2017年8月7日 星期一

中午飲茶+我的生日會2016@麗軒

星期五...咦..今日做又唔算辛苦喎~放工又去左食御瀛個龍王煲~之前$198...依家$218~都好味既~臨時臨急約公子飲野~4人成行~去左St.Regis~但無左我之前好鐘意食哥杯野~又叫左杯觸礁野...命運呀~星期六.....中午食starbucks~之後去左某酒店...走去join左佢地做運動既會籍....哈哈~join左一個月..試下先~夜晚食左16蒲個中餐...依家有推廣..8道菜$198(好似有visa卡再有8折)...係幾抵...但唔算太好食~....又去左探菓子軒~....星期日一早起身就去左做運動啦~幾乖~(一路做運動一路睇住sunny先做到~~)....做完運動就去左食興記~食飽飽又番屋企煲劇~夜晚同chlo子食風味居~星期一無啦啦番早~放工又去左做運動~~幾乖~但唔知乖得幾耐~夜左番屋企先出blog~有無人等緊我先~我知有人掛住我我先出架~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



好喇~今日講既食記就係舊年勁想試左好耐既麗軒.....位於澳門麗思卡爾頓酒店(Ritz Carlton)51樓....電話:8886 6712.....其實我第一次去食係Diana去食生日飯既~第二次就係同毛寶同媽媽去飲茶~都叫試過下中午同夜晚....但一黎講第一次既晚餐又有點怪怪的~所以由中午既飲茶開始講起啦~




裝修得好靚~入去哥時都覺得幾舒服~係喎....中午飲茶記得要訂位喎.....好似真係好爆咁.....仲要分時段哥下唔好...好似催催貢我飲快茶咁.....黎得酒店就係想嘆個慢茶je~不過事實證明佢係無趕我走既....因為哥日去都唔係好多枱~






因為我夜晚食飯覺得窗口d位對住個景幾靚既~所以飲茶都有要求到...但訂位話只能儘量安排....咁當然啦...可能好多早過我訂既人都想坐對窗既位呢.....最後我地去到...佢真係無安排到窗口位既.......但重點係....窗口位哥日得兩枱人坐.....咁又幫佢諗...可能對窗位佢覺得太細唔適合3人坐呢?(因為上次夜晚去哥時係兩個人).....但我依家睇相又見你set位係set 4人喎~51樓望出去個景係幾靚既~





同場加映...佢地個廁所係出面既...即係酒店廁所....靚酒店即係靚酒店~廁所用品都靚過人~(誤)




好喇~說完廁所俏俏話入正題了~點解舊年咁想試呀?因為佢地岩岩攞左米芝蓮一星丫嘛~~~餐具~




我同毛寶一個飲清香鐵觀音茶一個飲荔枝紅茶(各$28)...茶具方面無咩特別~我之前睇人地去哥時有d好靚既杯揀我以為我地都會有...可能無叫d貴茶所以無卦~我媽媽就叫左桂花烏龍茶 $48....d茶貴就唔貴既~~但係我地每人叫唔同既茶.....有三壺茶放係我地附近張枱....有侍應姐姐幫我地添既...本意係好既...唔使勞煩我~但係佢地添茶唔係好夠勤力....或者唔夠細心.....好多時我地飲哂....或者佢地上菜時我地已經無哂茶都留意唔到......往往要就住飲見哂底先添....咁飲好唔過癮~~~~~~(我又無理由次次叫你添架~我會覺得我自己煩到人)




醬料有辣醬有XO醬...唔知係咪自家制既呢?幾好味~




先上前菜~我淨係記得舊甘荀仔用野醃過...酸酸地幾開胃的~




頭盤叫左紅海蜇頭伴青瓜 $98...不錯唷~




黃耳蟲草花素粉果 $78.....呢個係經理推薦我地叫既~造型係幾靚既~也不錯吃





龍皇金湯小籠包 $88(每件).....貴就夠哂貴喇....成$88粒...我諗係貴在旁邊既龍蝦湯卦~係幾濃蝦湯味...但個湯極度漏~小籠包入面舊肉好鞋......





