日本大阪自由行之旅2017-12-09第二天Part 1(晴天)

星期二...番工無野講..唯一想講係中午我媽買左園林俾我食呀~~heheheehe~~放左工去跑跑~但只係行+跑左3.56km~攰~隻腳有d痛~(又扮可憐~)....星期三.....番工都係咁啦~放左工去左同我既唯四大學同學慶生~~~去左"8"~~~~星期四.....番工好x忙....講完........食完飯又攰到梅哂...我依家已經眼訓到成個人成pat屎咁挨左係櫈.........搞乜也呀....8點都未到喎..................................食屎啦...又要我面對星期五既番晏....妖



2017/12/09
Day 2---Part 1(日本,大阪 Japan,Osaka)
好~早晨~一早出發~(好像9點多?)...大阪駅同梅田駅係相連的~行過去搭地下鐵都好方便~




一大早就來到心齋橋~




原來路既兩旁有銀杏樹~~~可惜都掉光光~





第一站...其實係衝去藥妝店買日用品~~~~又黎番心齋橋無咁旺哥邊(未過H&M哥邊)既ダイコクドラッグ藥妝店(大國藥妝店)~地址：大阪府大阪市中央區南船場3-5-17....我最鐘意去呢間買~因為呢間真係好平~~~~(之前去東京比較過都係大阪平d~)...同埋佢d貨都算齊~一次過買哂唔使分開買~我淨係買一間唔會再格價...由於我用開哥d呢間最平...所以有其他野我唔知會唔會可能其他藥妝平d架~自己衡量下~呢間都開得幾早~開早上08:00(佢仲有一層係專係俾遊客做退稅架~唔使同其他唔退稅既人迫...同埋佢地退稅做得好快)...呢日9點幾黎好早無咩人行得超舒服~




門口仲有人派優惠劵....本身退稅已經係8%off....仲要加多2%俾你!




如果買過3萬円會係8%+5%off..過5萬円有8%+7%off.....平到極緻!夾埋一齊買就最抵喇~




好~睇睇有咩靚貨先~呢隻膏布某公子既爹娘好愛用....買左盒俾佢地...我都買盒試試佢先~156枚548円(稅拔)=38.1hkd....小小的一粒......貼一粒佢周圍都感受到佢強勁既發熱~不錯用!今次買左一盒咋下次再入手!(不過小心勁得滯皮膚會敏感痕)




呢個我常用既...80枚798円(稅拔)=55.5hkd....掃兩盒~




又幫我媽入貨....佢成日用既每盒入面有30小支獨立包裝人工淚液眼藥水.....真係佢呢度最最最平!!!雖然比舊年個價佢自己都加左價....但都係佢最平!30支458円(稅拔)=31.8hkd.....佢個牌無吹水架!佢寫原價係1,000円...我係機場睇過真係賣1,000円....又掃!!




又係我常用的退熱貼~~16片278円(稅拔)=19.3hkd....平過港澳好多好多!!仲新出左最左邊淡藍色盒哥隻...418円(稅拔)=29.1hkd...呢隻貴d...因為可以放入雪櫃令冷凍效果更出位...買黎試試佢~




上次第一次買呢隻黎試...勁好用!!痱滋貼!!!我生大痱滋用左兩次就好~~~所以今次又黎掃~上次買一盒12貼既係934円(稅拔)=64.9hkd(即一貼5.4hkd)...今次係24貼一盒1,580円(稅拔)=109.8hkd(即一貼才4.6hkd!!!!!!)....抵!!!掃!!!!!!!!!




一有喉痛即搵佢幫手既喉痛露噴劑568円(稅拔)=39.5hkd...仲要買特涼版~




見到New字既潤唇膏又即掃~~寫住體溫乜乜乜咁好似好勁~398円(稅拔)=27.7hkd..買到失哂心瘋(用後感真係唔錯~)




人造皮膚膠布...我阿媽有用開...買買買!




然後買埋呢個關節用膠布..我諗係fit關節位卦~我仲未用~189円(稅拔)=13.1hkd




上網睇話好好用既鼻敏感噴劑..我買左藍色哥支...番黎之後我媽話幾好用...428円(稅拔)=29.7hkd




買買買係咁買!!我平時用開既野係呢度買真係好平~




10點半咁早已經陀左咁好多野係身~~~~~~~痴線架~





上面張圖一睇就知我係行去Tokyu Hands啦~~地址：大阪府大阪市中央區南船場3-4-12..又係保暖杯既世界~~




我呢...我呢....之前咪話2月Supper黎澳門時我去接船送左樣我係日本買既野俾Sunny既....其實我就係買左個保暖杯俾sunny bb呀~~~就係右邊黑色哥個~~~~(怕醜~~)




實物就係咁樣囉不過唔係呢個size~見佢啞黑色好有型好襯佢丫嘛~~~(不過唔知男仔鐘唔鐘意呢d老餅野~)




行行下見到覺得奇怪...點解廚具哥層會有marker筆既呢?





