和歌山嘆溫泉自駕遊之旅2018-06-21第四天Part 3(微微雨及後轉晴)

星期五....唔算多野做....感恩~放工去左百老匯食度小月...食完好口渴~星期六....中午食左Terra~~又食佢個辣魚pizza~~夜晚即將掛8號風球…但呢日中午勁好天…令我覺得好拿恐怖…下午去左探八寶少爺~好可愛呀~~~~~~~然後去左MGM寶雅座為毛寶慶生~~我地將呢日既活動時間提前~~你知啦..夜晚打風丫嘛.......好驚呀!...星期日.....中午起身已是10號風球…從未試過有一個10號風球掛咁耐…好驚呀…媽媽煮左辛辣麵食後我地就躲入房…不敢在廳坐…係床坐時感到明顯的左右搖晃…我好x驚;(…下午開著延禧一路吃熱浪…收到公司whatsapp谷明天不用上班…由於收到各地區出現陸續停電…所以我下午已經沖好涼洗好頭…媽媽仲醒到煲好飯…夜晚食飯加辣魚加毛寶買的酸蘿蔔…食飽飽晚飯又睇延禧…星期一…今天不用上班…早上起身頭有點痛........說好今日上來報平安的~大家blog友好嗎?...見到今日香港番工好立立亂....希望港澳都快快好起來!



2018/06/21
Day 4---Part 3(日本,和歌山縣,串本 Japan,Wakayama Ken,Kushimoto->那智勝浦 Nachikatsuura)
好啦~行完便利店~就去我地呢晚既酒店啦~~~~~~~我地今晚住溫泉旅館丫~~~~~~呢晚既溫泉旅館叫南紀勝浦溫泉かつうら御苑....地址：和歌山縣東牟婁郡那智勝浦町北浜海岸.....Mapcode：324 773 555*72......由那智の滝過黎大約20分鐘內的車程~




我地黎到既時候仲未到最早check in時間(3點前來到)....於是前枱服務人員就請我地先在大堂坐坐~目測大堂既裝修有點老舊~







坐左一陣reception已經幫我地check in喇~~~我地咁早黎真係勁唔想發生上一間溫泉旅館既慘事(迫我地早食飯)...細心解釋呢度有咩設施~(好搞笑個溫泉明明係一樓..但如果你住一樓你要搭lip上二樓然後經某條樓梯再落一樓溫泉~




有個姨姨帶住我地入房~~~其實房入面已經準備好浴衣俾我地架喇~~~不過佢都問下你想著咩size~~~~~~




我地訂既房係一樓架~~不過行過走廊時覺得好舊同埋有d異味~~~





我同毛寶間房~





一入去門是緊閉的....這個少女真神秘~一開門就係鞋櫃右邊是廁所~




WOW!!!!!!!!!!!!!!!!!!不錯呢~~~~~望海的很舒壓~~~




我地呢晚Book左｢月読～Tsukuyomi～｣ 露天風呂付客室 和室タイプ....一泊二食...兩人一房....每房每晚54,000円=3,321hkd....每人每晚1,660.5hkd~




電視哥邊~




呢次我醒呀~~~影唔到塊鏡入面有我~洗手盤同廁所分開~




浸溫泉既毛巾同索袋等備品就係洗手盤旁的架上~




洗手盤對面有茶具~呢度既設計都幾新式~同佢大堂與走廊好鮮明既對比~我心感安慰~




廁所係頭先一入門口右邊既位~細~但我痾得也舒暢~




房內一早準備好的浴衣與襪仔~(好重要既襪仔~因我不想赤腳踩溫泉腳店的皮拖鞋~)




重點是推開露台門行出去.....神神秘的~




向海的私人風呂呢~~~~~




左邊有櫈向海嘆世界~右邊有沖涼設備~





風景真的不錯~




其實入房既時候姨姨介紹左間房俾我地之後仲整埋茶入黎~~~~先生太太都好滿意~





呢個私人風呂係先生太太間房入面既~同我地哥個有d唔同~佢地有棵樹係度~講講下我諗起.....我地係第一批入住既人!check in完仲未有第二批客人入住...不如快d執野去浸溫泉先咯!!!!!!!!!!咁咪唔使同人迫囉~~~~~




火速換好衫~~~出發~~~~~~(毛寶你矇眼是正確的).....最搞笑係男女都係同一隻花~




係一樓搭lip上二樓再落樓梯落番一樓~咩慨念~




休息區有按摩椅~但要入錢~




女湯~又同毛寶爸分別~我地發現佢已經好自得其樂~~




由於我地係第一批入住~~~仲未有其他人黎~~~又早早放低野就出發黎浸~~~所以係一~個~人~都~無~~~~~~正呀~~~





室內風呂和淋浴設施~




獨霸!!!!露天風呂~~~~~好正呀~~~~~~~~~~~~~





向海的~不過呢日有d熱~~~~我都係想凍冰冰浸多d呢~




(呢張圖片from官網)夜晚咁樣睇都幾靚~




浸完就番房慢慢嘆啦~~~~~明明今日有食中午架喇喎~點解仲係咁肚餓既~~~~~




沖左d茶飲飲~佢有西式既假果味茶包~(我最憎)....日式茶係茶葉唔係茶包!!我鐘意~仲有攞我地係便利店買哥d零食黎送茶~好嘆~





呢個係房入面既茶點!!!好少有咸既茶點!~~通常都係d甜椰椰既野!!!好好味好驚喜~




食食下茶點睇到電視介紹澳門~~~~~~感覺奇妙~




食食下望出出面.....下?!頭先係三重塔時仲落緊雨架喎...家陣係極度藍天白雲既?!




