我的生日會2018+媽媽生日會2019@京花軒

星期五....呢日生意額唔錯~本人甚是滿意~放左工去左攞之前狗仔堂張證書~然後...去左食棽莜~星期六....中午人地諗住試金非豬潤麵..點知今日臨時唔開!!!!勁失望!!!!!於是求其係美食廣場食左個海南雞脾飯~但唔好食~下午又執下野啦~夜晚行左陣威尼斯人~晚飯食左鼎泰豐~~再加糖朝盛世芋圓~~滿足~~.......星期日....一早貢左起身....中午食左食味方丈外賣~下午執左成個下午相簿...我唔係講緊電腦哥d相簿呀!!係堅曬出出黎哥d相簿呀XXD....毛寶仲幫我一路執一路笑~~~夜晚痴痴貢~~星期一....一年一度既7月1日~~萬人空巷啦梗係~~~~~不過順利收工....已經好好啦~理你今日有幾多人丫~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



2018年既公子生日會..我諗呀諗呀諗~到底要大家去邊度幫我和杯慶生....最後揀左我想試好耐既京花軒~~係永利酒店入面既米芝蓮二星北方中式美饌餐廳~~~~電話：8986 3663....建議係外圍搵路入易搵d~係星際斜對面....係入面行搵黎搵去都唔知點行好~





好似當時我地訂位係想訂房的...但好似當時係國慶黃金周....所以比較多人訂~訂唔到~所以只可坐大廳~其實大廳環境都唔錯的~(呢張相係我地就黎走既時候影..因為其實幾多人食~唔好意思一開始影).....不過真心一講....當侍應開門攞野入d房既時候......我地聞到有煙味囉.....乜.....可以食煙既咩?




坐窗邊也不錯~不過容納不了7人~




同埋一入黎哥時已經見到呢架甜品車!!!好靚呀~~~唔通係好似西餐咁樣有得揀petit four???心跳~~緊張~~刺激~~~好精美~~好高級呀~~心花怒放中的少女~~~






餐具~




先來一個迎賓既茶~~個茶本身裝係高哥個杯度既~~




之後再用矮杯吸住佢反轉.....先有鼻聞下高杯留低既茶香...再用矮杯飲茶~但我好廢...無記低係咩茶~(大家都應該對我無咩期望~)




查實呢個位有件趣事發生....就係飲緊呢個茶時發現有隻烏蠅飛黎飛去....最後落係毛寶隻花碟上......有隻烏蠅係自己隻碟上Lan下Lan下喎...米芝蓮二星喎無理由唔出聲丫....話左俾侍應聽之後.....以為佢換碟je....冷不防佢一手攞起小茶杯下既木碟直接係我地面前"烹"一聲吸落花碟度....嚇到我地成枱人彈起~~~~~手起刀落............



好喇~飲完個茶就研究下個餐牌~~望完個心都定一定~係繁體字黎既~(如果唔係我會覺得好吉眼)




我地叫茶飲....有人直頭推住車出黎幫我地沖....但老實講....加茶不夠勤快....往往我地飲到見哂底佢都未幫我地添...同埋有時加落黎既唔係熱茶....扣分........加茶哥方面我覺得玥龍軒真係100分~飲得你又舒服又開心~(成日偏幫玥龍~我鐘意呀~全部我都自費去食既~吹咩~)




我叫左重焙鐵觀音~$50/位......我地叫既茶都係$50-$80...當然有d更貴既茶啦~




先上送既前菜....有鮑魚同蜜梨....華!!!好高級~~~仲好有視覺效果~~~~~





而且都有姿勢有實際~好味~




陳醋伴蜇頭...$270......華!!好貴呀!!!!!但真係勁好食...佢隻醋好香....而且勁入味.....俾公子秒清!




譚府烤叉燒...$110.....都幾好食~又估唔到呢間二星d叉燒咁平~但係你問到我我梗係話玥龍軒既好食d啦~(其實巴黎軒同紫逸軒的都不錯~)




珊瑚白菜卷....$80.....用d菜包住芒果...酸酸地咁既...但我又覺得麻麻je~




四川口水雞...$120.....好味~風味居哥個都好好味~




拍瓜拌粉皮....$80....呢個好味呀!!佢個醬有少少wasabi味的!!




