毛寶生日會2020＠雅舍 The Manor

星期日...中午食左台灣代購芫茜麵...fika之後又做下家務...下午茶...再追埋Emily in paris大結局..又要等下一季了~夜晚在家吃~......星期一...星期一總是令人眼訓~唔緊要啦~番埋今個禮拜我就快有假放~但又話有個風...聽日唔知會唔會打風.....星期二...又估佢唔到打得成風....上次個10號波咁勁放半日...呢個8號放左全日....不過一打風個頭就痛...發呆咁係屋企過左成日......星期三...中午OT一小時~為下周做準備~下周做咩~下周話你知~XXXXXD....成個下午都好眼訓XXXXD.....好彩有杯麥叔叔凍檸茶頂住~.......星期四....今日...又無咩特別發生喎~係同本小姐生日又近左一日囉XXXXD最開心係今日中午番工撞到毛寶<3成個下午都好開心~.......星期五....yeah~放工同左公子去食我同杯既生日飯呀~~好開心~多謝公子~.......星期六....中午又食Toff...再去拜老豆...再去Barbie...再去八佰伴...再去食鮨玥...老夫人同我提前慶生~好開心~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



OK~今日講埋毛寶正日生日做左咩先~(係~上個禮拜講哥餐唔係正日食XXXD)....呢日係我同毛寶呢年既第一次放自己假~心生感恩~我係點樣可以9個半月無放過假?XXXD....中午就去試左間毛寶想試但係食後感非常兩極既餐廳(係!生日正日先黎冒險XXXD好刺激)....就係St. Regis入面既西餐廳雅舍 The Manor....電話：2882 8898....想食記得要訂位...因為真係好爆好爆....基本上你星期一諗起星期六想食時已經無哂位....最近佢仲推出左D午市套餐....$250(未加一)左右有3道菜...望個價係幾抵既....但有食過既人話set唔好食....呢間有4個公子食過話極普通(包括我...哥次我無同毛寶一齊食~有親戚生日去食...普普..無邊一樣留下深刻印象...但未到難食)....其中一個神秘團友直說不好吃......然後網上很多人說很好吃~常常去之類.....咁兩極...唔通你個心唔痕既咩~(依家金沙城擴建緊...最近St. Regis既停車場封左...除左停車場之外...酒店入面都瘋狂改路....行左好耐先到!)

環境係OK既~不過我上次食係夜晚...好鬼憎D西餐D燈調到好暗~中午還好~






餐具...幾平實~




餐牌...有set有單點...一係睇英文一係睇簡體字(金沙集團特色....一見簡體字就覺得吉眼)




中午set係幾抵既...酒店西餐...咁既環境...$250...當日所見...閒日中午都坐滿哂人...利害~(而且有好多枱都係外國人)




單點餐牌~但同我係佢地官網睇既餐牌完全唔同既?唔通中午同夜晚餐牌唔同既?




叫左野食先上麵包~有粒欖哥個包最好味...另外兩款普通野...右二個醬辣辣地幾驚喜~




生日咁開心!梗係要叫兩杯香檳碰下杯開心下~~Billecart-Salmon, Brut Réserve, Reims, NV....$188/杯...痴牙時!...喂...呢隻香檳又幾好飲喎~





北海道海膽及Petrossian鱒魚魚子醬...$118....見到成個海膽咁幾雷!好興奮咁問毛寶：好無叫多個一人一個呀?!





毛寶：試左先啦!點知好無食呀!




喂....好彩聽你話試左先咋!....睇下D海膽溶到脷苔都無...滑潺潺咁...個底下面係椰菜花凍...er......查實海膽已經麻麻...個椰菜花凍都好夾硬XXXD...最好味係D魚籽~




香煎法國George Bruck鵝肝...$148




鵝肝唔係食口感細滑既咩XXXXXD可能我見識少...呢舊鵝肝又實又鞋喎XXXXD(我覺得我煎得好食D XXXXD)




野菌濃湯...$98....我地share黎飲...佢幫我地分左兩碗...都ok既...但就只係ok~






由於頭兩個前菜太驚嚇...我地加左西西里紅蝦及Oscietra特級魚子醬...$148.......我同毛寶都幾鐘意食紅蝦~終於食到D好味既前菜...但好食既原因係本身隻紅蝦好食~配魚子醬係好食既~...另外有柚子醬配...但同紅蝦其實唔夾~





