公子新加坡喪吃自由行之旅2015-04-03第一天Part 2(天晴)

wow~大家母親節同媽媽去左邊度食飯呀?我就前一晚同左媽媽簡簡單單去左食上海野~(飯後阿媽仲扭計要我請吃哈緊大雪糕:D)....正日就同姑媽佢地一齊係南湖明月食~~開心~~今日有人請我食木瓜雪耳糖水添呀~好味~



2015-04-03
Day 1---Part 2(澳門 Macao->新加坡 Singapore)
然後攞左行李就跟住d牌既指示去搭MRT出市區啦~佢有一部部機自助買飛既...因為我地全部都係大紙....買唔到自助機....於是就諗住走去counter度買~點知counter度話：我地呢度無飛賣架..你自己係自助機買啦........我：但係我地無散紙買唔到喎........counter：我呢度可以幫你換散紙....然後你自己去自助機買啦..(請自己想像全英語對答).....咁個counter淨係換散紙咋.....個功用其實都...好低....不如果整埋自助換錢機咪仲好~部機就唔難買既....係第一次買時要揀買邊種飛je~有左哥張飛就每次增值放係中間綠色哥度...揀站...入錢...搞掂~

係喎~未講匯率~今次係SGD$1=5.876hkd~謝謝桃幫我地換錢~~~我今次換左3000hkd咋~因為我之前仲有SGD$300~




好彩撞到識既人佢話我地聽d飛係有咩分別....呢種係Standard Ticket.....係每次都要去增值的...唔可以好似八達通咁入一定數量既錢落去....最多可增6次...幾煩~~~~另外一種呢就係好似八達通咁樣既叫EZ-Link Card.....但係呢....佢係一張SGD$12=70.5hkd(淨卡)......其中係可退既按金SGD$7=41.1hkd.....仲有SGD$5=29.4hkd係無得退既制卡費.....咁呀.........咁我都係次次加值算喇~~~~~

好咯~買好卡就出發了~~~~

目的地係克拉碼頭(Clarke Quay)....我地依家係樟宜機場(Changi Airport)站....首先由樟宜機場Changi Airport(CG2)->丹娜美拉Tanah Merah(EW4)....再轉另一條EW Line去到政府大廈City Hall(EW13,NS25)轉NS Line去到多美歌Dhoby Ghaut(NS24,NE6,CC1)再轉NE Line....就會去到克拉碼頭Clarke Quay(NE5)....真係...轉到...頭都暈埋.....去到克拉碼頭既票價係SGD$2.5=14.7hkd....大約大半個鐘~(唔選擇搭的士出市區係因為由機場出黎有附加費...加上過左唔知幾點又有附加費....咁都係搭MRT實際d)

自拍魚眼鏡頭開始出動~~~



新加坡d地鐵既車廂好乾淨....但係就常常聞到有臭狐味.....所以我搭地鐵都在聞我自己個胳肋底(因有香體露好香~)...我仲問眾公子聞唔聞....我係咪好變態?(你估下有無人理我?)

yeah~到左酒店喇~今次我地都係揀番之前住過的Swissotel Merchant Court.....地址：20 Merchant Road, Singapore 058281, Singapore.....網址....揀番呢度既原因只有一個...一出克拉碼頭地鐵站旁邊已經係酒店~~~~房價每晚1543.5hkd(新加坡d酒店真係好貴~)...此為雙人房價錢....開頭我地諗住6個人去就租兩間房屈蛇~點知我地間房有一個人唔去...所以我同毛寶就可以獨霸呢間房~~~~

hehe~唔好以為咁夜去到酒店我地就無節目~~我地即刻搭的士去食宵夜~~~~就係老巴剎(Lau Pa Sat)啦~~~地址：18 Raffles Quay, Singapore 048582, Singapore....網址...我記得以前睇過旅遊書~巴剎即係街市嘛~老巴剎即係舊街市~~~依家全部都係熟食檔口啦~~~點解人地d街市咁靚既~~~