呀頂~~~~原來係撈飯既飯素黎架~~~~~~




仲有粟米味~~~~幾過癮~~~




真係要講講呢個花灑!!佢地真係連花灑都有得試既...咁我行過....個售貨員極力叫我試下....叫我放隻手入個箱度.....俾個花灑沖10秒.......咁咪試下囉...話哂我都係後生女...咩都試下啦......沖完之後.....哇塞!!!我隻手又白左又滑左!!!係勁滑!!!比平時滑超多!!雖然我平時已經係勁滑哥批~~(有無會咁讚自己?)....佢話呢個花灑噴出黎既水好細可以細到入到毛孔清潔...完全唔使用任何清潔液都可以令你既身體同頭髮都乾淨~~~真係好吸引...多謝63,000円(稅拔)=4,378.5hkd......wow....嚇我唔到既....er....黎到澳門可能水質唔同又有影響效果既...可?




扭蛋中最吸睛就係佢~~~~點都要扭番個俾孖八啦~




哥期新出應該係呢個~~但又嫌佢唔夠出位~~




我最想抽中係布甸狗俾孖八~~~~




點解喎!!!點解抽唔中之餘仲要抽中玉桂狗喎!!!




好喇~買完一輪Tokyu Hands之後就去食飯飯喇~~毛寶：你又真係影呢度影1000次都唔厭架喎........我：chur~




搵緊餐廳期間見大路兩旁d銀杏樹仲有d未落哂~好金光閃閃呀~~(唔知係咪我錯覺...我覺得有陣屎味d銀杏葉)





今日中午就係要去食我之前自己膽粗粗打過日本預約哥間餐廳~~~我上網睇過地圖大概知係邊....但點知搵哂成條街都無......點知....原來佢係B1層....鬼鬼祟崇狀




我地今日就係要黎呢度食華蓮!!地址：大阪市中央区心斎橋筋2丁目7-18プライムスクエア心斎橋B1F....原來人家地址一早講左係B1層...我睇漏左~~~~~




呢間係食鹿兒島既黑牛黑豬架!!!!我期待了很久~




每張枱都係個室設計~~私隱度超高~岩哂傾計~





咁呢~呢度食鹿兒島黑豬黑牛架嘛....但就有好多種食法既....有沙bu沙bu有壽喜燒既...但噚晚我地已經食左壽喜燒啦~我地係專程黎食食以下呢種整法既~~就係.....望望張相估到無?




我地今次係要試箱蒸呢種方式呢~~~~~第一次試!!特登揀午餐黎試~因為lunch set平d~咁佢1號餐肉類淨係得豬既...3號就淨係得牛.....2號餐就有兩款豬(不同部位)同一款牛....我地本身想叫一個2號一個3號....但侍應姐姐就推介我地叫兩個2號~好啦~就聽你的~2號餐每位4,000円=278hkd




叫左姐姐推薦的獺祭~凍飲~2,500円=173.8hkd(180ml)....口味偏甜~確係唔錯~




前菜是一舊很入味的蘿蔔~同埋一舊我唔知有無聽錯既oyster tofu....但舊野又唔係好食到蠔味~同埋口感似魚蛋~




華!!!!來了!!!!!!!!!!!蒸前影一影~個餐已經係有哂肉同蔬菜~圖為2人份~




d肉d色靚到~~~d菜個樣新鮮到~~~(無野搵野黎講)





好喇~影完一輪開始蒸喇!!!!!





有張野俾你睇架!!!會蒸大約10至20分鐘左右!重點係佢想提你"唔好打開"個蓋呀!!!!!!....反正有人幫你睇住既~咁就專心食前菜啦~~唔好手多多~




等緊哥時就睇下佢d醬料啦~咁有日式麻醬啦...一個酸酸地既汁啦...有蔥有辣蘿蔔蓉啦~




仲有d係固定放係枱度既鹽..黑椒..七味粉同山椒粉~個鹽同黑椒係即磨既~~重點係電動的!!!好好玩~~





夠鐘就會有人幫我地打開喇~~華~~好吸引~~







肉既底下有d超粗壯既芽菜!!都好好味!!




食箱蒸既好處就係可以食到佢既原味!!!牛同豬都好好味!!!!!但建議要襯快先食肉...因為菜佢會繼續熱住....肉唔會..唔快吃既話會凍....同埋我覺得佢d醬太重味...會遮左肉本身既味~~~淨係加少少鹽係最好味的!!!!蔬菜全部都好好味~~~





跟餐仲有飯~醬菜~同埋湯~




飯後仲有個brown sugar ice cream~




呢餐食左10,500円(稅込)=729.8hkd...每人364.9hkd....呢度野好食服務也好~會再來~




由於攞住太多野~所以番一番酒店先~臨番酒店前~買埋我最愛既香味先~(我係Lucua既Loft買咋~~)...幫杯公子買..佢都好buy呢隻味既hand cream...500円=34.8hkd




然後向左一望....下!!!平時用開既香水......同一價錢...1,200円=83.4hkd.....仲要有多支小hand cream送?!?!?好抵!!掃!!!!!




好~安樂哂~(呢個主人公個身到底有幾臭?)




好可愛呀~~有貓巴士站呀~~~~~(個小孩同龍貓都好可愛~)









2018/04/19的開心事：
今日d客正正常常囉...實屬喜慶事一則



報時：距離和歌山嘆溫泉自駕遊之旅2018仲有---59日~
報時：距離與毛寶慶生泰國食揼嘆之旅2018仲有---162日~
報時：距離天團蘇格蘭高地之旅2018仲有---177日~