乾拌紅油耳片....$110...我記得幾好食~但幾辣下~食完呢個之後有人要叫可樂解辣~




特色鮮果咕嚕肉....$150......ok...但未到好好食~(查實澳門仲有邊度整呢個係好出色既呢?我記得好耐以前食過一間氹仔既中式酒家整得好好食...唔知有無退步呢?)




我地係時令精選哥度叫左個魚湯蘿蔔煮蟶子皇....$180/份....我地好似係叫左兩份黎share~圖中為一份~





蟶子都幾大條~每人分到一舊咬下~蟶子皇幾鮮味~蘿蔔夠淋又入味~魚湯襯熱食哥時都有少少腥~




火爆和牛伴蘆荀...$390....咦...又幾好食喎..牛味濃~




京花茶香脆皮雞.....$190....我覺得個皮都幾脆既~同埋d肉都幾滑~但茶香哥方面就.....唔係好覺~我估呢度應該有半隻雞~






成都麻婆燒豆腐....$110...我無咩印象...可能我假試左一兩粒~~




一路打一路諗點解d野食寫極都未寫完既XXD.....天府宮保大蝦球....$370......佢話一碟得六隻...話幫我地做7隻好無..我地梗話好啦~我以為會多一隻佢會加一隻錢..點知又無加錢喎~XXD....呢個唔錯呀做得....蝦球又大又彈味又好~仲有佢旁邊哥d夏威夷果仁係最好食的~





時令菠菜苗...$100....好味




鼎湖炒鮮奶....$190......我好似無食...因為我好憎炒鮮奶XXD....成日覺得好地地鮮奶飲咪飲囉做咩要炒XXD....如果佢係甜既就更憎...餸喎...甜架喎!....如果係咸既又會諗....咸既使咩食鮮奶呀..食蛋白咪得囉XXD查實咩都係我講哂~個龍門係我度~




濃湯金鉤燒津白...$110....這個也很不錯~因為d菜煮到好岩阿婆食~同埋d湯夠入味~




蔥花脂油餅....$60......圖中為兩份.....但我不喜歡...因為佢質感好軟好phere....我以為係香酥feel




生煎大蔥豬肉鍋貼...$70..............我好鐘意d鍋貼煎到成個網咁......有好幾間都會做到咁.....但我認為整得好食既...記憶中好像是滿堂彩~(但我好久沒吃過)




好野~~~終於食完正餐喇~~~真係有petit four呀~~~~~~




我地揀左呢d...每人可以揀3款~梗係咩都試下啦~個綠茶朱古力不錯~~~~個小糯米糍都不錯~無記錯既話好似係黑芝麻味~





然後到蛋糕環節~~~~~(無記錯既話如果叫永利餅房既蛋糕才可切...其他只可帶入黎影相不可切)






多謝多謝大家~~~~~






一系列的合照.....另一個感動位係：今次永利個蛋糕唔難食!!!!因為次次永利個餅房d蛋糕係非一般既難食!!!係難食到要皺眉......呢次係一個例外...入到口!








毛寶話我地兩個好似切緊結婚蛋糕咁甜~希望每年都可以一齊慶生~咦~上幾年30歲時就話係我倆60大壽喎....咁今年35歲生日咪70大壽XXXD




我要介紹下呢張生日卡呀!!!一打開就超心甜!!!!!!!好衰架!!!!!!!面紅喇!!!!!!!!主席整架!!!!!!以~~~~~~~~~~~~~~~~~





呢餐食左$3,701.5......人均$528.8.....平唔平呀?唔平架!但幾好坐而且野食都唔錯囉~話哂都米芝蓮二星~




好喇~又大一歲~要成熟點~但又要童真點~最緊要開心點~同埋身體健康~多謝各位幫我同杯子慶生~<3





哈哈~就係食完呢次覺得唔錯~所以今年媽媽生日我就帶佢黎試下啦~




媽媽話佢好想飲白酒喎~咁咪飲囉~...我好似出去單點一杯白酒未試過咁貴(我飲開Cheap野嘛~)...來自法國的白酒....$180/杯...又真係幾好飲~




我同毛寶都係飲茶~我都係飲鐵觀音~




我地今次少人d~得3個人~坐到窗口位喇~前菜同上次一樣~鮑魚同蜜梨~





都係叫番上次食過既陳醋伴蜇頭...$270同譚府烤叉燒...$110...因為好食~




陳醋伴蜇頭貴得黎真係好食好入味~佢出到黎無水流流浸住都入味~今次排得靚過上次~(你拉番上少少睇就知~)




