2014年4月16日 星期三

蛇年團年飯@新葡京8餐廳

我本身今日諗住修心養性唔寫blog的....因為之前兩日又寫blog又排馬拉行程又排澳d相....我已經玩呢d都玩到成12點幾先關電腦...加上行出廳見做緊烈火雄心....(唔係唔睇下嘛...真係好好睇喎~)...成點幾先訓~~~~但係今日遇到實在太多騎呢人...我真係不吐不快~所以又偷偷寫下blog(講到好似偷情咁~~~)



新年之前同姑媽佢地食左團年飯....少有咁豪氣~揀左係新葡京酒店2/F既8餐廳度食~之前佢有攞過米芝蓮一星的~好耐之前黎飲過一次茶...所以今次食之前我都有少少期待~電話:8803 7788...網址:新葡京8餐廳






前菜小食~幾好味~




醬皇雞(半隻) $180.....呢個好味~雞唔鞋~但攞出黎有d樣衰~




海蜇醉花蹄 $110...有d貴~無咩特別~




芥末牛仔粒 $120....呢個好味~不過有點過於濃味~濃到無哂牛味~




玫瑰蜜汁叉燒 $160.....好似成舊都全瘦咁...無咩肥...但無咩肥又無咁好味喎~成百六蚊既叉燒不過我覺得麻麻~但聽講好出名的~




燒汁牛脷 $140...呢個好味~




沙汁黃金蝦球 $360....上面係蝦加沙律醬...蝦下面係茄瓜..橙色既係南瓜汁....好無味呀...都ok既....但唔明點解要$360~




啫啫芥蘭 $120...把鬼~d菜硬到呀~




葡式焗響螺(每隻) $120...我覺得麻麻..因為佢用葡汁嘛....我淨係食到成pat醬.....其他咩都食唔到....而且螺肉少得很....我覺得好貴呢~




古法炒桂花翅(例) $750......炒得夠乾~加埋炸瑤柱食口味真係幾佳~




脆炸茶香龍脷球(700克) $800.....攞出黎時係幾有氣勢既~不過食落覺得淨係食緊粉漿咁好熱氣呢~





最後送的甜品是小葡撻...仲有一小杯甜到你震既奶茶.....睇到呢度....都睇到d野食都幾貴...但唔係樣樣好食.....所以.....應該唔會有下一次....加上....每道菜.....起碼隔20分鐘先出....悶死.....







講起都火滾...
今日有個客入到黎幫其他人做申請...
咁佢有帶到文件黎既...
不過哥份文件就未填齊...
我:唔好意思呀...麻煩你係出面填好左再入黎我幫你辦番丫(唔係我衰要佢出去填呀...只係指引要我咁做咋)
(個客應完我...照係我張檯度填)
我:唔好意思呀麻煩係出面填完再入黎我幫你即刻辦番
(個客個樣好唔順超行出左少少填完pack番d文件入黎我個counter...)
客:都唔知點解你要我出去填
我:我唔係要特登為難你既..只係..(跟住我就解釋俾佢聽)
客:之前我都黎做過幾次啦...你d同事叫我出去填跟住我照係counter度填佢都無再叫我出去咯!
我:(我聽完真係扯x哂火)唔好意思呀...咁唔係我地無叫你做係你唔願意配合咋...
我心諗....你咁大個人無野下嘛????????
咁你都講得出??
你話你第一次黎做...你唔知唔緊要..
我解釋你聽....
但係原來你黎過幾次....
仲要係明知同事叫你出去填你都唔出...
仲要懶叻咁講番出黎我d同事吹你唔脹照俾你係度填...
我唔覺得我同事做得岩囉...
你做過咁多次都唔醒目填好哂先入黎..
你自己次次俾人話你煩唔煩呀??
我唔會賣你脹...你要投訴都係咁話
咁大個人...講野之前諗清楚先啦..
或者你根本一d尊重都唔想俾我地counter同事!!
俾你搞一搞今朝都有d嬲嬲地!!
仲有個客今日係我地counter出面狂爆粗鬧我地...
唔知搞咩~



