毛里求斯渡假+馬達加斯加麵包樹之旅2017-05-20第一天Part 2(天晴及後下雨)

星期五番工還好~一放工又去左做運動啦~幾乖呀可~又係快行+慢跑~再踩單車~晚餐是個火龍果(這人是我嗎?)....星期六中午試左新開既蔬食.好容易...食齋既..但都係覺得八分目好食d~食完之後去買我近期既最愛阿咩lee耕勞(有無人知係咩???).....一路飲一路做運動~今日慢跑+快行4.57km...再踩單車40分鐘踩左11.68km...唔夠...再去埋泳池做運動~大家都知我唔識游水架啦~我係泳池踢水加扮跑步~好正~(但個菠蘿蓋撞到池邊...勁痛)...做完勁肚餓~同埋毛寶和麥公子去食泰潮~hehe~星期日一早起身又去做運動~好認真下呀今次~快行+慢跑5.2km.....再踩多6.85km單車.....出左成身汗...唔使飲去濕茶喇~中午獎下自己去左食文華東方~然後毛寶再幫我剪頭毛~夜晚去左食星際間passion~佢個大沙律又真係幾抵食既~之後去左探菓子軒~好似又大粒左好多咁~星期一番工..係咪隔左個周末感覺..d人感覺特別傻咁既~放左工跑去做運動...慢跑+快行5.16km...單車得2.89km...無周末做得咁爽~可能放工都攰了~番黎屋企食個火龍果~沖埋涼先出blog~所以先咁夜~



2017-05-20
Day 1---Part 2(澳門 Macau->香港 Hong Kong->毛里求斯 Mauritius)
好~再~出發~~~~~~去下個景點~沿路都有好多甘蔗田的~呢個島上面最出名同最主要既農產品就係甘蔗!高高的甘蔗田~




行行下前面有架大巴士...望望下...佢地d巴士都幾舊式...令我諗起細個去秋季旅行坐既巴士~




呢段路勁碎石路(架車又唔係四驅車).....同埋條條路兩旁都係甘蔗田.....都....應該認唔到路....衰婆話當時都有d淆底




華!!!個指示係草叢入面好清淅呀~~~XXD..d草生高d都唔掂~




GPS老點又一例證~~叫我地轉呢個路口但無行唔到~(可能係新擺係度既~唔關GPS事既~)




到達~不過無停車場~相信都係周圍亂泊~但周圍都係狗狗~~~仲要坐正路中心~~~有車都不為所動~~好有性格又夠帥氣~~~~





泊好落車~華~曬得不像話~(呢個小姐真係好煩~曬又話曬~唔好天又話唔好天~)....唔知點解望番呢張相以為係澳門黑沙~




行左一小段路就黎到我地呢日既第二個景點~~自然橋(Pont Naturel)...呀~~~好靚呀~~~~~我覺得有d似冰島哥個!!(不過我未去過~)..呢度超大浪!!(唔通條自然橋就係咁沖出黎既?)...上網睇番原來係真既...."一塊巨型的黑礁石經過海水的衝擊自然形成一座橋..驚濤駭浪接連湧入..撞擊著橋體..發出震撼的聲音"





呢個小孩真係大膽喇~~我唔夠膽呀~~我行到條橋既5分一已經唔敢再行~~仲以為自己行到好出~~~睇番衰公衰婆影哥張相先知自己行得哥少少~~~~




影影下成班人無啦啦走哂!!!估計係一個旅行團~~可以無人任影啦~~~~~





呢種遠距離的愛先係最適合我~





勁大浪兒~~唔怪得可以沖出一條橋出黎~




呢兩公婆真堅挺!!!!夠膽行到中間!!帥!!我覺得行過呢條橋先係真英雄!!




但最好睇既往往就係幕後花絮~就係佢地勁大浪撲過黎敗走~~~~~~(我問番Chlo子佢話當時真係有劣到)




佢地本身想話不過我地四個一齊係橋上面影...叫人幫我地揸機.....我就不嬲膽小架啦......我：唔使客氣喇~........我都話我最適合遠距離的愛架啦~咁合照得架喇~







行去另一面.....呢個海邊位勁似上次去復活島個畫面~回憶又湧出黎~一樣咁大浪~不同的是..一個係面向太平洋..一個面向印度洋~





好啦~走啦~又行番頭先條碎石路加高高甘蔗田走~與甘蔗田合個照留念~





車行望出窗外望下個市面~d鋪頭感覺像回到90年代~




之後發覺已到中午時間~要去食mum mum啦~漫無目的咁揸到去呢個超似外國d大型商場咁(感覺似去左美國咁)....超多免費泊車位等你去消費.....見到有Nando's嘛!!!咪停車食食囉~另外附埋Nando's Mauritius網址俾你~自從係澳洲食過之後...念念不忘......之後係馬來西亞都有見過~佢都幾多分店喎~24個國家都有佢分店~希望佢係亞洲會有多d分店啦~咦....咁突然咁陰天既?