天府宮保大蝦球....$370.....上次幫我地出左7隻...今次照出番6隻就大隻過上次既~~~~不過上次可能叫左少辣..今次叫左正常辣...係好味既...但係個辣度過左我條線XXXXXD...我下次會叫番少辣~~(我以為我自己好食得辣~)...記得!!旁邊d夏威夷果仁好好食~




火爆和牛伴蘆荀...$390.....又係擺盆靚過上次~不過舊牛...又係無上次咁好味~




白灼茭白荀伴貴妃蚌...$390......我見我媽鐘意食茭白荀所以叫...因為我平時麻麻貴妃蚌~點知佢呢個貴妃蚌又灼得剛好又鮮美!配上少少蒸魚豉油既物體~好味~




蟹肉筍衣伴菜苗...$180.....咦~呢堆筍衣原來同上面個茭白荀一樣架?早知我就唔叫上面哥個餸啦~




最後....我係呢度訂左蛋糕呀~~~~~生日快樂呀老夫人~~~笑得幾開心~~~~係呢個訂蛋糕位又發生小插曲...我打去總機訂枱時話有人生日想訂蛋糕....點知佢話其實代我去永利個餅房訂...要我去食飯前去交左錢先.....然後我話我唔得閒去交錢喎...可唔可計埋落我食飯張單?佢話唔得....咁可能佢驚d客訂左又唔去食飯無人俾蛋糕錢我都明....咁我又問：可唔可以網上交錢?佢話無網上俾錢一定要親身去俾錢....呢個世代喎...你要我俾左錢先...又無網上俾....勁唔方便~~~~~大佬~~日日都要番工邊得閒特登去呀~又無朋友係永利做~~~我去咁多間酒店慶生都未試過要咁樣親身去交錢~~(就算唔係送蛋糕要自己俾錢既酒店都唔會要我親身去俾錢)......咁我退而求其次諗住俾切餅費買出面既蛋糕入去啦...點知佢又話：唔係永利餅房出既蛋糕入到餐廳只可以吹蠟燭..唔可以係哥度食.......佢話餐廳係我訂枱哥日係公休....話之後再叫餐廳覆我.....我諗住如果餐廳俾番同一個答案我....我就會答：算啦~你當我無講過啦~無人生日喇~因為係你地度慶生好麻煩呀~~~~~~(其實佢如果咁麻煩我係諗住轉餐廳..因為餐廳當然可以有你地規定...而我都有權選擇配唔配合你...唔配合我最多唔食je~)........正當我準備好答案餐廳打黎時：哥日我地幫你訂左蛋糕喇~......我：...咦~但我唔得閒黎交錢喎~.....餐廳：唔使架~我地會計番落你黎食飯哥張單度架~.............咁先係做生意架嘛~俾個讚你今次~果然係米芝蓮二星服務~幫我解決問題~







媽媽係鬼妹...食完飯要黎杯double expresso...$53...佢話唔錯~




又黎自選petit four~~~~~~





今次食左$2,564.1.....人均$854.7.......我覺得今次服務好過上次好多好多!除左訂蛋糕位....整體服務好過上次我生日哥時....因為上次去係國慶黃金周....超多人食~~d侍應應該有d應接不暇...呢次就復活假無咁多人~~服務即刻貼心哂...又不停同我地講笑...........但..........................今次野食無上次咁好食...我上次好欣賞既牛粒我唔會再掛住....不過媽媽未試過所以我想帶佢黎試下~短期內不會再去~








2019/07/01的開心事：
話咁快原來今年已經過左一半!!
上星期有個讀者send whatsapp msg俾我..
話多謝我寫旅遊blog...又話好好睇寫得好生動...
呢樣哥樣咁樣....又話好似跟我去左一次旅行咁...
好多謝呢位讀者既讚賞~
但呢位讀者係一齊同我去旅行的XXXXXXXXXD



報時：距離九州自駕遊之旅仲有---96日~
報時：距離宜蘭聖誕親子遊之旅仲有---171日~