為左主菜我再特登叫多杯紅酒同毛寶兩份飲飲~Chateau Haut Brignot Haut-Medoc, France 2012...$118.....查實我地真係唔識飲架...但係幾岩我地口味~做咩嬲爆爆咁je~係咪D野太難食呀~




西班牙紅蝦配管形意粉及龍蝦濃湯...$228.....我覺得個龍蝦濃湯味有D淡~紅蝦ok~





本身係想叫熟成宮崎和牛前腰脊肉....點知佢話全部日本和牛都無....於是毛寶唔揀其他牛...揀左法國Pyrenees羊架...$348.....個名望落好雷!仲有席前服務!個羊架放係塊唔知咩葉上面!令人期待~




我地落order時佢無問我地個羊架幾成熟...望落已有7成熟...唔問唔緊要...可能呢個主菜主廚整既方式係有一個模式一個熟度去整先會好食~信佢!side仲配上英國嫩菠菜..法國la ratte薯蓉同野生蘑菇




er...."可能呢個主菜主廚整既方式係有一個模式去整先會好食~"....無D咁既事....整得過熟又鞋霎霎...個羊架係完全無羊味之餘...仲要係!完!全!無!味!!!合埋眼咬你都唔會知自己食緊乜野肉~點下佢附既汁可能會無事既無事既....真係乜事都無發生XXXXXD成件事救唔到....好難食....雖然杯紅酒唔係貴...但係我都覺得係浪費左杯酒




收哂D主菜碟之後就直接上左我留言話有人生日既蛋糕XXXD生日快樂~~呢個唔老尷!無歌唱!生日快樂身體健康~






但又無主動問我甜品要點咩...又無問我地要唔要咖啡~就主菜後主動上左個送既生日蛋糕...唯有自己主動問佢攞餐牌望下~佢單點D野咁我無信心再叫佢D甜品喇XXXXD叫杯啡算喇~




一直坐係度等佢杯啡送朱古力蛋糕....等左成10幾分鐘都無...等到生日哥個都自行切左蛋糕先喇~




美式咖啡...$58......等左10幾分鐘再催左一下既咖啡都OK既...送蛋糕食幾好......我鐘意佢支糖XXXD但我無加落杯咖啡度飲~我就咁食~(後來番去睇張單先發現原來兩杯啡佢無計錢~但又無同我地講~)




叫左人埋單我再提佢...我地個petit four未黎呀....咖啡都無哂喇~個petit four好hea~亦唔好食~我見其他叫set既人安排得幾好架...係我地呢D單點既就要自己左提右提




呢餐食左$1,424....仲要當時有澳門人優惠有8折減左成$316.4....如果無折即係成千七蚊!!!食呢D梗係有人作下狀過黎問你D野食點呀~所以我都作下狀話D野食OK呀~我之前好似講過...通常係D我好鐘意既餐廳或餐飯真係好食哥D我先會真係會表達我內心意見(雖然可能無人想知)...唔通我話呢餐飯除左杯香檳..前菜個紅蝦同杯紅酒....由頭到尾都好難食咩XXXXD又唔係想R著數XXXD....好少可有間餐廳我連前菜都覺得好難食~無咩事既話我應該唔會再去呢間餐廳~我地係咪好玩野~特登揀生日哥日先去試一間評語好壞極度參半既餐廳~....我覺得如果食set麻麻都算啦....單點都咁差真係好難搞~話哂仲係St. Regis入面既西餐廳~勁失望~(令我諗起毛里求斯間St. Regis都好L難食)....知唔知我最不滿係咩呀?係佢地無論你有無消費用金沙城個停車場都有3小時免泊車...即係你無幫襯都送3小時免泊車...而我食左餐好難食$1,400蚊既飯都無得延長個泊車時間要俾錢呀!我終於諗到呢間餐廳仲有一樣係好既：就係樓底夠高XXXXD




食飽飽去左左行右行啦~去左西環遊車河同埋去左主教山~天氣好好呀~





望過去觀光塔哥邊好靚架~




再行下科學館空地散散步~當時接近中秋節~個月亮好圓呀~





就喜歡靜靜的跟你做些有的沒的~

夜晚仲去左我地平時好鐘意食既日本餐味藏~(比起中午哥餐好吃多了~)




又跟你過了一個平平淡淡的生日~希望你開心~(雖然中午餐飯真係好難食~)....希望出年生日可以去旅行過啦~

2020/10/17的開心事：

跟我最愛的家人吃了餐生日飯~

好食是其次~

重要的是我們還在一起<3