勁靚!依家望過對面山d山勁有層次!!~~~~







頂!!!我終於係溫泉旅館睇到日落喇!!!!!勁感動~~~~







對住呢個環境呢個天色浸又係另一番風味~但我唔浸喇~我地岩岩先沖好哂涼舒舒服服咁~聽朝先寵幸你~




好喇~~我地約左7點食飯~~~準時黎到同我地間房好近既餐廳十六夜~~~~我地訂哥間房有得係餐廳自己個室用膳~~





一入房.......wow!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!有個好雷既錦盒喎!!!!!!!!




冷靜d先~~~~~睇埋今晚餐牌先~~~~~~我地訂房時order左月宴~




我地慢慢咁將個鏡頭拉番埋黎個錦盒度先~~~~~打開左個蓋.....諗住一層層咁拎起佢....睇下佢有咩野食架嘛~~點知...





原來唔係一層一層咁拎起架喎~~~~~~係咁樣拉開架~~~~好靚~~~~~~好精美呀~~~~~





由於我地華左好耐~~~又玩左好耐都仲未捨得食~~~於是serve我地哥個姨姨(即係頭先一check in為我地介紹間房哥個)....話要幫我地拍拍合照~~~~





實在係太精彩喇~~~~繼續影~~~~~






我叫左備長炭梅酒~~1,000円=61.5hkd(一支).....又幾好飲喎~





毛寶叫左熱既sake~~~760円=46.7hkd(一合).....幾平~~幾好飲~~~




飲啖酒~~開始食啦啦啦~~~~佢個餐牌順序係用幾多月幾多夜咁介紹~幾得意~我無望餐牌~按照佢一層層既順序黎食~~隻磯煮鮑魚同埋粒梅我都記得幾好食.......但我有少少無用....食完呢個錦盒....我.....有少少....飽....................................







我地特登揀個有伊勢海老既餐架~~~~~~~~~~~~好興奮呀~~~~不過兩人share一隻黎講.....又細左d喎~~~~~但係好鮮味呀~~~~~






刺身全都不錯吃~~~~~~












兩老都好滿意~




呢個鮪頭肉蔥間鍋~d魚肉爽爽的...以為自己食緊其他肉類~個湯好飲~




呢個唔知係咩烤魚....條魚既味係幾好食既!但我覺得佢上面個汁唔係太討好!




食d溫泉會席料理咪通常都有個咁樣用碗裝住既...入面有d杰杰汁煮既野既.....每次食親呢味都好難討好我~~因為有舊野個質感硬係覺得怪怪的~個人喜好問題~(是用道明寺粉整的糰子嗎?)....呢個係山葵道明寺(道明寺係白色哥舊).....咁呢個有wasabi味都算係幾得別既~





呢個比較西式...有兩粒煙三文魚既物體....(其實我已經好飽)......舊青瓜真係切得盡顯刀功~~~





呢個白魚仔既天婦羅~~~~好好味~~~~~





d會席料理食到最後梗有個飯or麵俾你再壓壓個肚~~~~~(我盡力食啦~~~~因為真係太多野食喇~~~)...圖中兩個飯唔係4人分呀....呢度係二人架......好驚呀~~~~




勁爆香!!!!係和牛飯呀!!!!!!好好味呀!!!!!!!!!d配菜都好好味呀!!!仲要每人有超多~~~~






甜品....敗筆...勁甜.....蜜柑慕絲既物體...我無食哂~生果就好味既~個晚餐係屬於中等既....但個錦盒真係攞滿分~最好味係伊勢海老和和牛飯~~~~刺身也不錯吃~




番到房就已經鋪好床啦~~~~~~~~我10點已經超眼訓~訓先~gd nite~








今次個強颱風"山竹"....
10號風球掛左9個鐘...
真係好恐怖.....
有左上年天鴿慘痛教訓...
大家防範意識高左...
(雖然我唔明點解有人會係10號風球下係大橋頭觀浪)
政府處理好左好多....
(亦都唔明點解有人唔滿意避難中心會無杯麵食)
仲有博企開放轄下停車場俾市民在颱風期間免費泊..
仲要多謝哂全部前線人員!!
我地7公子同家人都平安呢!
多謝blog友們關心~

(希望唔好再有超強颱風黎港澳喇!)



Supper星期五出左演唱會主題曲!!!
叫"撼動".....
聽左兩次......
我暫時未有太大感覺~



我睇完延禧哥70集.......
前45集都係精彩萬分既...
後面就覺得搵戲黎做~
好喇~我可以專心寫blog喇~
(但明玉和傅恆還是讓我的心揪痛了一下~)



2018/09/17的開心事：
今次颱風還是有很多人互相關心!
很有愛~多謝大家關心我和7公子~



報時：距離與毛寶慶生泰國食揼嘆之旅2018仲有---10日~
報時：距離天團蘇格蘭高地之旅2018仲有---26日~
報時：距離鳥取自駕遊之旅2018仲有---74日~
報時：距離與三大長老聖誕台中遊2018仲有---95日~