和歌山嘆溫泉自駕遊之旅2018-06-19第二天Part 3(陰天及後轉雨)

星期二.....短暫的回到自己哥邊一天.....今日落落大雨呀....點跑步je~可~星期三......又過左隔離哥邊坐機~又落大雨.....又唔使去跑步......大家覺唔覺得今年既夏天特別多雨落?....星期四.....來一杯長黑....讓我放鬆今日既心情....今日的確要一杯我最愛既長黑黎開展呢一日.....係隔離哥邊仲要超多野做....小朋友們....暑假今個禮拜放完架喇....下星期要乖乖地番學喇...唔好黎搵靚姐姐喇~拜拜~.......好啦....捱埋聽日je~~~~學完架喇~~~~頂埋聽日啦~~最多聽日收工食重肉啦!!!!!!(唔講唔覺...原來我今日早午晚餐都不經意的無肉食)



2018/06/19
Day 2---Part 3(日本,和歌山縣,和歌山市 Japan,Wakayama Ken,Wakayama Shi->白濱町 Shirahama chō)
咁影完一輪間房....我地就會合埋毛寶爸媽去望下個溫泉先囉~因為我地唔夠時間浸呀.....我地要6點食飯嘛....咁咪望下先囉~想有日光時望下個溫泉咩樣....而且佢幾犀利下...有好幾個溫泉~....有一個男女混浴的~~(尖叫).....一個男的浴場...一個女的浴場.....仲有3個貸切露天風呂!勁!





男女混浴既唔使驚~浸哥個有專用衫著架~男既遮住下面~女既類似著左裙咁既~如果浸男女混浴的~記得攞衫~




然後3個貸切風呂好正架!!!!拿....你黎到呢個位....就會見到呢3個貸切風呂有無人用緊.....如果仲有鎖匙係度就代表無人用緊你攞鎖匙去用就得架喇!!!!梅香の湯無人用緊呀!!!好興奮呀!!!因為上網睇呢...呢3個風呂係經常有人用緊架!!!依家竟然有一個無人用!!!!!!!點解我唔係食19:45哥場呀??唔理喇....攞鎖匙去參觀下先!




如果係浸男浴場或女浴場都係唔使出室外既...但如果係3個貸切風呂或者男女混浴既話就要經呢條石樓梯落....由於你由一入館已經除哂鞋~所以出呢個室外位.....你就要著佢哥d木屐行......係勁難行......d石樓級岩岩饞饞....毛寶著中哥隻.....仲有d濕濕臭臭..................................(之後換左另一隻)




威下先~攞到梅香の湯鎖匙~




好辛苦咁先落到第一個貸切風呂~原來第一個就係我地攞到鎖匙既梅香の湯~~~~~~~好緊張呀~~




華!!!!!!好靚呀!!!!!!!!!!!!!!!!!!!!!!!





呢個原來已經係3個之中最細架喇!!!!其他兩個好似唔係木筒咁架係石既溫泉~~~但我覺得呢個已經好靚!!!佢望出出面係海同埋一級級既岩石!!!望住地質野浸好有氣勢~如果一家人浸一個木筒我覺得好正~






另外呢....要再落.....落到最落先係男女混浴溫泉....但我諗住入去望下....但個地好濕...我又唔想濕到隻腳.......同埋著住普通衫行出去溫泉又唔係咁好~所以我放棄左去親眼望望......俾大家睇睇官網圖片啦....點解我會咁想望....係因為係無遮無擋向住海........超!勁!靚!的!~~~~~~~~~同埋如果好天既話仲會係溫泉睇埋日落....超級視覺享受~





給大家參考一下~佢不同溫泉係有不同溫泉水~




算囉~番房換衫去食飯喇~如果唔係我家陣係梅香之湯舒舒服服浸緊溫泉............唔記得講...佢地呢個溫泉好似外面有自己既花園架......好似幾靚咁.....但雨落得有點大....我地都係就此算了~(落雨真係好掃興~)...d繡球花好靚~呢張係行番房時隔住玻璃影的~




