2016年8月3日 星期三

七公子香港一天遊2016-07-09 Part 1(酷熱天晴)

其實本身聽日先寫blog架嘛~~但你又估我唔到~星期三既呢個時間先上黎寫~~其實我今日出左去諗住聽日先寫既..點知今晚有個不速之客聽晚要拉我去食飯....即係聽日都係唔得閒...(咁你咪下星期一先再上黎囉...又無人等你.....)....唉...咁你知出blog係我既小確幸黎架嘛.......再唔出咪呢個星期先得一次小確幸?!同埋如果你準時星期四黎探我...咪等於我地準時見面囉?!我真係一個貼心的孩子~.......星期二...比平時早醒...因為要起身睇一睇有無打風!!香港8號風球...澳門鄰近既廣東省地區都係紅色預警....偏偏澳門呢個福地由始至終掛左10幾個鐘3號波....哥日番工成身濕哂...d雨唔大但打橫咁黎....上網睇成街塌樹~招牌都塌仲係3號~澳門..就是與別不同~(#曲線要說明)



哈哈~公子又黎佔一佔位置先喇~~~完左一個國家既我地又插一插播公子七月時過黎香港玩玩既行程全紀錄(可能無人想知).....首先講講點解會有呢個香港之旅呢?...因為我地七公子主席(好似無係度講過我地主席係邊個...哥個係朗公子)開到聲過想約埋...一齊去大澳行下..........所以就有呢個香港之旅產生喇...咁點解要哥日去呢...因為哥排噴射飛航同埋金光飛航都有優惠出...咁就.....出發咯~



華~哥日晨咁早搭8點船~~~~痴線架~~~仲早過番工~多謝毛寶車埋我去碼頭~~~報數~~1~2~3~4~5~6~7公子出發!!七公子帥慘了~~~~這是公子第一次一起去香港~要好好紀念~我好耐無去過香港喇~~~真係好窮呀~~~因為過黎一日要洗好多錢架~~~(凱公子個樣好乖孩子好想抱下佢~)




落左船搭港鐵去到東涌站~(35分鐘左右)...再轉巴士入大澳(40分鐘左右)........查實入到黎大澳......已經11點幾12點.........見唔見呀~~我戴左日本買哥頂帽呀~~~~但戴黎影完相就除左喇~~~~因為戴住我散唔到熱呀~~~~狂流汗~~~~




一到左大澳就有人狂問你坐唔住船呀?...然後話:今日天氣又熱又焗咁...最岩出海~(咁都俾你兜到~~~~~~~)......仲有話今日天氣咁熱你都走出黎啦...何況海豚?快d黎坐船啦~(你地係得既~).....轉入內街~熟識的咸咸香香湧出黎喇~~~(記唔記得我之前同大比佢地黎過~)





頭先由澳門黎都係搭船搭港鐵搭巴士...全部都有冷氣涼...依家開始先係真正熱!!!!!!!!!!!真係好熱....買番舊冰菠蘿咬咬先~~~~~~之後都有買冰西瓜食...但係菠蘿好味好多~~~~好似$10舊~小心咬喎~~真係雪到成舊冰黎架~




本身想食某間野既~佢話未有位住要1點先有...又無得訂位...要自己1點再走過黎睇睇....咁唯有過橋行下先啦~






我行行下...越行越熱........越熱之餘條頸加膊頭位更熱....熱到俾火燒咁!!!!!!!!!!!!!後面佢地拉開我件衫一睇.....我直頭甩埋皮......我先醒起...因為我前一晚搽左重料安美露.......依家加埋日曬加超熱加溫作用....我肩頸位係達致灼傷既狀態...好恐怖!!!!!!!!!!!!!!跟住即刻搵d溫泉噴霧噴噴佢....然後用紙巾濕水full住佢幫佢降溫........................................(點解我個人成日都有呢d咁搞笑既事發生係我身上)



