全新飛行體驗法國布列塔尼自駕遊之旅2019-11-25第二天Part 1(陰天有毛毛雨)

上上星期日…中午食糭…fika後做家務~…夜晚外賣搞掂~…..上上星期一…起身又肚痛又頭痛衝去睇醫生….病假…..上上星期二…..醫生俾多日我抖~今日悠悠閒咁過~真正休息左成日~…最近睇緊viu tv套女神降臨…覺得車銀優好靚仔….但我要決定保警惕…因為我養唔起3個仔XXXD……上上星期三…精神爽利上班去~~~~放工無啦啦背脊好痛XXXD…..抖氣都痛XXXD….好廢呀我~~~……上上星期四…我覺得放晏都可以仲見到日光~已經係小確幸~~~……上上星期五…好多野做~~放工去左食唐吉訶德….上上星期六….驗完核酸去左食華星….然後去左探臭蜆~…夜晚去左食我等左一個月先食到既川江月~~~簡直係優秀~~~~…..上星期日…中午去左試白日~好難先約到~但我神的手指真係篤到~我好叻~都幾好食~然後陪左毛寶睇植物~夜晚叫外賣~....上星期一...噚晚訓得好差~所以今日個人都怪怪的~我地歸類呢種事為濕重XXXXD....飯後出左身汗舒服d~.....上星期二...由於我太耐無做運動...周身骨痛XXXXD不過好彩噚晚好訓左~......上星期三...起身爆頭痛....刷完牙就仲痛到嘔...咁都爬到番工我要俾個叻我自己~廢事行黎行去所以中午留係公司食~今日跟香港D BWs join左個project~開心~....上星期四...起身仲有少少陰住陰住既頭痛~但我好堅強夜晚食完飯都有運動~….上星期五….攞番之前啲ot鐘…加上放早….未夠5點就收工~放左工去食兜兜….都係十二春好味啲~~…..上星期六…中午驗完核酸去左食文哥….再去hide out飲啡…下午去體驗一個芳療課程…夜晚痴痴貢~…..星期日…中午去左MGM食海南雞飯…幾好食~….然後去左探臭蜆~夜晚叫外賣~……星期一…勁濕~~~濕到令人覺得好攰~.....星期二....個人又係濕濕梅梅~下午番屋企訓晏覺老夫人話我話到有鼻鼾XXXD……星期三….今日開始落雨幾大下…所以無番屋企食…係公司訓到個頭就黎甩出黎XXXD….星期四….無乜特別…除左俾個好煩既阿姨律師煩住哂……星期五….好濕呀個天氣...連牆都滴水!!我成個露台都濕哂!好核突!...放工去左食味藏~.....星期六...中午驗完核酸就去左食茶杯~再上去同臭蜆玩~夜晚痴痴貢~



2019/11/25
Day 2---Part 1(法國,布列塔尼,雷恩 France,Bretagne,Rennes->聖米歇爾山 Mont-Saint-Michel->康卡勒 Cancale->迪納爾 Dinard)
早呀喂~晨早就check out啦~8點幾就出發~不過都還好啦~因為我地噚晚無出去食~係酒店嘆完食左個無印飯就早早訓~休息好喇~(翻查紀錄我地噚晚係7點20分訓左XXXXXD)

行番入噚日黎布列塔尼個車站~好近...其實係酒店對面XXXXXD~




我地唔係搭火車去其他地方~我地其實係黎車站入面既租車公司攞車呀~標題標題~自駕丫嘛~不過我地預早左少少既時間~去嘆個車站早餐先~




搞乜叫咁多包XXXXXXD...好似餓左好耐咁XXXXXXD....哥3個小法包一盒€5.3＝46.6hkd~....好味~牛角就一般啦~€1.7＝15hkd...以一般好食黎講個牛角算貴~叫左熱既Americano~€1.9＝16.7hkd...估唔到法國人都會飲Americano~不過好淡XXXXD




好啦~行落最底哥層攞車~




我地係SIXT度租車既~租6日車~包哂車保呀~GPS呀之類~€697.44＝6,137.5hkd....每人每日511.5hkd...兩個人租車~就係咁貴~搞好手續~攞車要行去隔離馬路停車場攞~職員向我地透露我地係第一個係佢地度租車而來自澳門的人XXXD真唔真呀?第一咁易做既咩XXXXXXD澳門人去左其他租車公司jeXXXXD




估唔到會俾四個圈我地揸XXXXXXD我第一次自駕係四個圈~毛寶都係第一次揸XXXD




出發喇~~我記得駕車好新既~~係市區揸睇下個GPS~密密麻麻咁~好驚呀~(唔使驚~我地睇自己電話個mapsme既~)...佢個樣好認真XXXXXD




地下濕濕地~但天藍~





開始上高速~佢無咁驚喇~





心情放鬆到開始開歌仔聽喇~哥期佢好鍾意聽濕爬既尋回一碗湯(2019）~有時聽到呢首歌....我都會諗起法國布列塔尼；[





唔知大家鐘唔鐘意影公路景呢?我好鐘意~好似由藍天轉左做陰天添~






右邊棵樹勁多波波球~




另一首會令我諗起布列塔尼既歌係濕爬既Love is nearby~唉~




突然藍天~~呢個位咁睇番有少少冰島旅行feel~




大約1個鐘多少少...我地就係雷恩黎到聖米歇爾山(Mont-Saint-Michel)....泊好車咁諗住行入information睇下有乜攞到或者問到...點知一粒人都無XXXD....連紀念品都無得賣XXXD




唔緊要~照行~其實得一條路~唔使搵~




其實個主角已經出現左係大家既眼前~前面個客官伸到對手大字型係咪覺得自己好有型?





行左10分鐘之後....前面個景好似無唔同XXXXXXD不如拉大睇下就算啦行左好耐喇XXXXD





兩個徬徨的旅人/女人(?)影番張合照先....唔係呀唔係呀~人地仲係女孩~(係咪想打我XXXXD)




影影下望過對面岸見到我地下一個目標!!!你地見唔見到?





行多10分鐘仲係咁...個景無咩唔同...我好驚XXXXXXD唔好走呀客官等等我呀~





終於!!由停車場行到黎呢個位!!半個鐘!!!而且影左張我超滿意既作品!!!!呢張我勁鐘意!




然後我問毛寶：咦...依家都差唔多12點喇喎...我地下一站食飯又唔係呢度.....咁我地係再行上去?定點架?........毛寶：無呀~我唔行上去都得架~...........呢兩個人搞乜?XXXXXD....依家睇番先知上面其實有好多餐廳商舖之類.....山頂係修道院....而且幾靚~應該幾好拍~而且依家睇番有間餐廳我好想試~係鵝肝蛋包~天呀~唯有下次再來~呢度應該要花大半日~(如果潮漲呢度應該像海中孤島~依家係半退不退狀XXXXD不過我覺得陰天都幾襯呢個景~





未行到埋去落緊相當大粒既雨~一路行黎時已經見到好多架巴士狀物體來來回回...我同毛寶講：唔通有shuttle既?....毛寶：係有架~我知呀~........我感覺被出賣....我決定將呢張影得我地又醜又腫既合照公開(呀不是~




由於越落越大雨既關係~一有巴士我地就跳上去番停車場攞車XXXXXXD....我唔記得使唔使錢XXXD有無人遊聖米歇爾山用咁短時間?下次去我唔會再行哥段路~我要直接搭shuttle去食鵝肝蛋包~

俾埋停車場錢就走啦~都方便~

2022/03/26的開心事：

見到臭蜆~

又試左自己未食過既餐廳~

小確幸呀~