與三個老小孩台北聖誕美食之旅2023-12-28~2023-12-29第四及第五天(雨天)

9月21日...中午食good cafe...去入定貨準備後幾日打風...政府叫大家要準備定3日糧水...即衝去買麵..罐頭....水就已備定...夜晚叫外賣....9月22日...今日番工大家既話題都係買左糧水未?...同埋教青局今日宣布左中小幼星期二三都停課....好恐怖...保佑港澳及其他沿岸城市........9月23日..5點掛8號...放5點...今朝起身個頭爆極痛.....今晚6點幾係屋企見到顏色靚得誇張既晚霞映入屋...對上一次見到咁既晚霞係山竹......求上天保佑大家乜事都無!!!...9月24日..我本身諗住早訓...但見佢凌晨話會掛9號風球諗住坐多陣睇定D先訓..坐到點幾見眼訓諗住出去痾篤尿就訓...點知出到去見到...華!!!我對露台門原來俾風搖到吹開左....係度fing fing下...另一邊門都屈左出去...窗簾又吹開哂!!即刻關番對門同諗住搵尼龍繩...點知無...情急生智攞左好多個環保袋剪開駁長佢拉住哂D門柄...然後完全唔夠膽訓...每小時開對門出廳睇下我條封鎖線有無吹散..XXXD....睇到朝早5點半掛10號風球....頂到6點真係好眼瞓頭又痛最後去訓....但係都係驚住訓.....但我斷斷續續訓到2點先醒XXXD...醒左先食野...哥時已經無咁大風...捱過了...好驚呀~....9月25日...颱風過後無乜客黎~...9月26日..算多野做既一日~不過唔緊要...heyhey~我放假喇~~~~....9月27日-10月1日...曼谷爽爽中~...我今次都呃得毛寶透喇~我偷偷的買了頭等機票同佢去泰國玩XXXD最搞笑佢一直以為係澳門飛XXXXD.....10月2日...今日都係公眾假期~起身去左食三月半~第一次食~覺得好好味~~個爆茜湯底真係好多茜~~正~跟住去探豬~夜晚番屋企食~..聽講周末又打風....10月3日...放左幾日假去旅行..今日番工..成個人都淨係想縮埋一舊~放工好開心約左公子為我與杯慶生~~今年去左食兄弟煲~真係好正~好多海鮮~~....10月4日...一早陪人去汽車保養~..食白目...再去葡京人又飲啡~探豬~夜晚食萬豪軒~~



2023/12/28~2023/12/29
Day 4 & 5(台灣,台北 Taiwan,Taipei)
今日出發時已是下雨天~又租左車司機大哥車我地去玩呀~照出發~

司機大哥話呢段路春天黎會好靚~兩邊開滿花會好多人~






我地今日第一個景點係睇千島湖~...而睇千島湖其中一個好既地方係一間叫阿牛小吃既小食店XXXD...司機大哥話呢間小食店既老闆好好人...就算你唔野都可以企係佢舖頭望出去睇千島湖...不過我地都意思意思幫襯左D茶葉~






老闆仲向我地介紹點樣欣賞千島湖~如果由佢舖頭平台望出去個湖度呢...望落有舊石會好似娃娃魚頭~




你睇下!!佢舖望出去就係千島湖!!勁靚的!!




不過可惜呢日有雨...搞到雲霧繚繞睇唔清個千島湖~






然後老闆就俾前幾日個景俾我地睇~




我問老闆可摸耳post佢D相佢話可以....仲話send多幾張俾司機大哥send俾我地...因為老闆其實就係住係度XXXXD每日起身見到咁靚既景係咩滋味~










跟住行下呢個永安觀景步道...行呢個步道可以唔同角度睇千島湖~










不過我地無行哂XXXD...行行下覺得對老人家黎講有D難行...加上落下好濕滑...果斷放棄~




影多張娃娃魚頭就走喇~拜拜~(好似頭先步道哥邊清D咁既~)




大約50分鐘度我地就到左烏來喇~又特登諗個我自己都無去過既點~








咁岩黎到烏來老街就係飯點...咁搵間餐廳食飯先啦~






揀左係呢間老街野菜屋食啦~因為見佢門口D蔬菜超多種類超繽紛!D蔬菜我根本就從來都未聽過見過!!