過左橋之後梗係要去搵番上次個糯米糍伯伯啦~~~~相隔兩年黎~~~~糯米糍價格都係加左$1咋!!!!!!$6粒~好味又抵~





原來有眉豆茶果~~~~要買黎試啦~好味呀~~




上次黎咩都無哂得番紅豆餡既糯米糍~我唔鐘意食紅豆餡都覺得好好味~今次黎梗係要試埋花生餡啦啦啦啦啦~~~~~好好味呀~~~~d料多到~~~~~~個皮做得好好味~





我就係呢個位度食食下糯米糍時個膊頭就黎灼爛~~(貞~差你無帶黑超咋~太帥氣喇呢班人~




毛寶周圍影之有可愛的貓貓呀~喵~




堆木幾靚~俾你影完更靚~唔知可以唔以cut一塊出黎做擺野食用既木碟呢~~~




咁又未夠時間番去頭先間餐廳...但又實在太熱....唔想再行黎行去~~於是要坐低叫番杯野飲~~~就呢間啦~~~旭日美食館...地址:大澳永安街47號地下




點解我地會揀呢間...因為我地俾佢係門口整緊既呢樣野吸左入去...................................




就係為左你!!!!!!燒墨魚餅 $16/串.......黑munk munk哥塊係勁勁勁好味!!!!!!比起普通白色哥隻...黑色哥個更有咬口個味更香濃!!!!!!!!!!!!!!!!!!!依家諗番起我都好回味!!!!!!




反而個咖哩魷魚鬚 $20.....就令人好失望喇.....個咖哩得個辣字無香味既




由於個墨汁墨魚餅太過好食!!!!我地膽粗粗問老闆...叫既話可唔可以全部要哂黑munk munk哥隻~佢話得喎~勁開心~下次去記得要哂兩個墨汁既黎食呀~~




飲左杯凍檸水之後我解左小小暑~之後就行番去哥間餐廳喇~~~(你地岩岩先係間小食店出黎咋喎...).........目的地就係相距兩分鐘路程既威尼斯海鮮酒家...地址:大澳永安街16號地下




除左可以問佢當日有咩海鮮可以叫之外同有d小菜可以叫~




叫左斤白灼蝦 $150....係好食既..食得出蝦好新鮮!好彈牙!




豉辣炒蜆 $90.....老闆極度推介.....但極度難食....可以話..從來都未食過咁難食既炒蜆......完全係蜆還蜆...汁還汁....一食入口....就知汁同蜆係無一齊炒過....蜆一入口...係完全無味的......連蜆既味都無!!!!就係食緊一舊擦膠咁......我真係好努力咁食左兩粒...真係再入唔到口......




大澳蝦醬蒸腩肉 $65....蝦醬聞落真係幾香既....但食落就覺得佢落得唔夠多.....我知腩肉本身係有肥肉既我都鐘意食...但都唔係成隻碟d汁都係油卦......食完真係對身體負擔好重




見佢有一魚兩吃 $160...諗住叫黎試試...點知逐吃計既...即係如果你叫兩吃就$320....好彩問清楚......我地就咁叫一吃算喇...炒斑球......老闆好自豪咁話:係咪好好食呢爽架d肉..........我地呀哈哈哈哈帶過......明明就係林個喎d肉...仲腥腥地(講明我平時唔怕腥的)





海鮮上湯浸魚肚 $70...唔想再講落去




豉絲腐乳炒生菜 $60......完全無腐乳味.....油就有一大坨




蝦醬炒通菜 $60...又係無蝦醬味......不過無味好過過重味....(早知叫灼菜仲好)




每人叫左一隻蒸帶子開心下....唔記得幾錢.......下面墊底d粉絲油淋淋我完全無掂過.........舊帶子d肉就梅既...




你都知我平時出街食飯都唔健康得去邊架啦....我都知出街食飯係重味精重油.......但問題係佢d油多到連我都驚......除左蝦之外....其他野就忘記哂佢啦...就算有人請..我都唔會再食~




食飽又搵其他野咬下先~~(係咪好變態?)....我地仲買左威尼斯門口哥檔個勁大粒魚蛋食....可以話係極度好食!魚蛋勁彈牙~原味已經咁好食~點知辣味更正~~少少辣味而且夠香~~~唔~~~諗起都回味~~~~~