北寄貝牛肝醬燒賣 $88......舊北寄貝其實同舊燒賣無咩關連.....一齊食又食唔到(好難咬開一半燒賣一半北寄貝咁食).....成舊食哂又太大舊...最後要逐樣咬開一半先放入口食.......但溝埋一齊食....又唔係話兩樣食材融合得好好食........好似為左改靚個名而放既北寄貝~





和牛滑腸粉 $98......個侍應姐姐好有禮貌咁問我地使唔使幫我地落豉油.....我地梗話好啦我地咁懶~但佢落豉油從高處落下.....搞到個碟邊都係飛濺出黎既豉油....其實佢d豉油係飛濺到我身前既枱布......查實唔係幾美觀...加上如果個客係白色衫....會容易整污糟~$98一碟腸我可以要求多d卦?講克豉油....個和牛食落口幾鞋既....腸粉個皮係滑但係幾厚下....我個人麻麻~




蟹肉蘿蔔千絲酥 $68.....入面幾好食..因為有蟹肉同埋芫茜係入面~不過外皮還是玥龍軒的做得好吃~






牛油梨芝心蝦春卷 $78.....完全食唔到牛油果係入面...淨係食到芝士味....仲要係勁漏既芝士味....食左一條...有d漏到反艇~如果佢無改進同呢個一樣....我不推薦~




其實今次我係為左呢個而黎~蛋白蒸鮮蟹鉗(每隻) $398....我訂位時有問到佢使唔使訂蟹鉗..佢話唔使~除非你一次過叫大量先要~華~又係幾大隻下喎~




到底有幾大隻~同呢個blogger既小顏比比就知了~~~真係好大隻呀~~(俾d歡呼聲我~)....同埋呢你地有無覺得呢個blogger都幾靚丫~(進入自吹自擂mode")




同埋佢d蛋白吸左d蟹汁好好味~~




happy~我幾乖呀~我請媽媽黎飲茶架~希望帶你食勻世上好味的~




經理有過黎問我地d野食點既~我覺得蟹鉗同埋佢推介哥個黃耳蟲草花素粉果係幾好食既....但我都有同佢講話個春卷漏到嚇親人~~(其他野食我無深入同佢講呀)....聽完之後佢就送左呢個山楂糕俾我地食話清下個口.....這是服務..呢個位我俾讚!確係解漏~





最後的Petit Four~做得幾精美~個桂花糕仲要係魚型~好靚...而且也好吃~







有銀河會員卡有9折...都叫慳左差唔多$200架~蟹鉗係真係好味既~但呢度中午飲茶d點心真係吸引唔到我再黎.....服務員都係有禮貌的~但細心度不足~經理服務滿分~環境都攞滿分~可惜在食物..........................呢個價錢飲餐茶要求高少少應該唔係好過份~




好喇~眨下眼到夜晚喇~哈哈~其實呢次先係我第一次去麗軒~夜景都好靚~51樓上到黎真係搭lip都搭到耳痛~





第一次黎有窗口位坐~華~好浪漫呀~張枱仲要有玫瑰花瓣~好少女~~~<3





夜晚既醬料同朝早一樣~




前菜~好靚唷~係冷麵~好開胃唷~




其實點左菜之後經理已經問我地飲唔飲酒..我地話唔飲~(其實食中菜我好少飲酒....)......之後又再問...我地都係話唔飲...佢再問我地係因為揸車唔飲定平時唔飲?我有點r頭..心諗:唔通佢好想我地叫酒飲?但應該唔會噃~......我地答佢因為朋友揸左車所以唔飲~跟住佢就好開心咁話:原來係咁~咁今日有人生日咁開心飲少少咁多啦~........原來佢見訂位有人生日.....想請我地飲香檳~~~~~~~~心花怒放~香檳~我鐘~~~~~~~意~上網睇睇....原來呢支Louis Roederer Champagne係法國五大香檳品牌之一.......多謝經理~