好彩有5位~幾驚人多食飯無位~出面對住條河~




望住餐牌見住D菜名都唔知係咩XXXXD




菜再出去望叫左呢D~~










仲叫左呢D好似糭既物體~好多唔同種類~




頭先相入面哥個木鱉果有得整果汁~~我地叫左黎試XXXXD..一杯NT$80=20.6hkd...可以叫一瓶...但唔知好無飲叫一杯may下may下試下先XXXXD...少少甜甜地但又形容唔到咩味XXXD




叫左個竹筒飯...NT$80=20.6hkd....一個香蕉飯...NT$100=25.7hkd....竹筒飯就齋係飯但又唔算香~...香蕉飯就甜甜地啦~










香酥溪蝦...NT$120=30.8hkd...真係咸咸香香又酥脆~好好食!!!!




百香果花...NT$250=64.3hkd...華...算貴喎~同埋我唔係好接受到隻味XXXD




完全忘了是什麼XXXD




水蓮...NT$150=38.6hkd...正~~去台灣要食好多好多水蓮~




蔥油土雞1/4隻...NT$350=90hkd....土雞今次試蔥油既~一樣咁正~證明台灣D土雞真係又大隻又濃雞味~好正~




手指西瓜...價錢忘了~...試下就好~(我都係山蘇呀水蓮哥D)




山羌豬...NT$320=82.3hkd...山豬好吃~




馬告鮮魚湯...NT$500=128.5hkd...馬告係台灣原生香料~好似D山胡椒咁~好香~不過我個人問題...麻麻魚湯~




情人眼淚炒蛋...NT$220=56.6hkd...咁多樣第一次試既山野菜...最好味係呢個...呢個時雨菇個質感好得意~少少似木耳...而且同炒蛋好夾~傻左...叫左好多野食XXXD




食飽臨走先留意到呢D似糭既主食...呢兩種有包山豬肉...早知試呢D~齋睇阿拜真係唔知係咩~






行下老街行行下見到上網見到D人話黎烏來老街一定要試既呢間山豬肉香腸~NT$40=10.3hkd一支~雖然好飽~...但係都好想試~...我咁岩線排第一...之後好多人排我後面~我雖然排第一~但佢應該岩岩賣哂~等佢烤都等左一陣~






華!真係得喎!又唔太多肥肉~好香山豬味~如果食得辣~加少少佢個特制辣~勁香~






山豬肉香腸對面又係網上猛推既麻糬...咁整盒綜合口味既..有芝麻...花生...紅豆...芋頭...一盒12粒...NT$120=30.8hkd~估唔到我自己最鐘意食既係...芋頭味XXXXXD平時我一定係鐘意食花生或芝麻XXXD因為佢太足料XXXXD我覺得太多野咬~






係烏來有個雲仙樂園...要坐纜車先上到去~(不過我地無去~)...雲仙樂園就係呢條烏來瀑布上面~




去完烏來我叫司機大哥推一間佢心中既臭豆腐口袋名單~佢帶我地黎左呢間佢自己平時會黎食既專業大腸麵線臭豆腐~




兩樣都叫哂~大腸麵線...NT$60=15.4hkd(大碗)...臭豆腐...NT$70=18hkd




大腸麵線我就比較鐘意食顏家...(人地介紹)




但呢間個臭豆腐既特色係灌漿臭豆腐~~D汁直接係臭豆腐中間開窿倒入去~勁好味~~值得一試呀~~




距離我地今晚晚飯仲有D時間...司機大哥話可以夠時間俾老夫人去佢好想去既貓空纜車~由於我地過左4點先到...買飛時佢同我地講...俾NT$200=51.4hkd...就可以任出站唔使逐站俾錢~








我地排坐透明底纜車~






一人望一邊~唔好爭~XXXD




少有既合照~毛寶媽操刀~



遠見101




我其實黎台灣咁多次都無坐過貓空XXXD...查實坐到上來係有咩搞架?...睇台北市?






我地無乜行~揀左個地方坐低飲野~我飲洋甘菊~落左雨有D凍~






搭番落去時都入黑了~




到左食飯時間...司機大哥車我地黎到信義區既寶麗廣場~我地今晚既晚餐就係入面既餐廳~想影聖誕裝飾但人太多好難影~




我地又黎食合鍋物喇~我去佢地FB訂位~inline都好似有~地址：台北市信義區松仁路28號4樓(寶麗廣塲)



今次有房坐~






我同毛寶其實食過好多次~老夫人都食過~志在帶毛寶爸媽來試下~佢D麻辣花生真係好好食~




我地叫左3個和風青蟳套餐...NT$2,080=534.7hkd...1個頂級牛小排套餐...NT$1,480=380.5hkd...