再食埋成日諗起既碳燒賴尿蝦乾~$30/20個





唉....但我又揀錯檔口...呢檔掃上賴尿蝦d汁勁甜..............失望




然後行入d內街....見到呢間東京士多超得意~~~~




佢門口前面擺左雪姑七友仲有白雪公主係度~~~好搶眼~但好坐鹽feel~





仲有旁邊既霞妹霞女~佢地手上戴既係真錶黎架~




東京士多右手邊有條路仔可以行出去可以有個不錯的影相位~




而東京士多對面就係碳燒雞蛋仔阿伯呀~~~上次黎都見唔到~~




都幾多人排隊~阿伯亦都好有型咁戴哂黑超燒雞蛋仔~




我地買左一底~~~但我忘了幾錢~~~都幾好食~~有公子就認為蛋漿甜左少少~我個人就ok~




多謝你幫我影靚靚~~~對閘寫滿字好有味道好靚~但個女仔天靚~(自信滿滿)...咦!!!我個黑超有幸做你個o字呀!!!!!!我依家覺得好似授勳一樣咁榮幸~~




然後就行過少少有間正記.....地址:大澳吉慶街82號....係甜品既...行到攰攰地就衝入去食啦~(其實我唔知你班人攰d咩~~不過熱就係真既)




最正既地方係咩?就係呢個景呀!!!!!!好正丫!!!我同貞講話好似我地舊年去京都d納涼床咁呀!!




可以望住對面既棚屋抖涼~一樂也~






我地叫既甜品~豆腐花凍熱同價$10...雪糕豆花同涼粉豆花各$20




澳門食豆花興落花奶....呢個係我由細食到大既慨念.....自從上次係長洲食過就知香港既朋友食豆花既慨念係落紅糖......我梗係入鄉隨俗啦~其實紅糖口味講真都不錯吃~我都好欣賞~....不過呢間既凍豆花真係要改進下...可以話一d都唔滑.....但重點係...佢熱食既豆花同澳門李康記一樣咁滑喎.......咁到底係咩出錯????(利申呀:澳門李康記係凍熱都一樣咁滑架)




呢度最正既係可以望住呢個景食~雖然呢日有少少熱~




呢度影下哥度影下咁就下午3點左右啦~~~~實在係太太太熱喇~決定走人~




行到去大街差唔多走既時候又俾我見到.......大大大墨魚呀~見到佢岩岩整起攞出黎賣...阿哥超友善:俾你揸住佢黎影丫~..........哈哈~我最後無揸呀~~~我驚整跌人地d野就唔好啦人地做生意架嘛~~~不過阿哥超好人~呢隻墨魚好有氣勢!!




阿哥咁友善我地梗係乖乖排隊啦~




勁彈牙墨魚$45.....前兩年黎仲係$35.....價格升得都幾勁~但真係好好味食得出新鮮彈牙鮮味!!如果再有機會黎我都一定會再食~~~(好似得佢一間有得賣...近巴士站入口)




等巴士期間超熱...我發左陣脾氣...因為我真係好憎熱......(我地之後先知原來哥日係唔知幾多年以黎7月最熱既哥一日!!!!!最熱既時間就係我地等緊巴士哥時...恐怖).....我事後諗住向大家纖悔....點知大家話:係咩...乜你原來發緊脾氣架喇?feel唔到喎........到底係你地容忍力高定我個人太善良?!?!?!我地搭巴士去到梅窩碼頭~然後轉船出番中環~貞你好跳皮~








2016/08/04的開心事:
今日既工作量不多也不少!
剛剛好!
咁樣做係最舒服既!



報時:距離"七公子"帥帥出使東京之旅2016仲有---58日~
報時:距離冰島環島自駕遊之旅2016仲有---94日~~~~~~
報時:距離合家歡台北聖誕之旅2016仲有---148日~

68 則留言:

  1. 原來果日來了...香港大澳一天遊
    其實你地冇叫飯吃...所以感覺...蝦醬蒸肉肥膩囉

    回覆刪除
    回覆
    1. 哥日勁熱~~
      都可能係既..但d油都真係太多了~

      刪除
    2. 香港人喜歡...豬油送飯香口

      刪除
    3. 可惜哥d唔係豬油~~~~

      刪除
  2. 好友☁・゚♦又瞓覺嚟★*¨✬晚甜夢安睡☾。゚☆
     .∧_∧・。。゚
     ( ・ω・ )
     |⊃/(___
    /└-(____/
     ̄ ̄ ̄ ̄ ̄ ̄•*¤.Zzz
    ╔╗╔╗╔╗╦╗ ╦╗╗╦╔╗╗╔ ╦
    ║╦║║║║║║ ║║║║║╦╠╣ ║
    ╚╝╚╝╚╝╩╝ ╩╚╝╩╚╝╝╚ ║

