盒已經好貴(好似要成百幾蚊hkd)....加上...我覺得唔係幾好味~所以無買~







係呀~~~

我今日睇唔知邊度報紙講既...
話係31/5-8/6期間...
又有之前光影大三巴既節目做喇~
之前試過一次係大三巴.....另外一次係塔石衛生中心
(有興趣可以睇睇我之前的blog~禁上面的變色字可直接Link到過去~)
又係每日兩場....8pm同9pm各一場~
之前有blog友叫我再有既就係度提醒下佢~
但我唔記得左邊個~


2014/05/13的開心事:
番工既人..事..物..同埋d客係搞到個人越黎越灰..
但總要搵苦中一點甜的....
好開心星期六會過香港鬆一鬆~~~
今次仲要過夜添喎...
十世未試過~~~~~
希望食好多好多野啦~~
(同埋希望唔好落雨啦~~求求你啦~~)



報時:距離日本東京自由行之旅2014仲有---40日~

50 則留言:

  1. 你星期六黎呀? 果日既天氣預報暫時係密雲, 間中有陽光既, 星期日就天晴. 祝你好運咯.

    回覆刪除
  2. 無錯,真係唔鍾意過度活躍嘅細路,有時响街見到d阿媽係咁駡,但個細路好似聽唔到咁,見到都覺煩!!!!!!!!
    去旅行最憎落雨...............
    d honey好抵呀,不過就咁食會否太甜,不如用嚟'茶'麵包or餅干好d喎
    臭孤味食入口,我仲未想係到係点............

    回覆刪除
    回覆
    1. 係啦...真係好煩呀......個阿媽肯鬧都好...最怕細路咁曳佢仲覺得好得意............
      哈哈~我都好憎~不過遇到又真係無計~
      唔會呀~我係winnie the pooh黎架~好鐘意食蜜糖架~(我係講正常哥d~古怪味哥d唔會~)
      哈哈~~咁推介你試下~好正架~

      刪除
  3. 噢..... 我真係未試過LEATHERWOOD, 可能跟MAPLE差不多.

    回覆刪除
    回覆
    1. 哈哈~~咁唔通真係tasmania先有既~~

      刪除
    2. 是的, 只有TASMANIA才有, http://en.wikipedia.org/wiki/Eucryphia_lucida

      刪除
    3. 華~真架~~我依家即刻去食番匙先~

      刪除
  4. 咁多款蜜糖真係大開眼界......
    個栗米包好唔好味架?????
    喺香港過夜去迪士尼呀?

    回覆刪除
    回覆
    1. 係啦~我都係第一次見~好新鮮既感覺~
      梗好味~我整架嘛~
      唔係呀~我地去離島~

      刪除
    2. 你整架?難怪咁咩啦
      離島好猛x架.......嘿嘿

      刪除
    3. 食屎啦你..好野都唔識
      好猛都唔關我事...我住市區酒店

      刪除
    4. 咁係呀嘛,似整蠱人,又似賭輸咗就食哂佢嗰啲嘢食
      離島猛,市區仲猛呀......你唔住朋友度點解唔住離島?真係好過市區啲酒店,又貴又盛?

      刪除
    5. 咩呀~算啦~你未食過又真係唔知我整野有幾好食既~唔怪你~
      下...其實長洲個價同我係灣仔個價一樣咋

      刪除
  5. 首先歡迎妳地過嚟!
    過夜住下無咁趕,天氣會好番,
    有乜重點活動??
    我都最怕死仔,
    一定忍唔住打巴佢地,
    哈……我好無愛心
    旅行買蜜糖做手信至正
    接骨木都幾好味,like

    回覆刪除
    回覆
    1. 好耐無黎香港玩~
      無咩架~過黎行下食下野咁囉~
      哈哈~~我同你一樣~~
      講野都一樣~又係想一巴..............哈哈~~~~
      係呀~我覺得幾好~又好味~又唔貴~

      刪除
  6. 嗚嗚嗚 人地唔係香港你就過黎 HEHE
    唯有再等下次 XDDD
    我聽朝飛啦~~~ <3

    回覆刪除
  7. Leatherwood嘅味道係點㗎?琴晚有冇睇「走過足球聖地」,佢哋今次去南美+歐洲,仲要坐business class,簡直係大家嘅夢想呀。我同佢講,就算坐econ,咁嘅行程,機票都好貴。

