北非摩洛哥之旅2019-04-25第一天(晴天)

星期日....起身煮左韓國芝士麵食....仲有整左芝士辣魚豬仔包...嘆完啡同毛寶一齊做家務~~毛寶真係好~~做完嘆茶嘆花生醬豬仔包~~玩毛寶送我的一套1984年(佢話佢專登揀架)....一套1992年既麥叔叔車仔~~夜晚食牛肉餐.....星期一...噚晚成兩點先訓到...今朝起身好鬼眼訓...算啦~呢個禮拜番3日就連放4日~頂住呀~老夫人今個禮拜生日有好多慶祝活動架~......星期二...今日做做下公司停電...完~XXD........星期三....起身又有D頭痛~放工開心到發瘟狗咁衝去800伴超市狂掃貨~~布甸乳酪火腿乜都買一餐~買得好開心~你話唔去旅行其實又點會慳到錢~....星期四....老夫人生日!!!中午毛寶請左佢去玥龍軒飲茶~疫情後第一次去...忠粉覺得...服務同野食都差左..服務差左原因係唔夠人手...我茶見哂底都無加要我出聲..野食最好食最有驚喜係petit four XXXXD....下午係屋企hea下...夜晚叫左生蠔~我地再整左啲沙律呀~芝士呀~火腿呀~我再煎塊鹿兒島和牛~就係我娘生日大餐啦~好味~呢日我地飲左4隻酒...香檳白酒紅酒甜品酒...好癲XXXD係屋企食就係可以瘋瘋的....星期五...brunch在家整左黑松露炒蛋....勞動節嘛~做下家務囉~3年前既今日....我第一次同我家仕燊相見XXXD.....夜晚阿媽煮飯......星期六....訓到....12點幾XXXXD......驚醒起身刷牙洗頭吸塵淋植物...毛寶放工上到黎見到我好乖咁準備食野了XXXD...之後去左買蛋糕...下午寫下Blog~夜晚去食日本野~~



2019/04/25
Day 1(澳門 Macau->香港 Hong Kong->杜拜 Dubai->摩洛哥,卡薩布蘭加 Mococco,Casablanca)
好喇~寫到2019年既摩洛哥之旅~我好怕要開摩洛哥呢個頭XXXD因為想起好多相要排又要做後期(後期係加字唔係美圖秀秀呀我本身就咁靚XXD)...諗起都驚驚...但我又有強迫症鐘意順序寫~那也唯有硬著頭皮~又講到不情不願咁但又無人迫我既XXXXD...好喇好喇~講咁多出發喇喂!



咁我地今次係報左團既~唔係自由行呀大佬咁多老野我搞唔掂呀~有領隊招呼佢地好D~至於係跟邊間旅行社...我係唔會講既...因為方便我要數臭佢XXXXXD...又無去到數臭咁嚴重既~不過我不滿是真的...我跟過咁多次...最差個領隊係今次~.....我地個團係4月25日凌晨機既~所以我地24號晚已經搭機場船去到香港機場禁區喇~搞掂哂check in我地就去食野先啦~呢個近Gate 40既PP Lounge我2018年先去過第一次(係...我好老土...之前幾次都係去Gate 1隔離哥個)...呢次係第二次...難得我有少少愛上呢個Lounge...(雖然呢個Lounge都係好多人...但我鐘意佢開揚D...Gate 1哥個好黑好暗~)...點知呢次係最後一次入XXXXXD.....頂~呢個Lounge係2019年12月已永久關門...新哥個好似係Gate 35附近




我覺得好多野食XXXXXD我覺得晚餐算係咁喎~同埋有D都幾好食架~個春卷好味~茶葉蛋都唔錯~假燒賣加豉油我都很可以的~同埋係上機去外國前食番個片頭魚蛋粉真係好緊要~天呀我好想快D試到Gate 1個PP First!我就黎夠分免費入喇~~(妖...好似又改制...無得儲分入...下次有時間嬲嬲地俾錢入)...今次我去程行李都成16.2KG喇XXXD~