多謝你既熱情~請我地飲香檳~~




頭盤我地叫左鍋貼大蝦多士 $138....蝦多士做得不錯~不怕油~配哥個甜酸汁解漏~好味~





蜜燒西班牙黑豚肉叉燒 $258....一入口....只想講...玥龍軒完勝~食落既肉質跟味道....在我心中還是玥龍軒的比較優勝~





麗軒梅菜王扣肉(位) $138...好得意呀~跟個小饅頭~我平時麻麻地扣肉~不過呢個不錯吃~






呢個係時令餸....和牛蟹粉釀波特菇 $288.....當時秋天嘛~所以有蟹粉菜式~我勁鐘意食厚厚的菇~~~加埋和牛同蟹粉~勁惹味~我幾鐘意呢個~~





虎掌菌銀芽炒豆乾 $138....不錯~




花雕竹絲雞炒飯 $258...又真係幾香噴噴喎~好味~





最後既Petit Four因為有人生日~換上小壽包~~~~~好可愛~~~~~本身以為係蛋糕~Diana打電話同佢講時佢話交俾佢地諗~~~點知又真係幾驚喜喎~






當時有中銀卡有8折(呢個係未折價).....其實你同我食飯已經好開心...仲要請左我食餐咁貴既飯做生日...謝謝你baby~~~~~




個飯食唔哂打包....仲要有埋筷子一套咁俾你....筷子仲要唔係即棄哥種!仲有卡紙係食物上面寫明幾時既打包.....非常好~呢次第一次食既感覺好好多.....整體服務(包括侍應都非常貼心)....食物比起點心好得多~~真係唔知點解~飲茶都係揀番玥龍軒好了~








星期五晚寫寫下blog...屎忽痕開左三生三世睇..
點知有哂全集....
然後....我停唔到...喪睇~
我好鐘意夜華望住白淺個樣好冧~
但係對其他女人就木口木面~係愛呀~



2017/08/07的開心事:
今日跑+快行行左3k有多~都算係咁啦~



報時:距離與毛寶慶生快閃台北之旅2017仲有---51日~
報時:距離日本四國自駕遊之旅2017仲有---67日~
報時:距離日本大阪自由行之旅2017仲有---122日~
報時:距離新加坡熱辣辣聖誕節之旅2017仲有---136日~

36 則留言:

  1. 正..正..正...呀...見到也留口水

    回覆刪除
    回覆
    1. 💕開心萬事得🎈╠╣aΡpy週二💞
      好友☁*¨⊹🌙瞓覺囉🌜甜夢🌛💤
       O
         o
       .∧_∧・。◇
       ( ・ω・ )
       |⊃/(___°¨*✬
      /└-(____/★・゚☆
      ๑۩۞۩✾•ೋஜ❉ഐ*

      刪除
    2. 話咁快又星期五喇~開心~

      刪除
  2. 你唔出blog又點留言話掛住呢?
    間野環境唔錯,其他食物d食材同賣相望落唔差,係北寄貝燒賣既組合有點怪。因為北寄貝比燒賣韌好多,好難一齊咬

    回覆刪除
    回覆
    1. 哈哈~~依家咪出blog俾大家留言話掛住我囉~~~~
      係望落唔差囉....我覺得點心真係好普通..唔值哥個價錢~
      係...諗下都知好難一齊咬~

      刪除
  3. 啲菜好靚,睇都覺得好好味。

    回覆刪除
  4. 果然好勤力做運動喎,咁以後有更多quota食好野^^

    回覆刪除
  5. 呢間幾華麗....我覺得妳同朋友慶祝果餐正D..
    乘喎...開始做運動...妳10月一定可以黎香港參加跑步、到時妳就可以見到妳偶像啦。
    努力、加油我支持妳。

    回覆刪除
    回覆
    1. 係!夜晚正好多!中午d點心真係好一般~
      我如果有時間...我係會淨係睇佢個音樂party~~~~但唔會跑步啦~~~雖然3k又唔算好多~~但係係健身房跑同街跑係完全兩回事~~~~我暫時都係唔得~~~~
      但我會努力試下慢慢練~

