毛里求斯渡假+馬達加斯加麵包樹之旅2017-05-22第三天Part 1(天晴)

星期二番工...感受到暑假尾既威力~超多小孩湧來~來啦來啦~橫掂你地都要番學咯~~放工本身想去做運動~但一放工就開始落雨....好驚佢天氣再變更差...所以決定放棄~咁係屋企做運動啦~做左20分鐘鄭多燕...腳都震埋~出左成身汗~再踩多40分鐘單車...正~...星期三...未鬧鐘響就醒左...因為唔知使唔使番工.....點知起身睇...氣象局仲係話9點"考慮"改掛8號風球......你考慮je..你考慮完可以唔掛架....咁.....我到底起身定唔起身番工好??7點幾氣象局終於決定到要掛8號喇....明明個風近澳門多d...人地香港都掛9號喇~我地仲係考慮8號中...不解!.....呢日放左成日颱風假..但我唔恨...落少少再講....星期四...起身番工...我平時行番工條路....可以用滿目瘡痍黎形容.....好多樹都塌哂....招牌爆哂.......個心覺得好痛...........但見馬路既樹已搬到一邊去...令馬路可單線行車...一定係半夜有清潔人員去通宵清潔...........公司有電...但無冷氣無水.......連我屋企都無水了.....媽媽都即刻出去買左幾支食用水.........希望快d有番水!



2017-05-22
Day 3---Part 1(毛里求斯 Mauritius)
呢日超早~天都未光齊就要出發了~連酒店早餐時間都未到就出發~好似係.....6點~...係房食左條善腸就行喇我同毛寶~




好喇~好彩準時到達報到~報到時間係07:00~我地今日參加左一個追海豚既活動~我地參左Dolswim...費用係Rs2,700=613.3hkd(每人)....包左出海追海豚活動...浮潛..中午去一個無人島+午餐~仲要包埋早餐~算係幾抵~




出發時已經要著住泳衣架喇~仲要著埋救生衣~好喇~出發~~~~(有無記得我係唔識游水?有無人係呢個時候擔心下我~~)





追海豚呢個活動一定要襯早出發~因為呢個時候佢仲訓緊未起身(訓著都搵到?)....原來d海豚係左右腦輪住休息架~所以佢地訓緊哥時都keep住游水的!仲會游游下游上水面~如果佢醒左你根本尾燈都追唔到佢~




揸左無幾耐船出海....就發號施令要落水喇~~~本身第一隊人馬係衰公衰婆+毛寶(er..係呀..我齋參加咋~我唔落水架~我好驚架~~但衰婆真係堅挺...其實佢都係唔識游水架~)...點知毛寶話佢未準備好~咁就衰公衰婆先~




話咁快衰公已經boom一聲跳左落水




其實一批得兩個人落架咋~有個人陪住一齊落水去追既...唔識游哥個(即係衰婆)佢會拉住佢一齊游(衰婆話游得勁快)去追海豚!




我諗都係幾分鐘咋!衰公衰婆就番黎~佢地話游一陣已經勁攰.....衰婆表示睇到兩條....衰公好似無~





呢個小孩第二round上陣~佢夾埋另外哥一對外國情侶一齊出發~(最衰都係我啦~無膽..得你一個人....不過上次係埃及洪加達浮潛哥次真係嚇親我)..加油唷~




華~呢個小孩一落水就同海豚咁近喇!!




無錢買相機的blogger~但第一張有影到海豚剛上到黎個樣架~~~(好難想像到佢地係訓著左~)





個小孩奮力的游呀游~




有條同佢特別的近~~~~~~





離譜呀~~~~有無近到咁呀!!!!





第二批追豚人士表示興奮~~~~我地肉眼睇覺得好近..但唔算多條...但毛寶話係睇到超多係佢下面游過.....多到數唔到有幾多條!!!係一堆堆咁既(可惜第一次無帶go pro落水~)




大家都話要休息下~~游完一round都無哂力......咁成船有10人(未計船長同帶住游水哥個)....其他人都落哂先再重新到佢地....今次佢地3個一齊落水喇!(每人有兩次機會落水)...




呀~今次有帶go pro落水喇~連住go pro哥舊黃色野識浮既....係淘寶有售...但據講番到黎由於舊野浸過海水...d螺絲位生銹....所以屬於用一次之選~




由於帶住游水哥個係會帶住唔識游水哥個人一齊去追海豚....所以其實你係快過識游水既朋友...但可惜....佢記錯毛寶係唔識游水哥個....佢一野拖住毛寶去追海豚....可憐既衰婆只可慢慢游......................(我係咪唔應該再提番呢件事?)




佢地上番黎之後毛寶話第二次睇無第一次睇咁多.....佢地上番黎時我再望下其他人.....華....勁多海豚係身邊游呀!!!!






