毛寶午餐生日會2019＠雅吉(Aji)

上星期日....本身今日無諗住食咩~後尾臨時約左麥公子戈巴同八寶豬去金麗華食中午~~~~我今個周末見齊3個小公子~好開心~~~~下午又做日本功課~~~同埋同埋!!!!!好開心呀!!!!!濕爬隻19 Moment精選碟出左喇!!!!!!!!!!!!忠粉手持兩隻是必須的!!!!!!!!!!!!!!有成19隻歌...等我新年慢慢J~~~~~夜晚番暫居地食燒鵝脾~~~~~~~~~~上星期一....番工無咩特別~特別在我朝早又計錯數~我數學挺差的~好開心呀~呢日係Supper Moment既19moment個documentary面世日~睇完覺得好感動!絕對係嘔心瀝血既誠意靚聲之作!我真係無愛錯偶像~....上星期二...er....我日日坐counter都真係驚....笠番個口罩先....上星期三....我覺得....今日仲恐佈過噚日.....今日已經演變成一定要戴口罩.....上星期四....全城人心惶惶...一罩難求...原來想過平淡又安穩既生活有時都真係幾難....大家都要好好做好防預措施呀!....上星期五...今日番半日..但呢個新年起伏都好大..由諗緊新年玩咩好轉而諗下係屋企有咩好做.....中午放一點半...同公子去左日麗飲收爐茶~下午去買下物資啦..以往買年貨...今年買康鈣c同消毒用品....夜晚同媽媽二人吃年夜飯~食星際品味坊...覺得呢間無論食物同服務都好過米豬蓮乜星餐廳好多~上星期六....喂!!!!大年初一呀!!!首先一定係祝大家身體健康平平安安!!!但無人知我呢日經歷左啲咩...首先...係9點半又俾個走火警鐘驚醒!!係真係嚇醒左!!開頭以為係阿媽個鬧鐘...但阿媽按完鬧鐘之後都係瘋響驚覺係要走火警...驚左十秒停左....打落管理處...佢話係27樓係走廊拜神令到警鐘誤鳴....妖!!!!頂你咩!!!走廊可以點火既咩?!?!我係度住左半年已經有兩次警鐘誤鳴...知唔知有狼來了呢個故仔?!..之後好辛苦翻訓...起身去拜老豆...之後又發生啲嚇到我鼻哥窿都無肉...初一既我...中午係食聖安娜麵包過...下午翻睇衝上雲霄2...夜晚去左舅父屋企食飯打麻雀打機...輸左7蚊.....星期日...去臭毛寶放工(這孩子真苦年初二都要番工)...中午去左毛寶家開年...下午去左舅父家一年一度既賭王群英會!!!夜晚食左廚屋...再番舅父家打麻雀...但走哥時太凍我懷疑我凍親....星期一....本身約左去酒店飲茶不過後尾諗諗下好驚都係唔好去了...不過我今日狀態非常不佳...訓左成日....星期二...凌晨嘔左次好番好多...我發現我食哥間野4次有兩次都胃炎.......中午去左毛寶家食外賣~下午公司宣布星期四同五為左防疫所以唔使番...夜晚去左食齋.....星期三...同左舅父一齊食中午....下午番舊屋睇裝修...越望越無奈...番舅父家媽媽同舅公打麻雀...我就開仕燊安慰下我.....星期四....起身...食出前一丁....飲咖啡....打下Blog...夜晚食齋飯....星期五...呢日係人日...相信個行程應該係同噚日一樣~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



適逢今日係人日~我地就出一篇生日篇啦~呢個Blog進度嚴重落後~哈哈~野食講下東又講下西~唯有遊記係順序~依家我地搞搞怪怪咁講下毛寶2019年生日我請佢食左D咩~中午哥餐我就揀左之前食過覺得好食既雅吉(Aji)...係MGM Cotai入面~記得訂位~都幾多人食~電話：8806 2308...係一間將秘魯菜同日式菜融合既餐廳~




之前同餐廳溝通左想要景觀比較好既座位~所以今次都有得坐最開揚哥排座位~




之前空地對開做緊一個藝術展覽~




佢個午餐餐牌係單點哥部份少左勁多野....諗諗下....叫左佢個Tasting menu試試~(因為都見幾多野食下~).....叫AJI Experience.....$988/人.........就有以下野食~




首先係menu入面無既....係俾你試下平時秘魯名菜Ceviche個汁....但....俾人當一杯野飲咁試.....個味好搶XXXD又酸又剩~(諗起我依家個口都酸到狂標口水)




第一道：Snack....係小食部份....1.炸薯蓉牛肉丸...2.蝦頭及蝦肉配黑薄荷醬.......wow~成個魚缸盤景咁攞出黎~




炸薯蓉牛肉丸....d粒粒汁bit得好靚~但味道一般~因為我唔鐘意個質感~




蝦頭及蝦肉配黑薄荷醬....比薯蓉波好~





第二道：King Crab Causa.....皇帝蟹肉薯蓉配"黃辣椒"..三文魚子..黑脆米及牛油果..................睇佢成舊糯米磁咁質感一定軟趴趴....但佢加埋脆米又變得幾有層次~同埋口味配搭很不錯~好吃~





第三道：Wagyu Tartare....和牛他他..海膽..鵪鶉蛋配火烤麵包.........出菜先係你面前烤d麵包~烤既時候勁香~但麵包食落無聞落咁香~但係和牛他他現鵪鶉蛋好出色~~~~








第四道：Northern Ceviche.....北部醃海鮮..豆蓉..帶子..八爪魚及秘日"虎之奶".......




