和歌山嘆溫泉自駕遊之旅2018-06-18第一天Part 2(晴天及後轉雨)

星期二.....噚晚訓得麻麻...上星期既喉痛依家轉為咳...所以我狂咳狂醒...我想紀錄一下...我今日係下午兩點前...痾左3次正常屎...特此表揚一下我勤勞的屎x~夜晚7點半掛8號風球...為免我媽憂心...暫停跑步一天...但我的肚腩好大..好想跑步去~星期三.....飲完我最愛既長黑我以為我可以開展我美好既一天~點知聽完9分鐘理論我淨係想問一句：你到底當我地係咩?!.......唔開心呀唔開心呀!!!.....放左工跑左3.54km......出左身汗....舒服番d~...星期四...........又過左隔離學野......我好攰(但我亦唔排除可能係我食左感冒藥好眼訓).....我星期五晚要食重肉囉!!!!!!



2018/06/18
Day 1---Part 2(澳門 Macau->日本,和歌山縣,和歌山市 Japan,Wakayama Ken,Wakayama Shi)
係酒店放低行李又再出發啦~首先第一站係和歌山城(わかやまじょう)~轉早左一個路口~呢個停車場係旅遊巴既~遠影一下你先~hi~




和歌山市其實無咩好睇~呢個應該算係比較好既選擇~其實我揀呢個景點去下係想第一日有少少做下咁架咋~叫做俾老人家同人講下去過和歌山市既某一景點~~~~遠影過下相~~~(好似d呃錢既旅行團咁~~)...地址：和歌山縣和歌山市一番丁....和歌山城停車場Mapcode：35 185 748*16......係有料停車場黎架!(有料=要俾錢...係出既時候自助附費...200円=12.3hkd)....泊好車一落車係完全見唔到和歌山城的.......er...有無去錯地方....之後見有個指示牌就跟住行啦~




咦.....唔對路喎...咁多樓級既...好驚呀..我無諗住要老人家行樓梯架.......我呢個領隊諗住遠影架咋喎!......我率先行快d睇下係咪真係有和歌山城此景點存在先....兩大條樓梯~我自己都行到有d扯蝦.....




華~~~好彩唔係一個都市傳說咋嚇到我丫~~~但係樓下真係望唔到~~d樹擋住哂~~




不過上到黎淨係可以近影佢囉~無得影人+遠既和歌山城!




呢度仲可以望番和歌山市~




我地黎到哥時好似係5點幾...佢已經關城~(好彩我無諗住俾團友入城參觀~~此團不包~)...咁都送上入場費..同埋和歌山城案內圖俾大家睇睇啦~






原來今年係重建60周年~




近影留念~






諗住跑去另一邊睇下可唔可以行遠少少影個遠景....但行左一陣發現要氹氹轉落山狀.....算喇...我唔想行完落去又行番上黎呀.......然後毛寶又話獎我同我影張相喎...你人真好~我好開心~多謝哂!





臨走時看到了這紀州南高梅樹...我只想到了梅酒....(誤)




係停車場出車時經過紅綠燈位....見到隔離有個超小型的和歌山城!!!kawaii呢~~~




好~~出發去下一站~~Aeon Mall Wakayama...地址：和歌山縣和歌山市中字楠谷573....Mapcode：35 363 607*54.....就係呢個時間個GPS無啦啦收唔到訊號傻左~完全無哂指示...搞到我地過哂無出到出口...仲見到架車方向直衝關西空港~~~~好彩我地仲有Mapsme~~~~~見到喇~~比預定到達時間遲左半個鐘~(你知啦~~好難得和歌山有間咁大型既商場俾我行下架~~~少左半個鐘行街好慘架~~)




有大型停車場~呢日唔使俾錢~~~(定平時都唔使?)




唔知點解呢種野飲機令我覺得有少少霍格華茲feel?




有成3層~~~都幾大幾多野行~~~~~~~





我之前已經上網睇定有咩想行~(哈哈~因為唔係好多時間行街~~)....一落電梯已經見到我最想行既Kiddy Land~~超音鼠咁衝埋去~~~




華~~~係小櫻呀~~~~但我已長大...係睇下就算~~




仲有蛋黃哥~~~仲要係半價區~~諗緊佢點解咁慘時....係喎....家陣6月....佢仲係萬聖節咁既樣...唔怪得俾人咁被半價啦~~~~依家寫緊blog先諗....其實過季都可以買黎送俾凱公子je~我真係一個可愛的傻西瓜~





如果早幾年我應該會死係呢d無聊野度：好可愛呀~好想帶佢地番屋企呀~




最後這個克制的傻西瓜只是買了這3隻東東俾係美國回澳探親的表兒甥們.........我真是一個棒棒的表姨姨~




同埋買了個出色的頭套俾孖八!!!!!!知唔知我抽中邊個???我又抽中我最唔想抽中哥個~~~~






我知你地好耐無見孖八~~~我特登叫朗公子幫佢戴上然後影相送俾大家睇~~~~~係咪好靚仔呢~~





下一站...孝順女帶媽媽去配眼鏡~咁岩呢度有J!NS.......陪佢地配眼鏡時...個店員望一望我.....問(英語對白)：你個眼鏡係咪係J!NS度配架?......我：(雙眼睜超大狀)係呀!!你好勁呀!!你咁都認得?!?!?.......店員：你係邊間度配架?...我：東京~~~.....店員：Arigatou!!........我知專業既店員都應該要認得自己店鋪既出品....但我戴緊哥副其實個款又唔算特別喎!咁都認得我覺得好神奇!!佩服!!!!!!!