第二件事...
我媽媽今日去大豐銀行諗住買旅遊保.....
等左半個鐘先到佢...
咁個counter小姐都好好...
佢話佢填住資料先請媽媽坐一陣
跟住有個女仔岩岩攞完籌...係counter前面行黎行去..
於是引到個經理出黎問佢咩事..
佢話佢趕時間..但又要攞信用卡喎..
個經理於是叫幫我媽媽做緊野既小姐停低幫佢攞左卡先..
有無搞錯!!?!?!?!我媽媽都等左半個鐘乖乖等籌啦....
你要幫佢係都個小姐做埋份野先啦下話?
跟住我媽同經理講話可唔可以做埋我地份野先...
點知個經理仲講:咁人地趕時間呀嘛
下...人地趕時間...
我媽媽等左半個鐘就唔趕時間既!?!?!?
於是我媽媽拋下一句:咁我唔買喇..既然我咁阻你地時間...
點知counter小姐打圓場:其實我填好哂架喇~~~
其實我唔明點解個上司要個下屬幫佢打圓場...
我覺得你咁既服務態度真係.....唉~
好彩我將大豐d戶口一早cut哂~
講完舒服哂~今日衰野一大羅~



2014/04/16的開心事:
今日有有心人請我食左南屏雅叙既叉蛋治呀~~~
好多謝呀~~~好好味呀~~~~



報時:距離吉隆坡慶生自由行之旅2014仲有---1日~
報時:距離日本東京自由行之旅2014仲有---66日~
我咩都未執呀~~~去澳洲個gip我根本都未執好呀~~
所以用番同一個gip去就算喇~~哈哈~~
求求你聽日俾我一個順利的工作日啦~~~
今個禮拜仲要中中都遲收工~~~
唔該你啦~~

34 則留言:

  1. 嘩~~伯有好型呀!!!!!!!雖然第一單你都唔弱,但伯有實在堅......你仲有排學呀!!
    8我想去好耐,想影隻豬仔飯,你哋冇叫嘅?(蘇絲黃都狂插呢間嘢)
    你又飛,真係有少少唔捨得......不如你搵貞公子代筆吖,報紙續稿未到都係咁

    回覆刪除
    回覆
    1. 哈哈~我會好好向我媽學習~
      我有提出呢個係必食~但無人理我喎~~~~
      咁我一世搵貞代筆啦..你唔好睇我寫blog喇

      刪除
  2. 可以忘記啲衰嘢,明天出發去玩
    上面葡京啲菜式真喺幾貴,
    由其喺炒桂花翅,炸魚

    回覆刪除
    回覆
    1. 哈哈~~其實我係聽日先出發~
      係貴架..但麻麻好食咋~

      刪除
  3. 果然係米芝蓮一星,嗰價錢真係更加非凡人所想。哈,你份工都遇到幾多怪人㗎喎,不過好彩唔係阿蘇嗰種大支嘢兼冇品嘅人咋,唔係就比人口誅筆伐,大氣電波唱完,仲要喺fb廣傳惡行。旅遊保險一事,比着係我,即時轉身走人,搵個第二間買。最後,祝你馬拉之旅愉快。

    回覆刪除
    回覆
    1. 無錯~但我覺得貴得黎麻麻~
      其實好多時都有既....不過就無一個阿蘇咁出名既黎踩場囉~~
      哈哈~我媽想呀~不過佢又唔想小姐填表苦心就咁無左~
      謝謝你~~

      刪除
  4. 咁即係返埋聽日又飛啦,開心c啦!

    回覆刪除
  5. 有冇搞錯呀個經理 真係傻傻地~~
    個個人都趕時間架啦~咁仲洗排隊既??
    我都成日叫D人去後面填好FORM先再過黎~~~!! 感同身受 ~

    回覆刪除
    回覆
    1. 直情好離譜!!!
      咪係~~多謝baby撐我~

      刪除
  6. 我去大陸玩兩日一夜咋 *゚大家快樂旅遊喇

    回覆刪除
  7. 嘩...脆炸茶香龍脷球(700克) $800...勁貴呢

    回覆刪除
    回覆
    1. 真係好貴呀~~~所以應該無下次了~

      刪除
  8. 天價~~~~~~~~~XOXOXOXOXOXO
    好鬼死衰格!!!佢趕我唔趕,就算我唔趕,你係米應該要好有禮貌問我介唔介意俾哥位小姐先呢??真奇怪!為老不尊!點做人經理丫

    回覆刪除
    回覆
    1. 好貴呀~~不過唔係我俾錢~~
      係啦..山頂睇門診都係咁啦!!!!唔岩呀咁!!!