係你面前先倒虎之奶~隻碟入面有水碌黎碌去架~~勁得意~





所有海鮮都好好好好好好好味~~~~(虎之奶還是襯海鮮好味d~淨飲不享受~)





第五道：Peruvian Nikkei Shshi Land and Sea......秘魯壽司~~~期待好久~~~因為上次食過好好食~~~但依家加價一粒也不便宜~出到係你面前灸燒~~~配搭口味得宜~~~吞拿上的甜酸醬開頭以為會搶味~點知又唔怕~和牛壽司上次食過已經覺得好正~





第六道：Mushroom.....香菇..姬菇..平菇及清湯........好日式的一道菜~....入面仲有舊好酒樓飲茶常見的紫菜卷~







第七道：Engawa...烤比目魚邊配"黃辣椒海鮮汁"......裝住呢味餸既器皿幾特別~




遠睇少少先睇得哂~係高身器皿...我覺得好中式~拿~壽星都影咯~特別無?




講番呢道菜先~係幾唔錯既!....呢個部位係咪叫魚雞位?d肉好嫩....估唔到佢配上辣辣地既汁~好味~




第八道：Parihuela Chawanmushi....蒸蛋..黑鱈魚..海鮮湯.."乾辣椒"及啤酒......呢d好難衰...除非食材唔新鮮~正評~







第九道：Short Rib 50 Hours....50小時慢煮和牛小排配"燒汁"..紫薯蓉及黑藜麥.........Yeah~~~有得食呢個~~~~~上次好好食~~~覺得肉既質感無得頂(雖然上次覺得個汁可以減一度咸).......今次都唔錯...但我覺得肉既口感比上次偏鞋左少少~但都好食~每人細細舊咁就夠了~





第十道：Rocoto....秘魯辣椒甜品..椰子及肉桂泡沫..花生雪糕配巧克力堅果碎........喂~白雪公主甜品喎~~~~~




就係呢個時候~~~由於之前同餐廳溝通好~又俾左個小驚喜毛寶啦~~(放心~今次無一批人出黎唱生日歌~淨係講happy birthday~~~~~)...多謝餐廳的安排~~~俾你吹下蠟燭許下願喇~







影完相食番個甜品先~話哂係雪糕~會融架~又幾好味味喎~個花生雪糕配巧克力堅果碎...好彩佢肉桂味不算太濃~






頭先送蛋糕時餐廳仲幫我地影左張即影即有~~~佢仲要整到咁靚靚送番俾我地~~~~~~多謝~~~~~~






餐廳哥日幫襯仲送左兩張MGM每年都搞既啤酒節入場卷~都幾大器喎~




食完呢餐無咩事我番去食白麵包喇~拜拜~XXXD...講笑咋~希望無待慢客官啦~生日飯未完架喂......








呢個新年...
都真係有D新既體會...
第一次番左工之後新年假放得好長...
以前一直好想放一個好長既假咩都唔做黎休息...
呀....依家咪有囉
但係咁樣既一個休息...令人覺得好感慨
原來想約人去飲杯咖啡.........係咁奢侈
原來想約人去睇個戲.............係咁奢侈
原來想無無聊咁行出街呼吸..係咁奢侈
原來想同屋企人出去食餐飯..係咁奢侈
大家可能話留番條命仔日後大把時間做呢D...
我都唔係想講呢個新年有幾悶無咩野做過...
係想講....點解有得做呢D野既時候平時無好好珍惜同感受...
但呢幾日真實感受到住係澳門還是幸福的...
起碼我肯去排隊...我係有機會憑我張身份證去買到口罩...
睇電視見到其他地方既公公婆婆凌晨3..4點去排都買唔到!
如此折騰人...政府還可以話口罩供應充足嗎?
今次澳門政府我真係要俾一個讚喇<3
還有非常感謝所有前線人員<3
大家要加油呀!!!祝大家一齊成功打敗肺炎!!
祝大家新一年可以好好感受生活!!
加油呀!!



2020/01/31的開心事：
今日係人日~祝大家身體健康平安大吉~
我無出街減少社會負擔...
出左一篇Blog娛樂下大家~算係盡左一分力XXD



報時：距離與三老九州佐賀自駕遊之旅仲有---64日~
報時：距離泰國曼谷揼揼揼之旅仲有---140日~
報時：距離七公子台北帥氣行之旅仲有---243日~