    回覆刪除
    回覆
    1. 好友♦・゚⊹☼早晨* ҈ *午安☁*`☀
      💛*¨*💞・゚。💚。・゚゚💗・。。゚💝
      ╔╗╔╦══╦═╦═╦╗╔╗¤*¨💘
      ║╚╝║══║═║═║╚╝║週四💕
      ║╔╗║╔╗║╔╣╔╩╗╔╝。゚💜
      ╚╝╚╩╝╚╩╝╚╝═╚╝。⊹*。💓
      💟*¨◇💖∴ღ❤º°¨💙∵♡*`❤

      刪除
    2. 好友★。゚☾晚安嚟☁¨♦╠╣aΡpy週五喇喂✬*¨☆

      刪除
    3. っˆヮˆ)っ好友♦・゚☼早晨&午安☁*`☀
      ❥*¨❣眨吓眼又♥。゚♡╠╣aΡpy星期一喇喂❤ღ

      刪除
    4. 最好日日都咁好訓~

      刪除
    5. 周五放工真係好開心~~一放工有得威威~

      刪除
    6. 咁呀~快d到星期五啦~

      刪除
  3. 正記最正係個景^_^個間小菜館吾掂呀,有間好正的小菜館在橫街,好好食我食過幾次﹗

    回覆刪除
    回覆
    1. 係呀個景真係正~~
      唉呀~~~早知問下大家意見先啦~~~

      刪除
  4. 帥!七公香港篇好好蟹丫~~每一次睇你個blog都係我嘅小確幸!個blog有自己個名更係大確幸!
    一大堆的愛
    貞妮

    回覆刪除
    回覆
    1. 七公走到那裏都有射光燈射住咁耀眼~~~(誤)

      刪除
  5. 帥!七公香港篇好好蟹丫~~每一次睇你個blog都係我嘅小確幸!個blog有自己個名更係大確幸!
    一大堆的愛
    貞妮

    回覆刪除
  6. 真係估妳唔到喎........
    妳地專程入大澳食咁難食既小菜呀......哈哈哈
    不過墨魚餅睇落唔錯.有D想即刻去
    大墨魚好吸引呀......好想食
    我都好怕熱呀......妳唔好發皮四啦......唔靚架啦

    回覆刪除
    回覆
    1. 係呀~~專食難食小菜~~~
      墨魚餅堅正!!一定要食黑黑的那種!!
      大墨魚好彈牙呀!!
      我係最憎熱辣辣

      刪除
  7. 很多美食呢
    不過吃海鮮飛一定不會選大澳呢

    回覆刪除
    回覆
    1. 其實唔係為左食海鮮而入去既~不過咁岩入到去又有海鮮就....

      刪除
  8. 通常極力推薦的我都很少幫襯,除非看到實物……

    回覆刪除
  9. 哇 原來依家大澳多左咁多野食 好多都未食過
    果日真係好熱呀 ! 哈哈 好想知你點發脾氣~~~
    果d小菜真係好麻麻 蝕左蝕左

    回覆刪除
    回覆
    1. 咁你快d走一轉啦~~~
      我呀~~我咪不停扭個身然後大叫:救命呀好熱呀!!!!(把聲好mung添~~)
      勁一般...後悔~~

      刪除
  10. 聽聞, 50年前, 由澳門黑沙環去大澳的最快方法呢, 就係自己撐艇過去喎, 都係5-6小時就到了. 因為由黑沙環搭巴士出新口岸, 要成2粒鐘, 當年還未有噴射船或飛翼船(70年代才有), 搭大船要5-6小時, 到了中環上岸, 轉船去梅窩, 又要個半鐘, 再搭2個鐘巴士去大澳, 前後要11小時, 還未計等的時間.

