毛寶晚餐生日會2019@Padre Cafe

星期六....去左臭毛寶放工食埋comma就跑回毛寶家....整個下午個心好戚戚然...因為公司話會提供有限度服務....有自願番但都係唔夠人...最後...我中左籤要番呀!!!!!點解我咁黑仔架!!!!!其他人就係屋企隔離..............我無哂心機....夜晚痴痴貢....星期日.....買外賣回家吃...然後開始準備聽日上班物品....你明啦...抽中左我都要準備好少少先番工...我內心不安了很久~~夜晚在家吃.....星期一.....前兩晚我都訓得好差...內心不安下番左成日工...好不安...同埋見到咩客行入黎唔戴口罩我都不自覺向後退....同埋明明有口罩又唔吸埋口鼻哥D我會主動叫佢戴番口罩先....呢D非常時期好心D人有口罩就戴番先同人講野啦....搭巴士都講明要戴口罩啦!文明D啦!......星期二....今日不用回...在家聽特首一點既記者會....我第一次聽特首講野覺得好感動...感動到眼仔有D濕....同埋講左賭場關閉15日...星期三....公司三四五都講左唔使番...Home office呀!....早上起身食過早餐....嘆埋啡睇埋only you就動手做清潔~因為本身有鐘點姐姐幫我地既...但為免佢搭巴士黎既時候有危險....我地叫左佢暫停~(利申呀：我地響應特區政府呼喻係放人有薪假架XXD)...希望疫症快快過~我尋晚臨訓時有想起我阿爹~我好掛住佢呀~...星期四...本身今日打算全日在家的....媽媽話D菜差唔多食哂...咁見個天又好似暫時無落雨打算...於是快快去最近超市...買左大約5至6天既菜同麵食...夠食就好...不要囤貨...以免造成浪費...超市價格都尚算可以..同埋菜供應係充足的~買幾日既份量係唔想再出去造成人員聚集+浪費口罩...星期五.....起身食飽飽...睇完午間劇場就做清潔...只係隔日無掃地都勁多塵...我覺得我媽好勁...呢幾日中午夜晚飯都無咩重覆過餸菜...媽媽棒棒的.....星期六.....我好似已經數唔到日期...食飽中午我以為係今日係星期日仲諗緊因間行去開電視睇道地星期日影院XXXD...有得home office已自覺幸福..不敢有多怨言...也感激一眾前線人員...你地番工戰戰兢兢既心情我完全能夠體會...我暫時能做既就係完全留係屋企唔出街!



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



上篇講完個生日午餐之後下午查實係無安排節目~直接跳去晚餐XXD....揀左我地兩個都未食過又想試既Padre Modern Cuisine...地址：澳門南灣大馬路251號德豐大廈地下B,C舖....電話：2896 6988....好似中午淨係得Walk in...夜晚先有得預訂~佢之前開係慈幼學校附近~2019年暑假先搬左黎呢個舖位...舊舖哥時我地都諗住去試...點知爆勁多人~今次有訂位終於試到~




新舖望落大好多~




佢d燈泡都有字架~幾靚~




風格都係比較輕鬆既~




坐低就睇餐牌~都係電子餐牌~




覺得d野飲好吸引~




蛋糕仔覺得幾靚~又覺得好熟口熟面...........(但又突然醒唔起係咩~)




唔夠餐牌睇亦可以係自己電話掃呢個QR code係自己電話睇~




毛寶本身叫左香茅薑茶..點知賣哂~最後叫左blueberry fruit tea $38....毛寶話好甜...甜到糖尿....要自己再溝d水XXXD




我就叫左睇餐牌覺得好吸引既Twilight $48......傻痴痴的我開頭以為係cocktail....點知原來一滴酒都無的(咁又係....$48又點會有酒俾你飲丫傻西瓜~).......飲落......就係橙汁~加左唔知另外咩汁~(唔通就係菠蘿汁?).....有無人留意到我用人像模式?XXXXD




黑毛豬火腿 $118.....華!都幾大份喎!....火腿都幾好味~蜜瓜都幾多下~




松露薯條 $68....無乜松露味~





龍蝦意粉 $268....華~除左龍蝦仲有其他海鮮~




隻龍蝦幾大隻下~




俾隻叉你做下對比就知有幾大隻~~~~~龍蝦唔錯!意粉係佢地手製既!非常不錯!