呢間連鎖餐廳係食燒雞既~~~~~~燒雞仲可以揀辣同唔辣~仲有辣度揀~




叫d野飲先~我都好乖唔係成日飲凍野架~但呢度太熱~所以我要大解放~~~~我叫左最右邊哥杯Refresh Mint....係我最鐘意既重薄荷味~~~~~好好飲~~~~~毛寶叫左中間哥杯Mango Mambo....衰婆就叫左左邊哥杯Citrus Bliss......每杯各Rs120=27.3hkd~




我地要左Whloe Chicken~Rs590=134hkd.....我地揀左Mango and Lime口味~成隻雞才134hkd~~抵~~~我地仲叫左個Regular既Side Dish~(好鬼仔呀我~).....哥碟係Pumpkin Squash & Grilled Corn....Rs85=19.3hkd...又幾抵喎~甜甜地既南瓜同埋粟米~好味~我幾鐘意食~燒雞超香~~肉好滑~~~我好鐘意好鐘意好鐘意食~(如果澳門都有就好喇~)




佢另外仲有支辣醬俾你點雞食~但唔點好食d~呢個醬幾辣下~




梗係要食少少菜啦~我地係好健康架~叫左Mediterranean Salad....Rs180=40.9hkd....都幾抵食~~~(不過其實唔係好多料~得d菜菜~黑欖~芝士~)




仲有梗要叫d澱粉質填一填肚肚~Garlic Bread.....Rs85=19.3hkd......又整得幾好味喎衰鬼~




毛里求斯第一餐~好好紀念一下下~





4個人食左Rs1,380=313.5hkd...每人78.4hkd.....算唔錯啦~




呢度都幾多野行~不過d牌子唔岩我~




不過就要去超市買飲用水囉~呢間Jumbo勁大~~~(毛里求斯水喉水不能直接飲用的...費事水土不服添呀所以我地穩陣d都係超市買樽裝水再煲黎飲~)





望落好似好多野睇咁~~華~好多酒呀~不過無得慢慢細睇~因為我地依家趕往下一站先~因為天氣唔好呀~同埋想早d去酒店check in~




下一站就係鹿洞火山口(Trou Aux Cerfs)....個天好黑呀~~仲有少少落雨~~鹿洞火山口係一個休眠火山口~~~周圍有好多樹呀~草呀~生左係度~令我諗起去復活島哥個火山口~都好靚架~上呢個火山口段路都幾斜下...但兩旁又有超多民居喎~




呢個細個復活島哥個火山口~本身我地想圍住個火山口行一圈~~但雨越落越大~~唯有沿路折返(呢度超多人跑步~試想下....對住個火山口做運動...係幾咁招積既一件事?)....





行去攞車期間望落山下....舊黑雲大到~我諗哥區一定落緊極大雨~




好囉~走喇~呢日都跑左3個景點~好滿足~好啦去酒店喇~好像一路駛向海邊~~個天又好似光番少少喎~




我地架車駛到去酒店~就有人敲鑼鼓迎接~~哈哈~我地將會係呢間Hilton Mauritius Resort & Spa度住3晚~地址：Wolmar, Flic-en-Flac, 90503, Mauritius....我地係經Hotels.com進行預訂~




依家帶我地去check in先~




佢就請我地坐係佢地個Bar度等佢幫我地check in~我第一次住Hilton咋~




望落下面係餐廳~對開仲係Hilton個沙灘~望落好似幾開揚~




同埋好似第一次舒舒服服坐係度等佢幫我搞好哂check in d野~我平時係窮人~通係企係reception度等check in~等緊既時候仲有welcome drink~~~~~~~睇下我幾大鄉里~~呢杯野顏色靚仲極度好飲~~有點點益力多味咁既~四個一致認同好飲~飲勝~順利來到第一間酒店~





等緊既時候再影下佢個Bar啦~坐係呢個位飲野幾靚~咦..突然藍天既~




佢個沙灘和泳池~





但其實另一邊個天仲係咁架~




好喇~搞掂check in~有房喇~咦.....明明要求左要adjoining room架喎....點解佢地住係一入酒店哥層...我地就住下一層既?......不過後尾知道佢地間房行到超級遠!!!!!!!!!!!!!!!!!!(原來呢間酒店真係幾大~)....我地就住落一層~但一落樓梯第一間房就係~方便~....房價...兩房三晚11,132.76hkd....每房每晚1,855.46hkd...每人每晚就927.7hkd....華...我好似未住過咁貴喎~一入房~咦~又幾大喎~感覺良好~冷氣夠涼~