      刪除
  6. 我都覺夜晚果餐食物正好多呀!蝦多士好似很不錯吃呀!!我而家都好努力做運動呀~跑步加瑜珈~
    星期一我入左黎幾次 以為星期四先有有得睇~好彩今朝再禁多次入黎姐 hehe

    回覆刪除
    回覆
    1. 係呀~蝦多士幾正~~~華!!好勁呀做瑜珈!!!!
      你真係我忠粉~我好~開心~~~~~~

      刪除
  7. 龍王煲《--- 個名好有霸氣吓噃~
    係囉,晚餐飲茶食點心又真係怪怪地嘅~
    北寄貝牛肝醬燒賣九唔搭八,你未講我已諗到⋯
    請你都唔飲?🤣 有專家認為,中菜配葡萄酒效果也十分好,如配搭洽當的話。因為中菜一般比西餐味道較濃烈,容易帶出葡萄酒的特性及變化。<-- 後段我吹架啫,不知啱唔啱架🤣

    回覆刪除
    回覆
    1. 係呀le~都不錯吃的~
      唔係~係一餐飲茶...一餐係夜晚~兩餐黎既~
      個口感好唔夾...又難咬開
      佢開頭無話請架~~~~~~~~~~~~佢一話有人生日我先意會到佢想請我地飲杯香檳~~

      刪除
  8. 越過生日越帥氣喎!哈哈哈

    回覆刪除
  9. 呢度無論係裝修同佢啲食物都整得好靚,有機會我都想同女朋友去試下!

    回覆刪除
  10. 關於斟茶個方面,我都好認同寧願自己慢慢加水,個杯又唔係大,好快就會飲哂,但下下叫人幫手斟都覺得自己煩。
    不過個經理好好呀,樂此不疲咁問原來想請你哋飲酒;食物打包個度又係好體貼。讚!

    回覆刪除
    回覆
    1. 其實另一間玥龍軒都係由侍應姐姐們加茶既...但佢地加得超勤快!所以一黎到呢到...就覺得有落差~
      係呀...所以夜晚第一次食哥時我俾好高分架....先有之後想帶媽媽黎試下!

      刪除
  11. 環境好吾錯呀,窗外景重好靚添,補小t生日快樂﹗身體健康﹗

    回覆刪除
    回覆
    1. 咦~~~你番左黎喇~~~~玩得開心嘛~~~~

      刪除
  12. 好貴好貴呀,但食物樣確係精緻,食吓環境及服務一試無妨。
    但如果佢地有熱水瓶放响枱自己斟更好。
    哈哈join咗會藉通常開頭都好勤力去,唔好三分鐘熱度呀!!
    我喜歡睇呢個blog都係因為個blogger囉,哈哈佢靚唔靚見仁見智喇,但我就是喜歡!!開心嗎^^

    回覆刪除
    回覆
    1. 梗係..佢地家陣身披米芝蓮一星係身上~
      我飲茶時係鐘意飲超多~~~~~~~~
      我知架喇~~~我會勤力d~~~但其實我暫時只係join左1個月~試下先~
      野~~~~~~~~喜歡人既~~~~講出口喇~~~~~~開心^^

      刪除
  13. 夜晚好似吱引好多,尤其係少少9唔搭8嘅蝦多士
    呢個blogger點只"都幾靚吖",簡直靚死人冇命赔啦,我夠膽話係澳門第二美人添呀xx!!!

    回覆刪除
    回覆
    1. 哈哈~我好鐘意食蝦多士架~正所謂唔肥唔油哥d唔喜愛~
      華下...今日咁俾面呀...
      最後哥個xx係咩!!!你講!

      刪除
  14. 咁橋o既,呢輪我都有去做運動喎,仲係同你一樣o既運動。

    回覆刪除
  15. 回覆
    1. 你快d睇多d啦~~~但唔準搶我夜華bb~

      刪除
  16. 酒店裡餐廳有度好, 樓面好高, 不單視覺開揚心情好, 連鄰台飯菜的味道都不會跟自己混在一起, 只會聞到自己台飯菜的香味

    回覆刪除
  17. 枱上咁多花瓣, 還以為有男仕請你食飯, 仲等我為你空歡喜一場添.....

    回覆刪除