不過食食下我就覺得有D奇怪喇....點解有野咬唔開............又無味喎....咬咬下......我開始有D驚....吐出黎一睇......嚇到我賴屎......成塊面灰哂..............................然後我搵個人黎問：呢舊咩黎架?唔係香口膠黎架下?????...............答我哥個人問左廚房...只係簡單咁答：係龍蝦一部份............然後行開左....餐廳咁講完...消費者都仲係驚啦下嘛~為左釋除我內心屈結...我上網打"龍蝦 香口膠".......發現好多人都驚過.....原來100隻龍蝦入面得4隻有.....係龍蝦"精巢"!.....質感真係似無味既香口膠........如果哥間野可以講多少少個資訊我知.....我諗我會無咁驚~~~呢度扣少少分~




黑安格斯牛柳(200克) $298.....都不錯~





然後隔離枱有人生日....侍應們一齊大唱生日歌捧住蛋糕行埋去~~~~毛寶一副事不關己既模樣：華!佢呢度都會咁樣唱生日歌喎...................然後我心寒一寒............隔左無耐又有一堆人捧住個蛋糕行埋黎我地張枱大唱生日歌XXXXXXXXD...生日快樂呀~~~~~~~~~~~~~~~~~~~~~~~





係喎~原來D蛋糕仔就係我好鐘意食既Palette Dessert Gallery~~~~~~~~係我打去叫餐廳幫我係碟邊寫字~~所以又有一大堆人出黎唱生日歌~~~XXXD.....呢個係Pink Guava Tart $48~~~祝你心想事成~~~~~





呢餐食左$992~其實呢度d野食係唔錯既~係野飲麻麻~仲有好多野我想試~（我仲未試哥D啡)...下次試下先~








真心一讚澳門今屆特區官員...
尤其賀特首....
你點會聽政府講野聽到眼仔濕?平時只會嬲架之嘛!
但係特首講野就是有力...
就是令人安心....
一招全民有口罩已經大讚....
再聽佢苦口婆心咁叫大家唔好出街...
同埋夠吉士關賭場兩星期....
再同你講澳門咁多年儲備淨落....經濟後續無問題!
頂你....霸氣總裁!!!好L有型!!
除左我老豆...除左我家仕燊...男人暫時就數你最有型!
賀特首!挺你!
(想效法某澳門登友話為表對特首尊重..
決定放佢張相係銀包XXXXXXXXD)
大家記得聽霸氣總裁講：除左出外買補給品...請減少外出!

仲想讚下哥個新型冠狀病毒感染應變協調中心個FB Page..

做得超好~消息發佈得快!

如果有任何網上謠言都係官網火速澄清(特別係澳登哥D)
希望各位成功抗疫!齊齊整整!(不止中港澳台..呢句係俾全世界)
(我笑同毛寶講...我地既話題由公司無聊野
是非...八卦...
演變成家陣去超市買左咩鮮菜XXXD
一個人唔番工...話題真係少好多)



2020/02/08的開心事：
今日係元宵呀~祝大家元宵快樂~
前兩日出街買補給品時忘了星期六係元宵...
如果唔係實買包湯圓回家~



報時：距離與三老九州佐賀自駕遊之旅仲有---56日~
報時：距離泰國曼谷揼揼揼之旅仲有---132日~
報時：距離七公子台北帥氣行之旅仲有---235日~
現在也未知能否成行了~
功課我倒是做好了~