其實哥朝仲有好幾隻船去追海豚的...應該有4..5隻船




追海豚告一段落~跟住再駛去一個遠d既地方~以下落黎係輕鬆浮潛~(幾輕鬆都好...都唔關我事~)....呢個小孩話呢個海無咩野睇...又無珊瑚....魚又淨係得斑馬紋既魚~(唔記得問佢攞張斑馬紋魚既相添~)




浮潛唔算耐~大約大半個鐘就完~之後就去一個無人島午餐喇~~~(見到有彩虹嗎)




去無人島之前就係經過呢個Crystal Rock...呢舊野...勁似之前由Blake Lively主演哥套奪命狂鯊(The Shallows).....為左避開鯊魚咬面跑上呢d石度....不過腳板底擦到損哂.....(番番黎先)...潮漲時唔知會唔會掩埋呢舊石呢?






再向前駛就到左我地午飯既無人島L'lle aux Benitiers....話就話係無人島......但係都有好幾間鋪頭賣野~無人島係無人住je無話無人做生意~





我地就係坐呢隻船追海豚架喇~估唔到呢隻野可以裝成12個人~~~




放低野周圍行下....見佢有檔椰子檔..試下啦~依家好熱呀~




諗住一路行一路飲椰子水..點知...酸既...唔甜既~車~~(係咪椰子呀?唔係椰青啦可?...自己都唔知自己飲緊咩既Blogger).......Rs100=22.7hkd.......唔緊要啦~個女仔夠靚咪得囉~超密實的在韓國買的泳衣...其實我個人好傳統架唔係隨便俾人睇我香香的肉......(其實有邊唔有身材唔想show?我咪就係無身材哥個囉)





唔得喇....隻腳仔要踏下水啦....d沙勁熱好難行~~~d檔仔好似無開齊~行番轉頭去番我地哥張枱....我飲下野~毛寶曬下太陽~





然後見到工作人員攞住碟野行出黎~~~華~~燒左d小食喎~~~~好呀~~起左身成6個鐘淨係食過條善腸咋~~~狂吞左幾串~~~~




除左沙灘上有檔仔之外~仲有係海上既流動檔~(不過紀念品不吸引我買~)










星期三哥日.....香港同澳門都打風...
一早知有風打....但估唔到個風咁勁....
氣象局又無咩指示.......
朝早掛8號.....期間仲掛到9號10號....
好似咁多年都未見過!!!!!
同埋我係屋企勁驚...因為屋企露台對落地玻璃門...
之前已有少少裂裂地.....
一起身就見到對窗係牛皮膠紙外再添裂痕...
嚇到我同媽媽再用超多牛皮膠痴住對門!!!
痴到就黎睇唔到對面.......
之後10號風球時.....出面大風到我對玻璃門狂搖...
狂驚佢成對門甩出黎!!!!!!!!
好彩無事.......哥時直頭大風到.....
我同媽媽明顯感覺到層樓左右搖擺........
搖得超犀利......好似隻船咁..
無誇張到.........
食完韓國炸醬即食麵做中午飯之後....
同公子傾傾下whatsapp.....大家就陸續停電喇...
應該講係...全澳大停電.........
無電哥時電視睇唔到(就算有都可能無訊號)
氣象局個網上唔到....完全唔知颱風消息
然後再有消息指....話兩小時後連水同網絡都會無...
即刻起身去儲水............
好彩我屋企暫時都有水.....網絡還好...
隔左個幾兩個鐘之後.....屋企有番電....
真感謝維修人員冒住風冒住雨冒住危險搶修..謝謝!
講真..澳門d電大部份都係內地供應....
內地都仲未有番電時我地已經有電用......................
因為呢個風.....
由細睇到大既八角亭俾塌樹整爛......
周街都係塌樹...連平時為我番工過馬路遮蔭哥棵大樹..
也塌了.....
仲要因為呢個風......死左8個人........哭.....
所以大家唔好再恨放颱風假喇;[
到左今日...我屋企都無水了.......不過最重要個人無事!
今晚仲有麵包食應該要慶幸......
"同埋要珍惜平時有水有電有網絡既生活"
今日發現平日既生活原來係幾咁富足
希望澳門快d恢復過來!



2017/08/24的開心事：
人間有愛丫!公子們同事們都有互相幫忙!
仲有香港的blog友都有留言問候我!
仲有d blog友專登send短訊問候我!
好多謝大家!我同媽媽同毛寶家人仲有七公子都無事!
多謝大家關心<3覆完大家之後我要節電去~



報時：距離與毛寶慶生快閃台北之旅2017仲有---34日~
報時：距離日本四國自駕遊之旅2017仲有---50日~
報時：距離日本大阪自由行之旅2017仲有---105日~
報時：距離新加坡熱辣辣聖誕節之旅2017仲有---119日~