講番先~今次有咩人去呢~有我啦~老夫人啦~毛寶啦~毛寶爹娘啦~新人物有：我舅父啦～我住香港既表姐同表姐夫~我地哥日一行6人過香港~我表姐兩公婆就係機場禁區外同領隊匯合再入禁區的~我地約好左係Gate見~查實我都係第一次同我舅父同埋表姐表姐夫去旅行咋XXXXD...我同毛寶有個規定：同我地一齊去旅行唔可以叫咩乜太呀乜生呀懶客氣咁...要直呼其名XXXXD......一行8人都幾有氣勢~(望下呢堆人...點可以自由行去摩洛哥)....差不多上機...由於我一直有同領隊有Whatsapp交代呢6個團友去到邊同埋已check in寄好行李之類...但我唔知佢咩樣既當我表姐話我知哥個係我地領隊時我咪過去同佢打聲招呼囉~點知佢西我面XXXXXXD佢個表情我到家陣都記得(我都話我好小器架啦~我先唔會偽善話自己個人好大愛XXXD)...好巴閉咩~你估我好想HI你咩~我都要話你知你未見過未聽過你講解既團友識排緊隊上機架~




我地呢日係搭阿聯酋航空既EK381航班係00:35由香港經杜拜轉機去摩洛哥~有個人無望鏡頭XXD...佢D坐位3-4-3咁樣(我至憎XXD)...但我地8個人咁坐係最好既~~我地呢團勁多人...有成20幾30人!(我話多人係因為對上一團係11人)




起飛後個領隊又走黎我地度...今次笑面迎人派野俾我地~話呢個對講機係某個景點會有用~(家陣跟團咁高科技個磨~)...好啦...原諒你頭先未到25號未正式上崗先西我面啦~




係喎~又要提下大家點解我地今次要去摩洛哥喇~事緣~我阿媽以前好鐘意一套荷里活片叫北非諜影~係同老豆一齊睇既~所以成日情意結好~想~去~唉...老豆係度時佢地都無一齊去...嗚嗚...；[...好啦~咁我代阿爹陪你去啦~...記住要共最美的人分享每個夜晚呀~記得要珍惜依家仲係度既家人朋友同身邊哥個呀：］~(實情係...我後來先知呢套以Casablanca做背景既戲其實成套戲都係美國拍既XXXXXXXXD)



我不嬲都好鍾意阿聯酋個娛樂系統~真係最多戲睇~(上次American Airline也不錯)...個螢幕框係全白我又覺得好好好靚~而且也好夠大~經濟艙算係咁啦~好喇好喇~要煲戲喇~第一套：波希米亞狂想曲：搖滾傳說(Bohemian Rhapsody)...毛寶推介我睇既~係描寫Queen呢隊樂隊音樂電影~~好睇呀!歌又好聽~~Rami Malek又真係扮得好似!




第一餐~由於已是凌晨~所以派簡餐~係一個雞肉包~都唔錯既~(但好彩有食晚餐XXD)





好~繼續煲戲~又係毛寶推介既~我的超豪男友(Crazy Rich Asians)...我記得UA都有上過~但如果睇中文名我應該唔會俾錢入場睇XXXD...但睇完事實係：勁好睇!...係愛情喜劇...頂...我睇到眼濕濕~全亞裔演員既荷里活片...好好看~睇完又訓下醒下訓下醒下~就夠鐘食早餐喇~~我叫左炒麵~(有中式野食好食下喇~)...濕炒麵我又覺得唔錯喎~因我唔想食炒蛋呀XXXD...餐後再睇N年前茱迪科士打既超時空接觸(Contact)...有場戲我喊到爸把聲既...(我好似特登淨係拉去哥幕睇自虐一番..我真係好變態)...番黎後搵資料驚覺：呢套戲已經22年前..同埋呢套戲原來有Matthew McConaughey!!...到底...星際啟示錄同超時空接觸有無關係?...但我無勇氣睇多次以上兩套戲XXXD