      刪除
  9. 咁貴又唔好食、真係食裝修。我想問下新葡京係咪冇咗(自助山)~~冇得自助餐呀
    祝妳旅遊愉快、食得開心

    回覆刪除
    回覆
    1. 其實我之前食過..不過係飲茶...我哥時覺得唔錯的!!!
      應該係...好似執左呀
      謝謝

      刪除
  10. 嘩,巧貴呀d嘢食,海蜇醉花蹄 $110,唔係化,貴到..................
    唉,今日我嘅工作都不順利,俾個無理上司吹到啤啤聲,佢心情唔好竟然搵我地出氣,仲係有d無理性果隻,當時返緊工真係好嬲同氣頂,收工後同d同事講返又覺得得淡笑,哈哈......但明天還是要繼續.......所以你都係呀,呻完就算啦,無理嘅人真係無處不在
    Aunt 有性格,like爆佢!!!!!!!!!!!!!!!!!
    係喎,点解唔上網買旅遊保??

    回覆刪除
    回覆
    1. 真係幾貴呀d野食~~~~~應該無下次~
      咁又係呀...有時工作唔開心既野...唔開心一日就好喇...過左哥日講番..又可能覺得好少事~仲變成同朋友閒談既笑話~
      哈哈~~我仲有好多野要跟我媽學~~~~
      因為....我懶...之前有人幫買~~~我未試過上網買~~~

      刪除
  11. 8 係我喜愛餐廳之一, 我覺得不錯, 必食乳豬飯, 你叫的菜式我大部份都有試過, 介蘭我食戈次又ok喎, 一d 都唔硬, 可能個chef水準唔穩定卦, 哈哈, 有味石榴雞都唔錯架, 不過我同意杯奶茶, 確實係甜到震, 朋友笑說其實係要自己加水飲先啱味道 :)

    回覆刪除
    回覆
    1. 我有提出叫乳豬飯呀~~無人理我~~~
      我之前都飲過一次茶..覺得都幾好味的~~不過哥次真係太失色~~~呢個價錢換黎呢d味道~~
      不過哥日真係有好多人團年...可能廚房應付唔到啦~

      刪除
  12. 其實個經理係咪識果個女仔?

    回覆刪除
  13. 唔好嬲,嬲得多唔靚女架喇!

    回覆刪除
  14. 我之前去食過lunch都ok喎,不過你lee餐都幾唔抵,又貴又唔太好食。
    唉,嗰世界咩人都有呀,俾著我都嬲,話就話為lee啲人嬲唔抵,但我都會忍唔住囉,不過就真係嬲一陣,發咗出嚟就算~~

    回覆刪除
    回覆
    1. 我都係食lunch ok呀~~不過哥日好多人團年...佢廚房應該搞唔掂~
      係呀~我將呢件事同左3個人講之後~就無野喇~

      刪除
  15. Hi小T、新葡京d嘢都幾貴喎!最慘d食物又晤o.k.!仲每度菜要成二十分鐘先出!比我一定投投囉!唔使咁勞氣!真係咩人都有架!放咗工就開心番喇!妳媽咪真醒!真醒!話番個垃圾經理!我都覺得有冇攪錯!伯母都排咗半個鐘喇!如果是我一定鬧到個經理九彩同投訴喇!好啦!明天妳又去旅行喇!玩得開心d喎!一路順風!bye!!!

    回覆刪除
    回覆
    1. 真係出得d野食好慢..應該無下次

      刪除
  16. 哈哈哈 ...... 您同我的命運都是一樣!成日遇上好多騎呢人 ~~~~~~~
    我最想試燒汁牛脷囉~~~~~~~
    一路好玩!

    回覆刪除
    回覆
    1. 哈哈~~我日日都會遇到的~
      哥個都唔錯既~
      謝謝你呀~

      刪除