    回覆刪除
    回覆
    1. 下~~~自己撐艇~~~暈~~~~
      原來以前去大澳係咁唔方便~~

      刪除
  11. 還有, 聽聞今天兩地的水上人, 仍然有親戚關係, 有紅白二事, 仍然係自己開船過去. 當然佢地唔敢公開兜生意戴人過來, 但係如果識佢地, 佢地都可以戴人過來, 都係1小時多少少就到. 不過, 當然唔好俾警察發現啦.....

    回覆刪除
  12. 我返來香港最大的問題, 就係所有在加記買的帽和衫褲都太厚太熱. 要買薄衣帽, 加國很貴, 香港才會平的.

    去這些地方, 我一定唔會去乜乜酒家乜乜樓, 因為大多都係自家人一腳做哂, 不可能樣樣小菜都做得好, 相反, 檔口仔只賣幾樣洒家的招牌貨, 就一定好食的.

    回覆刪除
    回覆
    1. 即係加拿大買厚野平...薄野貴?
      哥日太熱...無心機同圍搵~

      刪除
    2. BINGO, 無錯, 我前幾日買左件裇衫, 全綿厚身, $11, 在香港沒有3-4百都唔得. 我覺得大澳無間酒家好食.

      刪除
    3. 咁搞笑架原來~~咁我要買衫要黎加拿大先得喎~
      唉..原來係咁.....唔應該係哥度食中午飯~~

      刪除
    4. 你不要去溫哥華或多倫多, 唐人多, 我這裡咁平, 是因為賣淨唐人D碼, 而無唐人

      其實, 我去親這些地方, 我會食得好求其, 因為都知一定唔會好食.

      刪除
    5. 咦~你又有道理~~~
      哈哈~諗住咩都試下嘛後生細仔一大班人~~~

      刪除
  13. 如果妳唔出post,我當然會想念妳啦 <3. 啲木如果真係可以做成木碟就好啦。

    回覆刪除
  14. 大澳真係食街邊小食仲好味道,果間酒家味道一般仲要排咁耐隊先有位,真係有啲搞笑!!
    豆腐花納涼床個view真係好正呀.....
    下次排巴士前買定支冰凍礦泉水降溫就唔駛發脾四XXXD
    p.s.七公子名不虛傳陣容好有氣勢,可以預演東京之旅.....而且咁熱天氣之下影相都無人滴汗油面,全部都好帥帥上鏡,好犀利!!

    回覆刪除
    回覆
    1. 係呀街邊小食好好多囉....我仲以為好多人排住隊食好好味..點知係咁既.....
      係呀我覺得真係唔錯呀!!!幾有風味呀係哥度食豆花!!
      係喎~蠢左~
      真係好救命~~多人真係好難控制場面~~~~~~~係因為印好哂汗先再影嘛~

      刪除
  15. 我去大澳咁多次,都無妳地跑到咁多地方,碳烤雞蛋仔、糯米糍...我至like!
    咁多靚女嚟出巡一定引到好多人注目。

    回覆刪除
    回覆
    1. waakakak~~~我地要難得過到黎先去到大澳嘛~你鐘意幾時去都得啦~所以我地梗係有幾多食幾多啦~
      無d咁既事~~~~

      刪除
  16. 帥帥七公子燒溶大澳呢~~~~
    我都要去走走先。

    回覆刪除
    回覆
    1. 唔怪得哥度咁熱啦~~
      去行行啦~~食下小食~~

      刪除
  17. 咁熱其實行咩地方都會發脾氣啦!正常.

    回覆刪除
    回覆
    1. 真係好熱....哥日行商場係最岩的~

      刪除
  18. 我記得果日好X熱,出街就好似企係後巷冷氣機底下一樣,吹著熱的風

    回覆刪除
    回覆
    1. 真係好x熱...勁恐怖...咁都揀日哥日黎香港~~勁~

      刪除
  19. 一睇你話去大澳,就想問你有冇食墨魚啦!果然有整返一兜大家督下,其實佢應該唔係咩鮮貨黎,新鮮墨魚係好味好多架。

    回覆刪除
    回覆
    1. 好好味呀~
      都唔係丫~食得出彈牙有鮮味~都算係唔錯架喇~

      刪除
  20. 果個黑墨魚餅真係超正,諗起都想再食。

    我姪女就係比D無良商人呃佢話出海睇海豚,我地大人緊知無啦,細蚊仔唔知世途險惡,係都要睇海豚,搞到差D跌咗落海。

    回覆刪除
    回覆
    1. 好好味呀真係!!!如果再有機會一定要食多次~
      下!!!!!咁驚!!!!!!!!真係要小心d先得!!!