好啦~係杜拜時間04:55就到左喇~呢程機還好~我仲頂得住~




然後又轉機又Check多次隨身行李之類...領隊帶我地去到再轉機哥個terminal講解少少野...同埋交代番我地個行程有少少改~因為當地有個馬拉松比賽...如果唔改住宿地點同調轉頭尾個行程行既話會勁塞車~轉機時間大約兩個半小時...講解完解散...大約仲有一個鐘~咁就去梳洗下啦~刷下牙....我阿媽仲去買左杯咖啡...都幾香~(隻窗D花好中東Feel~)




好啦~我地又再搭阿聯酋航空EK751航班係07:30由杜拜飛往摩洛哥卡薩布蘭加(Morocco,Casablanca)....




咦~係咪A380呀~有兩層喎~(其實黎哥程都係A380XXXD)




其實A380個位都算係咁...除左個人螢幕夠大...前面放左野之外個位仲有咁闊喎!(其實可能我腿短)...個搖控成個遊戲機咁~




上機就派發摩洛哥入境表~




好野~好肚餓呀我~派野食喇~早餐....Er...都係簡餐....叫杯咖啡醒下先~




個包既餡仲要係Apple Raspberry...我喊呀!主食好想係咸食!兩程都係一簡餐一正餐...係咪姑寒左呀XXXD(第一張相好明顯我係迫毛寶：喂!你幫我揸住個包俾我影XXXXD)





餐後又睇睇戲~又睇毛寶推介XXD...第一套：逆流大叔~幾好睇幾好笑~...我都係一個有思想既人黎架!..唔係淨係聽毛寶介紹架~第二套~我自己揀既：登月第一人(First Man)...呢套係之前好想去睇既~但又唔得閒去睇既戲~Er....我飲左咖啡都訓著XXXXD....好辛苦咁又醒睇一陣又訓...又訓又醒又睇一陣咁先睇得完XXXXD....查實如果第二程轉左係早機我好少訓XXXXD....午餐終於俾番個全餐我食喇XXXXD...main course叫左chicken tagine....個前菜係藜麥沙律..我真係搞唔掂...勁多我勁憎既青豆XXXD...個主菜其實唔錯~汁又好食~我叫左白酒~...但小米飯質感我又麻麻XXXXD...但撈汁都食哂~甜品我不嬲唔係好掂~仲要係chocolate mousse~...重點我好鍾意牛油搽餅乾食~~~(好好味但又好肥...其實我淨係坐飛機先會咁食XXXD)




靠我自己真係信唔過...穩陣D~揀一套睇過既~第三套：A Star is Born.....又係好睇~歌好聽~....飛左成10幾個鐘...係同一日既中午12：55就到左北非既摩洛哥最大城市卡薩布蘭加(Casablanca)喇~睇黎幾好天喎~(其實好攰)




實在太恐佈喇....估你唔到效率咁低....過海關排隊等左超過一個鐘....企到我都驚...何況3隻小妖





然後又要等齊行李...喂...我個人過關已經用左我超過一個鐘喇喎....(你過左海關吸左印仔之後有個位仲有一個人再睇你個印仔...令我諗起馬達加斯加過海關個Counter有3個人吸3個印)




等行李等團友去埋廁所既時間係禁區內換埋錢先~我地係用美金換錢既~摩洛哥貨幣係用MAD做表達...兌美元匯率係0.9272...經過我神算t既精密計算之後...1hkd=1.188MAD...查實係可以當1：1咁睇XXXD...由於阿領隊話摩洛哥無咩好買...叫我地換100美金就夠使....所以我地每人換左100美金=927MAD





俾大家看看摩洛哥貨幣~其實貨幣面額唔算大...但成日話無錢找(利申：但佢地D野唔係平...以我所見到既...尤其你去每個廁所佢都話要俾錢..唔係貴...但就係無散銀嘛XXXD)