    回覆刪除
    回覆
    1. 唔~隻味幾清甜~我幾鐘意的~
      我有睇少少啦~但無睇佢地坐飛機~
      會唔會係俾佢地影完business....其實佢地鏡頭後係坐番econ架~~~~~~(我成日都咁諗~~)

      刪除
    2. 吓,我諗唔會咁衰掛,話哂新航贊助,仲要坐幾十個鐘飛機,坐business唔算過份啫。

      刪除
    3. 哈哈~~我都係講下笑咋~~~

      刪除
  8. 個隧道好美丫~毛球試蜜糖個樣好認真丫:目

    回覆刪除
    回覆
    1. 佢d路都幾多野睇~
      wakakak~可能佢試緊d怪味~~

      刪除
  9. 想食好多好多野~~~食肥妳呀

    回覆刪除
  10. Hi小t.首先!是我想去睇光影大三巴呀!但31-5至8-6月呢段時間我都唔得閒過澳門呀!為有等下年先喇!真係唔該哂妳喎!星期六過來香港玩呀!是否去迪士尼玩同住迪士尼酒店嗎?d密糖造型好靚喎!妳都有買蜜糖返澳門做手信喎!小明友曳同乖是睇下個父母點教佢架!所以妳唔使咁激氣喇!星期六、日過來香港玩得開心d同食多d美食喇!bye!!!

    回覆刪除
  11. 見到D蜂蜜就流晒口水*_*好想試呀~~
    攞泥搽麵包當糖咁用一定好健康又好味T^T
    呀我今日返工做SALES都有個3,4歲既小朋友係咁跑泥跑去
    我同佢講唔好跑,跑泥跑去媽媽揾唔到佢
    點知佢攬一下媽媽之後繼續跑=.=
    如果可以的話...我好想大聲鬧下佢...
    但E家好多父母都唔理D小朋友跑泥跑去同玩,唉~

    回覆刪除
    回覆
    1. 我都幾鐘意蜂蜜的~
      我鐘意一匙匙咁塞入口食~
      最弊真係唔得鬧佢....尤其是我地呢d服務業...輸硬的~
      我最憎係食野地方見到小朋友跑黎跑去同玩...好危險架嘛.....拎住熱野食

      刪除
  12. 急凍三文魚..係咪好硬.大無味架?哈哈
    另外...honey都好滋潤架..飲多d對皮膚好^^
    不過如果臭狐味就.....諗起都怕怕^^

    回覆刪除
    回覆
    1. 好鞋囉~都唔識形容~但係熟食又幾好味喎個漢堡~
      不過有時我又懶飲~我會就咁食一匙~
      wakakakka~可能我形容得變態左少少~~~

      刪除
  13. 臭狐味都比你食到.... HA HA

    回覆刪除
    回覆
    1. 點呀~要唔要黎試一口呀~~~~><~~~~

      刪除
  14. 小t今次好叻呀,出遊記出得好快,等我搵日安坐家中慢慢睇番你啲遊記^^
    我尋日都見到話會有光影大三巴,即刻睇下有無package,但係好多酒店都full晒,又或者好貴,唉 灰晒 =="

    回覆刪除
    回覆
    1. 哈哈~~我已經出得慢左少少~~~已經俾人催到我甩褲~~~~哈哈~佢地話驚我去日本前寫唔哂~~~
      full哂~~咁犀利??!?又唔係咩假期喎~

      刪除
  15. 哈哈,臭狐味,好搞笑,小t你有冇試真架?

    回覆刪除
  16. 你個早餐包好趣怪,有無醬架?
    哈,俾個位你話我先,蜜糖我都唔太LIKE架,剩係鍾意燒嘢食時勁搽,我認我係偏食鬼,呵呵。
    咁好,過嚟玩,唔知我地有緣會撞到呢,hehe

    回覆刪除
    回覆
    1. 裏面仲有吞拿魚架~~~不過粟米太多~~~
      wakakkaka~你係偏食鬼呀~~~~我鐘意成匙蜜糖咁食的~
      哈哈~~可能有機會撞到架~~去成兩日咁多~~~見到我記得叫我喎~

      刪除
  17. 有少少陽光都好過冇呢ღ*゚好過天天落雨濕濕ღ*゚悶得很呢

    回覆刪除
  18. 我都係最鍾意地捫粟米,三文魚又啱哂我食啦!

    回覆刪除
    回覆
    1. 係呀~~呢隻牌子最正~
      我依家都好愛食三文魚~

      刪除
  19. 依家D細路好難搞,打又吾得,鬧又唔得...

    回覆刪除