      刪除
  21. 話說我呢個香港人都係去左一次大澳渣, 個度真係太太太遠喇!!
    點解你地咁大勇氣去個度既!!
    好想快啲睇埋下集呀!!

    真係慘呀, 個間海鮮店咁差架!

    回覆刪除
    回覆
    1. 遠得過人地係澳門去大澳~~野~~~~~
      因為主席過要去~~~~~咁我地就要去~~~~
      哈哈~~下集都係飲飲食食多~

      係囉..咁遠過到黎食d難食野~

      刪除
  22. 大澳已經有30多年冇去過啦,反而馬交連續去了五年,多是坐金光飛航,貪有免費車接去銀河。我以前去馬交不用買船票,因有一中學同學在快達船公司做,好多時有贈券送,成斑人去搵何生交手過招,差不多個個都是傷痕累累的返來,只有我冇,因為何生話佢一生只怕兩種人,一是唔賭錢的人,一是死人。

    回覆刪除
    回覆
    1. wow~多謝你黎澳門~~~
      兩個碼頭都有車去銀河架~~~~~
      點會有人嬴到何生~~

      刪除
  23. 其實特登黎大澳就係為咗食嘢,但有d可惜,食咗咁多嘢只有幾樣野好食,有無失望先!
    係囉,真係唔知点解好多時凍豆花無熱豆花咁滑呢?
    你又係失策咗,仲以為你出門會勁查防晒,点知你連查咗安美露都唔記得,果日肯定又乸又慶啦,陰公豬!

    回覆刪除
    回覆
    1. 都無既~不過真係好熱~都有墨魚餅大魚蛋糯米糍墨魚冰菠蘿好味呀~算多啦~
      澳門哥間李康記唔怕架!!!凍熱一樣滑~~~~~下次黎試下~
      我有勁搽防曬呀~~不過係塊面~無理過條頸~~~

      刪除
  24. 又話變咗黑豬?你白到反哂光喎,肥肥白白好生養
    黑蚊蚊墨魚餅第1次見/聽,想試......啲小菜,睇相都覺碟碟油浸咁款
    貞公子唔帶黑超夠特別,紮起頭髮亦夠可人,佢對鞋我本身都想買對綠色.

    回覆刪除
    回覆
    1. 黑豬係去完南美je.....番左黎4個月白番少少啦...不過未白番去去南美前...嗚嗚...
      黑蚊蚊墨魚餅好好味呀下次去試下!!.....d小菜勁唔得
      好彩你無買...我有一對

      刪除
  25. 澳門有冇D似大澳o既地方?

    回覆刪除
  26. 嘩, 搵番啲相, 我已經6年冇去大澳喇!
    墨汁墨魚餅同墨魚我有興趣呀, 如果入去開跟小t食先 ^.*
    安美露嗰段好得人驚呀, 宜家好番晒未呀?

    回覆刪除
    回覆
    1. 通常係自己地方都唔會成日去呢d遊客景點~~正常~
      呢兩樣好好味~有掛住~~~~~~~~
      好番啦~哥日唔熱都即時無事~

      刪除
  27. 安美露原來有咁嘅效果⋯
    炭燒雞蛋仔真係必食,依家市區已無了,果D用電池爐整嘅,食過一次我發誓以後唔會再食!
    我想睇架,成日想睇外國人對香港嘅印象,曾經都想買本LP來睇吓外國點形容香港架~

    回覆刪除
    回覆
    1. 係呀我差d成個人起火.......
      哥個係唔錯既~~炭爐燒真係別有一番風味~
      我有時係書局都會睇下澳門旅遊書架~~~~睇下有無野食我未食過同埋有無咩地方我未去過~~wakaka~

      刪除