雖然室內係靚d~不過我黎第3次我都係坐室外位~好氣氛d嘛~~~~~(不過真係好好好好好好好熱~).....如果你有心水打算食某檔既沙爹就盡量坐近哥d檔口啦~一坐低附近d檔口即刻好多檔會上門搵生意~睇岩邊檔就落order啦~唔使自己出去逐檔叫的~

我既心水係6號檔~之前食開~

巧香呀~~~~



等緊野食去買野飲先~~又係幫襯呢檔對住街市門口的檔~

椰青就SGD$4=23.5hkd....其他沖出黎既野飲就SGD$2-SGD$2.5=11.8hkd-14.7hkd左右~椰青好正呀!!!!好甜~佢同馬來西亞d椰青都係咁好飲~~後排右係檸檬茶~其他都係d酸酸甜甜既飲品~

炒粿條 SGD$12(大)=70.5hkd....好大碟...不過我同毛寶覺得唔好食...因為好重胡椒粉味好熱氣而且碎濕濕.....但另外3位公子就覺得好好食~

蝦同埋沙爹係一個套餐黎既...都係6號檔口叫的.....係small set(2-3人用)....SGD$51=299.7hkd....15支蝦...15支雞...15支牛或羊(共45支)......我對d蝦期望好大的~但係唔知點解佢今次呢....搣哂d蝦殼先燒...一黎熟得滯...二黎落左大量胡椒粉......無哂蝦既鮮味...失望~

但係沙爹就真係好正呀~~~~~~個醬真係正到不得了~

仲有叫下其他海鮮試~呢隻貝殼類叫大頭 SGD$12(小)=70.5hkd.....食落超級的鮮美!!!!好似食緊生蠔咁架~~~~我未係澳門見過~~~好好味~~~我見佢英文就咁叫mussels咋~~~好想再食~

蘇東仔 SGD$16(小)=94hkd.....即係墨魚仔....炸到脆哂...甜甜地....但炸到無咩墨魚味~又貴~唔推介~

方魚 SGD$12(小)=70.5hkd...燒魔鬼魚~上次馬來西亞無食~今次試番~不過另外兩位去過馬拉既公子都話馬拉既燒得好食d~~~

公子血吃老巴剎~宵夜咋~而且d檔口開到深宵~方便~

呢晚食完...已經有d......喉嚨確確地





今日同chlo子既一段無聊對話......
我：我上網睇到美國有個女仔呀...佢贏左個攝影比賽呀...獎品係..一係一萬蚊美金...一係飛去巴塞隆納見尼馬(Neymar)...咁你會要一萬蚊定去見史奈達(Sneijder)?<--Chlo子偶像
Chlo子：梗係一萬蚊啦!!一萬美金喎!你呢?
我：頂你...梗係揀去見Ozil啦!!!!!!!!!!!!!係有錢都見唔到架...我一定揀去見Ozil架~~~~~~~~(諗起都開心..真既一樣~)
我：咁如果...你去見到佢....你會唔會問佢可唔可以錫佢一啖?
Chlo子：梗係會啦~~不過我唔會錫佢...我會叫佢錫我~~~~~因為唔想覺得我錫佢好"喉琴"~~~~~~
我：好呀好呀好呀~~~我又要~~~~~~~~~~正呀~~~
就係咁....兩個都好熱辣辣咁......中止話題.....;目



2015/05/11的開心事：
yeah~yeah~
經過我既努力~我已經完全收復番整個冰島blog喇~~
雖然相既大小同之前無事哥d有d大小不一~
但我已經很開心~~~~~~~~~~~~~~~
已經在重新收復法國blog中~
因為我真係好鐘意呢個遊記~加油~~~~



報時：距離關西哈利波特之旅2015仲有---40日~
報時：距離冰島格陵蘭自由行之旅2015仲有---139日~
恭喜老爺~賀喜夫人~~~
我地星期日終於上網訂左大阪環球片場既入場劵~~~
仲買最貴哥隻fastpass~~~~~~
我覺得我要進入哈里阿波既世界喇~~~
好開心~~~~~~~~~~~~
終於叫做做左少少野~~~~~