出左禁區~




機場外貌




然後一堆團友攞住大gip細gip咁樣跟領隊去上旅遊巴...呢個位有少少亂...要D團友不停係路中穿插...而且勁多旅遊巴插黎插去...有D危險~




成功上車~~今日天氣睇黎好好喎~





入到市區塞車問題嚴重~




搭左10幾個鐘頭機跟團我最驚就係到當地係朝早~代表搭完長途機就會有行程XXXD...來吧..孩子...來走行程喇~XXXD...第一個景點就係哈辛二世清真寺(Hassan II Mosque)...




女仔入內可包頭巾可不包...但入內一定要除鞋...我記得有個袋俾你袋住對鞋行~前面紅色頭巾既女仔好靚~唔知係邊個呢~





入到去除左鞋....Er...我聞到好大陣壓味....唔知係咪由地氈發出.....不過一入內...覺得好大好靚~佢係全球第二大清真寺~僅次於聖城麥加....勁到有自動開關屋頂...自動升降水晶吊燈...同埋有加熱功能既大理石地板~




個天花極高極靚!






仲要每個天花都唔同哥下先靚!




而且佢地D吊燈都係超靚~





貴為全球第二大既清真寺...係大到可容納25,000人!!而且佢咁高樓底有一Part做左個木製既夾層...專俾女性用...咁樣就可以同男性一齊進行祈禱...好貼心的安排






乜頭先前面紅色頭巾好靚哥個女仔係你呀~正面睇成隻套娃咁XXXXD





呢個位係舉行儀式時既




而進行儀式哥個位正對住有對門...聽阿導遊講係長年緊閉...一年得幾日會開...佢去過好多次得今次見到佢開...咁我地咪好好彩?佢開左一陣又關上...





我特別鍾意佢呢幾對通花門~好靚~




其中一對無放地氈係前面!!仲做到倒影效果~好靚~




然後出番黎去左另一個位影相...由於太多人聽唔到阿導遊介紹XXD




係多人到咁喎XXXD




然黎到地下室去左個好臭既廁所...再參觀埋個浴場(想起了土耳其)





講解完就解散喇~阿導遊俾時間大家係外圍影相~佢地連個小噴水池都起得極靚!




來~合照一個~





呢張我媽鍾意到做左電話wallpaper~<3




呢個哈辛二世清真寺有三份之一係起係海上面~





哈辛二世清真寺個宣禮塔係全球最高架!...論外表佢真係無得輸!我覺得佢隻色襯得好靚~覺得好神聖~無論正面定側面一樣咁靚~你話係咪?







加埋拱門邊一齊影都係咁靚~





摩洛哥國旗~




之後去到穆罕默德五世廣場(Mohammed V Square)...個廣場又無咩好睇既...最好睇應該就係著住傳統服飾既賣水人





好~番酒店喇~市內又塞車~




呢晚既酒店係Sheraton Casablanca Hotel & Towers...諗住大牌子~實無死~




酒店對面都有個宣禮塔




等緊攞房卡時...當地導遊派發旅行社送既上網卡...有2G...收得都唔錯




都幾大既~不過D櫈呀地氈呀梳化呀好舊~





休息左一陣就落酒店餐廳食飯...




好野~食自助餐我可以食多D野喇~因為我已經好肚餓喇~落左機之後都無食過野~好似都幾多野食喎~~




有時D野多就無用既~唔好食就真係好難搞~~算喇~食完呢轉唔食喇~




呢個又真係幾有用~以前跟團用口講~自己記低~依家有呢張好好多~




Picture of the day~~利申：相中人不是我....我個攝影師唔要禾喇嗚嗚嗚~










2020/05/02的開心事：
過悠閒的一日~



報時：距離泰國曼谷揼揼揼之旅仲有---55日~
報時：距離七公子台北帥氣行之旅仲有---158日~