襯佢地睇緊眼鏡時我鼠左去沙北~因為我想睇下有無新口味既布甸~點知無~哥期出緊既新口味飲品




無啦啦行過見到....喂!!!!!!!!!!!!!!!!!咪我出發寫左係必買清單入面既米少女眼藥水~~~~~~~~~~~~~~~野~~~~




話實在我都唔知公價賣幾錢....為免錯過以後又遺憾~~~我唔理喇~~~~~~~~~~




重點我要買這個...眼藥水+眼藥水盒.....1,200円(稅拔)=73.8hkd.....好靚呀~~~~~~~~(好像當時的澳門代購價是150mop)




另外仲有單支眼藥水買~~各298円(稅拔)=18.3hkd.....好靚呀~~~~





再衝去上一次買過後好喜歡的Mont-Bell~




呢間都算係幾大~~~~今次我既主要營養任務是幫衰婆睇行山杖~~~因為佢之後有個要去行山既旅行~~~





哈哈~~同埋我要衝埋去無印良品呀~~~~~




我又要買魷魚呀~~~~~好好味呀~~~~~100円(稅拔)=6.2hkd......我想講.....個賞味期限係仕燊bb今年既30大壽呀~~~~(sunny真的很年輕又有才華又帥氣.......下刪無限個優點)




除左魷魚之外我喪買潤唇膏!!好好用~~




好喇...行完街街喇....(其實仲未行飽...但係已經9點....賣野既鋪已關門~~~係食肆收遲少少...所以我地喪行完先食野...佢戶外哥邊有好多食野既餐廳~~~~




我地最後揀左呢間~係食釜飯既!!叫五穀




由於已經9點...所以無咩人~~~~




鹽燒牛舌定食....1,680円(稅拔)=103.3hkd.....鹽落得有d唔均勻...有d好咸~有d無鹽~有d又有d硬~唔硬哥d係幾好味!




汁煮金目鯛定食....1,480円(稅拔)=91hkd.....仲寫明係數量限定~~~~呢個好好味呀!!!!!





燒魚定食....1,330円(稅拔)=81.8hkd....呢個都好好味~





仲有個鯛釜飯定食...1,280円(稅拔)=78.7hkd.....呢個有少少腥~一般~~~~~~~





我地叫4個定食share黎食~有兩個好食兩個一般~食左係和歌山既第一餐~




食左6,231円=383.2hkd...每人食左95.8hkd....都ok啦~




回程途中有便利店喎~~~~梗係要去行行啦~~~~~咦~~~算唔算係新野呀~~~~好似之前有出過但我買唔到~~好啦...當係新野食啦~~~~~




拿拿拿.....當時係得令架!!!(又係家陣我家樓下7仔有售).....透明喎!係幾特別既~~~買黎試下咯~





查實我幾想試呢隻新味~但我唔鐘意長頸鹿薯條既口感~




好彩Jagabee都有新味~~~買咯買咯~~~




呢個我覺得堅靚堅抵....買啫喱送透明玻璃杯!!!!!幾靚....519円(稅拔)=31.9hkd....不過衰在我唔鐘意呢兩隻公仔...唔夾硬買喇~





回程時看到的夜景和歌山城~~




番到酒店房開個小p囉~~~試下雪糕先~~~櫻花味的....好難食呀喂...甜到盲公陳開眼系列(我發現盲公陳成日俾我利用)....又估唔到栗子哥個幾好食...仲有d黏黏的麻糬在雪糕...





透明可樂.....算吧啦....又係勁甜......試過就下算~潮童呀~




又襯毛寶沖涼我去影下戰利品先~~~比我想像中好喇~~~起碼有戰利品.....衰婆支行山杖好帥氣~




我最滿意部份~~~~~(甜笑)





毛寶二話不說咁攞起行山杖入自已gip....好帥氣呀!!!!








2018/08/16的開心事：
睇森美旅行團有和歌山架!!!!
仲有我家陣好鐘意睇延禧攻略~~~~
好好睇~
**********************************************
我噚晚發夢呀!!
我發夢見到我老豆番左黎同我開P呀!!!!
(唔通關7月節事?)
個夢入面仕燊都有黎參加派對~
我老豆仲係廚房煲蠟鴨脾飯俾我食~~
超香~~~~~
雖然如果佢俾油雞脾飯我食會更開心~
但夢中賜左兩個精壯既男人俾我~
其實我今朝起身開心番不少~



報時：距離Supper Moment[Dal Segno]專輯巡迴台北站2018仲有---7日~
報時：距離與毛寶慶生泰國食揼嘆之旅2018仲有---42日~
報時：距離天團蘇格蘭高地之旅2018仲有---58日~
報時：距離鳥取自駕遊之旅2018仲有---106日~
仲有一個禮拜見到仕燊~好興奮~~~~~
所以番工要頂住呀!!!!!!