哈哈.....我俾呢張相俾衰婆睇...佢話好想打x我~~~我認我自己著浴衣係搞下笑~一d都唔襯~~~~尤其著埋對襪.....勁醜~~.....因為我係唔會俾自己赤腳在館內行...我接受唔到~件浴衣我特登攝到咁短~好驚行路仆x~




整理好就過去臭埋兩老去食飯啦~...又著得幾靚喎!!!點解得我一個著得咁醜?(睇下笑得幾開心~~~)




定係毛寶都著得好醜呀~




去番大堂有條樓梯上去食飯既~(我就搭左lip既其實~~哈哈~~)




餐廳有兩間.....可能分開牛餐同海鮮餐兩間唔同既餐廳~




一坐低就有兩兜野ready係度~同埋有今日既餐牌~





坐定定佢就遞上一張餐牌狀既物體...叫你揀止肴要豬既沙律定係茶碗蒸~梗係茶碗蒸啦~~同埋最後既食事要飯定麵~




我地揀完之後就揀埋野飲~我心水都係梅酒類架喇~因為我係少女~我喜歡甜甜的酒~




我叫左杯蜂蜜梅酒~900円=55.4hkd.....幾好飲~另外3位都係叫梅酒~不過叫另一種同我唔同既~




飲杯~~~~~~~




係咪好想知係咩呢~唉呀..好喇好喇...開俾你地睇啦~冤氣~(人格分裂的blogger)




華!!!!!!係一隻幾大隻既鮑魚!!!仲郁架!!!另一個就係牛肉~~~~





先上食前酒~~先付け同埋前菜~~~影張浴衣合照先啦~~~




食前酒都係梅酒~同我叫哥杯唔同~都幾好飲~




先付け同前菜~(原來先付け多數都係豆腐)....都幾繽紛~好多野食~個青梅蜜煮幾好味~清清甜甜幾開胃~胡麻豆腐口感很綿滑...好好味~(有無知咩叫好綿滑?XXD).....雖然都唔錯~但我又嫌唔夠精緻~(你睇完後幾日哥d就明架喇)








凌ぎ同埋造り一齊上~




造り有鮪魚~~唔知咩白身魚~~烏賊同榮螺~~~~全部都好味~我最鐘意係白身魚同榮螺~








凌ぎ就呢幾樣~但呢個一般~唔太突出~




係我地一坐低食緊先付け同前菜既時候其實佢已經點左火架喇~~~




咁依家就剛剛好可以食啦~~~~~燒き物係鮑魚呀~~~~烤得軟軟的~~都幾鮮味~~~仲幾招積用刀叉食~~~佢有兩個汁點既....有個係檸汁另一個忘了係咩....但其實唔點汁都好好食~





台の物係主角熊野牛呀~~~~~~~~~~好靚呀~~~超~~~好味~~~~~~油脂好好味~~~~底下d烏冬都好正~~~~食到黎呢度我已經有少少飽~~~





油物係炸魚~點少少梅鹽食唔錯~




看先生夫人也吃得很滿意~




止肴二選一我地4個都係揀左雲丹茶碗蒸~唔錯~






食事我揀左烏冬~一般野無特別~




毛寶揀左蒸飯!!!!!超香!!!!飯上有蝦仔!!!!超好味~~





最後水菓子~呢part最差....兩樣又難食又甜...完!