每個套餐仲有一個蔬菜盆...每個餐都有~呢度應該係兩份~




由於怕太多...所以最尾一個揀左自然元素套餐...NT$1,180=303.3hkd...食菜都真係唔平架XXXXD




仲有個前菜既~我揀左要海膽山藥~...素食餐係沙律~






蟹鉗落鍋熟左之後佢幫我地撈上黎~佢再幫我地剝殼~我最鍾意剝殼服務~睇下D鉗幾大幾靚~






個蓋D膏一早攞左出黎~陣間煮粥~~








真係好香蟹膏味~~~~我食左兩碗~~~(好食過日本D蟹雜炊~~)




完全忘記呢個係咩甜品XXXD




我仲唔服輸食飽飽之後仲要食多個原味波堤XXXXD(同邊個鬥?)






聽日走~執行李~都唔係買左好多野~




最尾一日無行程啦~我地訂左司機大哥送我地去機場~...去機場前仲有時間~我地就出去食埋中午飯先~(Brunch先岩XXD)...揀左Woolloomooloo~地址：台灣台北市信義區信義路四段379號....係澳洲早午餐咖啡館...網上評價幾好...去試下~








無訂枱(當時無網上訂位)...所以就咁walk in~都等左一陣位~坐樓上..查實都唔係坐得幾舒服XXXXD




如果唔係同老人家來...我會揀坐呢度XXXD




佢有D午餐set叫...我地叫左澳洲就是超級越南河粉+咖啡...NT$450=115.7hkd...今日湯+咖啡...NT$320=82.3hkd....手工肉醬義大利麵+咖啡...NT$420=108hkd...另外再單點~




叫左sourdough..揀左牛油同Vegemite...NT$220=56.6hkd...隻Vegemite應該係澳洲黃色罐哥隻醬...有D人話愛就會好愛...唔愛就嫌佢臭XXXD...我就屬於好愛....而且餐廳既homemade sourdough真係幾正~~~




無花果羊奶起司沙拉...NT$400=102.8hkd...喂~正~配得幾清新好味~




沐露炸雞翼...NT$320=82.3hkd...好貴既炸雞翼...似水牛城雞翼...辣辣地~外皮脆內肉嫩有汁~正~




午餐set既澳洲就是超級越南河粉(個名令人好老尷XXXD)...湯同粉都ok既~但係牛勁鞋~NT$450=115.7hkd




另一個午餐set係手工肉醬義大利麵...NT$420=108hkd..呢個都唔錯~




跟午餐set可以叫杯咖啡~我同毛寶都叫左long black~喂...佢杯啡得喎~~好香濃好濃香...好岩我同毛寶~




香濃到每人單點再叫左杯~




Pizza with Prosciutto and arugulas...NT$550=141.4hkd~pizza都OK~我平時鍾意食超薄底...呢個個邊有少少似麵包質地咁...但又幾好食~成餐唯一要彈係令人叫出口好老尷既越南河~




食飽飽搭捷運番酒店...約左司機大佬兩點黎接我地~大約3點半左右就到機場加check埋in~帶佢地去lounge食野~又有聖誕野食~


















唔算好好食~但又好食過澳門XXXXD




台灣買唔夠上次日本買平~但顏色好似多D選擇~




行去登機閘口等啦~




我地坐星宇航空JX205係18：00由台北直飛澳門~飛機餐係炒麵~(似日本炒麵麵包哥D炒麵)...一般般~但係包小食係米菓~好正~完全忘了睇咩戲~XXXXD






大約19:55到澳門~結束我地2023年既台北聖誕之旅~隨後導遊會派信封俾大家~如果大家覺得導遊做得好可以俾D鼓勵小費XXXXD拜拜~




總結：
1.使費：2,582mop(機票)+ 4,516hkd(4晚酒店)+4,486hkd(食買玩+包車)+204mop(保險)=11,702hkd.....今次聖誕台北之旅...貴貴地...應該貴在聖誕節酒店~...來回機場接送+兩天全天包車...每人大約700幾hkd~最緊要舒服同開心~
2.疫後第一次同老小孩s..揀左比較近既地方同佢地試試水溫~
3.都係全靠有老小孩一齊出發...我先去到咁多我仲未去過既台灣景點~如果淨係我同毛寶去就咁行下街就算~
4.第一次搭星宇航空...我覺得呢間航空公司好勁...2019年開左無耐就疫情...又捱得過喎!...以澳門黎講...佢既硬體軟體都算係咁...如果係澳門出發去台灣有得揀我會揀佢...唔想揀澳航....(雖然野食唔算好好食)

~The End~

~多謝收看~

2025/10/04的開心事：
飲左兩杯啡仲係訓到晏覺XXXXD



報時:距離南極阿根廷之旅2025仲有---39日~
下!去完泰國之後突然間仲有一個月度就去南極?!
無論出發要用既野定係個心情我都未準備好XXXD
連之前學哥D企鵝名好似仲有少少唔記得XXXXD