廁所都超大~~~~但缺點係沖涼水壓唔係好夠~





我地住落左一層其實一行出去幾步就係泳池哥度~所以都唔錯~





呢個係衰公衰婆間房望出去個景~




有welcome果盤~因為切開哂迫住要食(我同毛寶驚佢發臭~)....望落唔係好精神呀d生果~個熱情果係酸到盲公陳開眼系列.....一直都唔明點解要咁食熱情果~食完生果我地就沖白白啦~成日無沖涼喇~一落機又玩到出哂汗~沖完涼才5點~一於攤係張床度盡情休息同埋玩下電話~wifi網絡很給力~




休息夠7點就食飯啦~今晚唔出去喇~留係酒店食~想試呢間Ginger Thai~不過...佢問我地有無訂位..我地話無...咁就話無位喇....於是我地問可唔可以訂聽晚佢話ok....訂左之後我地就上番去Concierge諗住叫佢幫我地訂聽日中午食飯既枱...但佢就話哥間餐廳(唔係酒店)依家已經收左...聽日一早會幫我地打去.....再順便問埋今晚晚餐酒店仲有咩餐廳揀...咁佢講完一輪有講頭先間泰國餐...我地話佢先佢話無哂位喎.....佢就話幫我地打去問...點知話有位喎...咩玩法?原來係如果要坐冷氣室內位要訂先得(但哥晚係一個人都無).....室外涼亭位係有位的........咁頭先又唔講清楚既?!




室外夜晚又唔算太熱既...但係張枱係極!度!多!蟻!!!!!!!!!!!!!!!係多到.....每人個位都有超過10幾隻蟻行黎行去行黎行去........唉.......算啦....都坐低左咯照食囉唯有....餐前小食...幾好食..好似廣東燒賣咁~




我叫既前菜Chicken Satay with Peanut Sauce...Rs480=109hkd.....個Peanut Sauce好食..因為好似以前細個盧九前面個沙爹檔仔d醬咁~但雞肉很鞋




毛寶叫左Prawns Soup....Rs550=124.9hkd.....我記得好似酸酸地咁既....料係多既但又唔係話特別鮮...普普~(而且d蝦質根據衰婆字庫所講...係"木"既!)...唔係好值




衰婆叫既Seafood Soup....Rs500=113.6hkd....都幾似冬蔭功...但又唔係冬蔭功......飲飲下會覺得同頭先個湯差唔多~不推薦~




呢個係衰公既Crispy Lettuces with Prawns and Herbs Dressing.....Rs700=159hkd....呢個算係4個之中最好食的!個汁酸酸辣辣咁幾開胃!但蝦仍然是有點"木"




我同衰婆每人主菜都係叫左呢個Tiger Prawns with Homemade Curry....Rs950=215.8hkd.....er....個咖哩係幾好味既.....蝦有成4隻又幾大隻既....但.....每隻蝦都係"木"既....咁樣既質感我真係好難覺得好食...........佢有個飯跟既...唯有不停撈汁食飯............如果想試個咖哩汁既話勸你唔好叫蝦~




毛寶叫左Grilled Beef wiht Herb Sauce....Rs700=159hkd....超級鞋.....肉乾咁鞋..........




衰公叫既Crab Meat Fried Rice....Rs450=102.2hkd.....呢個飯係最好食既!!!係3個主菜之中...我仲唔知醜咁食左人地碟飯兩次~




呢餐飯食左成Rs5550.05=1260.7hkd...每人315.2hkd......唔好食...而且有個侍應特別的串特別的黑面~








岩岩我媽同我講....
媽媽：今日無線哥邊三生三世講到夜華去到東海喇~
我：下!!!係呀~即係佢地又就快相遇~緊張~(緊咩張?明明知劇情~)
媽媽：係呀~夜華真係好靚仔~佢叫咩名話?
我：趙又廷呀~
媽媽：我都未見過有人咁靚仔既~.......(隔左一陣)....有!仲有一個!哥個係你老豆!!!
華....算你唔忘本啦~



2017/08/14的開心事：
好野~聽日做gym哥度收10點喇~
可以係屋企食埋飯先去做運動~
仲可以沖埋涼先番屋企唔使臭崩崩~



報時：距離與毛寶慶生快閃台北之旅2017仲有---44日~
報時：距離日本四國自駕遊之旅2017仲有---60日~
報時：距離日本大阪自由行之旅2017仲有---115日~
報時：距離新加坡熱辣辣聖誕節之旅2017仲有---129日~