食飽飽就問定我地聽日早餐想食和式早餐定洋式早餐~




食飽飽走時見d人走咁d先影下餐廳~呢間餐廳其實個景幾靚架!向海架!有d位專係向海的!...不過排排坐向海就兩人食會岩d囉~(食飽才7點過d)




食飽飽睇下旅館入面既手信店~但無野岩我買~




行過今朝大堂哥個位原先放迎賓梅汁哥個位夜晚換左備長炭活性水~試下~無咩特別味飲得出~~哈哈~




之後就番左房入面休息下先啦~因為食到好飽又飲左酒~~~坐下先再浸溫泉~休息緊哥時我就執下今日既戰利品~~最多係賢者~~好興奮~~




我想再俾多個近鏡佢!!好彩幫佢影左咁多張相.....因為...係呢個時候....有人........整裂左....我最鐘意哥隻..................我唔講!!我係唔會講哥個係邊個!!!!!我唔會!!!!嗚!!!!我都有帶佢番澳門!!!




坐左一個鐘度....休息得差不多~我地又換衫出發去浸溫泉啦~~~~~~我地放棄左靚靚浴衣~因為實在太煩~~改為著舒適d既房內一早有既兩件頭浴衣(講到兩件頭泳衣咁).....但一著上身.....奴隸樣出哂黎~




你話喇~似唔似古代店小二喇.....呢~佢去送外賣喇~




同我係公司既地位一樣.....兩個做苦工的下人~




露埋樣仲衰~~~兩個乞衣仔~~~~~~~~~~我真係想問下....係咪要靚到李佳芯咁先會著得好睇?....帥到仕燊咁先會好睇.....我就係奴隸乞衣仔?...一件衫都可以玩咁耐~




點都好~~~點醜都要去浸架~~由於天入黑哥條石仔路得極微弱既燈....怕兩位老人家行得辛苦(其實我自己都唔知點樣著住對木屐行落去再行番上黎)....同埋咁黑咩都睇唔到啦!...就咁浸女湯算啦~我真係不得不讚毛寶爸呀!.....毛寶媽就話第一次浸怕怕醜醜叫做有我地帶住陪下傾下計....毛寶爸佢第一次浸全脫光光.....仲要本身我覺得佢有少少怕醜之下....我地同佢講解左有咩要注意...有咩要浸溫泉前做...就係男女湯門口說再見了吧就分開行~......佢真係肯試第一次!!係呢度...我要讚佢好叻仔!讚!




入左去唔影得相嘛~所以相片from官網俾大家參考下!....佢呢...超大方....入面有一筒梅味磨沙鹽俾你任用......老實說!!!超級好用!!!!!!!用完超!!!!!!!滑~~~~~有機會去真係要磨一磨!!!!!!我都係人地個blog先知~~~~~~~呢個係室內既~]




呢個係室外既風呂~~都好正架~~~~~~好舒服呀~~~(可惜當時有雨~)




浸完出番黎見到毛寶爸在乖乖等我地~~~~~.....有個公共休息區既~哥度朝早有提供益力多~夜晚就提供雪條俾你一路休息一路食~不過我無食~






行過紀念品店入面見到頭先用既梅味磨沙....1,890円=116.2hkd.......有興趣既可買~真係好好用~用完超級滑~哥晚我好迷戀咁狂摸我自己~




然後入左毛寶爹娘既房~我地開餐~食左我地中午買既6個大桃~~~~~~真係好大!!!好抵食~~~我地每人食左1.5個~~~又大又甜又多汁~~~~~~~諗起都想食~(所以哥晚無再去食免費拉麵宵夜~)








2018/08/30的開心事：
學埋聽日架咋!!!加油呀!!!!!
雖然我知學完隔離既野仲有樓上既野要學....
2018是"無盡"的學習生涯.......
識我既人都知我最憎學習新野...
我淨係鐘意食新既野架咋:目



報時：距離與毛寶慶生泰國食揼嘆之旅2018仲有---28日~
報時：距離天團蘇格蘭高地之旅2018仲有---44日~
報時：距離鳥取自駕遊之旅2018仲有---92日~
唔知點解得番3個報時有少少空虛呢~
可~
估唔到....
我睇完仕燊過左差唔多一個禮拜喇....
我又好掛住佢喇....................
點解d時間突然過得咁快咁既?