鳥取自駕遊&大阪之旅2018-12-04第四天Part 2(晴天及後轉陰)

星期日...中午食左Root....佢就黎暫停營業喇~~我好不捨~~~下午同左菓子軒...八寶仲有毛毛一齊下午茶~~好多小朋友呀~~夜晚痴痴貢~......星期一...今日觸礁...最煩哥個籌俾我叫到...仲係係6點至叫到XD...搞到遲左收工.........星期二...中午去銀行...明明去哥時唔算多人...但搞左勁耐...突然掛住可以番屋企訓晏覺既日子......星期三...今日最觸目...我!食!左!久!休!復!出!既!肥!仔!記!!......星期四...唔...無咩特別...普通番工日囉......星期五...好攰呀喂!...5點到6點好似做左我呢生既籌總和咁多...痴線架...放工食左pizza hut......星期六...一早起身...阿爸有儀式搞...順利完成...又放下一件心事...然後去左南湖明月飲茶...下午做左勁多野...睇左好多電器...廚房野...傢私...我覺得我地好強!...夜晚食左加東...都不錯...呢日濕爬台北搞簽唱會...我勁想飛XD...有誰知道我有多想仕燊寶寶<3......星期日...中午食左Root...係...又係Root...因佢就黎暫時關閉...我同毛寶都好捨佢個squid noodle...下午幸福忙...好多野訂...仲有揾mapcode...夜晚痴痴貢~



2018/12/04
Day 4-Part 2(日本,鳥取,三朝溫泉 Japan,Tottori Ken,Misasa Onsen->大山 Daisen->大山牧場 Daisen Milk no Sato->米子市 Yonago Shi->皆生溫泉 Kaike Onsen)
又揸車去今晚既溫泉旅館喇~




大約21分鐘左左右黎到皆生溫泉區(かいけおんせん)....我地今晚既住宿係海色・湯の宿 松月...地址：鳥取県米子市皆生温泉3-4-25....Mapcode：109 448 595*68....呢個時候開始落大雨....由於佢停車場係露天~毛寶放低我同行李係有蓋地方先~佢自己去泊車...你人真好~




我地早左到架~但佢都幫我地check in~咦~又有貸切風呂免費送45分鐘俾我地~3選1~




好開心呀~佢有將提我地幾點食飯係邊度食張紙有中文~(自選時間)....仲要係繁體字!多謝你地~有一點好特別...就係今晚晚餐係自己房入面食呀!!!!!!!!!!!!!我終於試到喇!!!!!




check左in佢請我地坐係向海lounge~享用一下歡迎茶點~杯熱茶係黑豆茶~同埋綠豆蓉既和菓子~





然後就帶我地揀浴衣同埋揀個裝野去溫泉既藤籃...個藤籃好靚呀喂(#曲)....XXXD唔打#曲我驚你以為我講真




大堂仲有好多鬼太郎既呀~可以隨便影相~咁多鬼太郎係因為鳥取境港市係鬼太郎既故鄉~





然後帶我地上房~




一入房覺得....華!勁大!.......我仲以為佢Upgrade左我地添~點知望番原來真係自己訂~我地訂左マッサージチェア付客室.....一泊二食每人43,740円=2,843.1hkd....華!發左達磨?點解我會訂左呢間房架!(好明顯訂錯)....有幾大呀?成間屋咁大呀大佬~~~~紅箭咀係洗手盆同私人風呂方向....藍箭咀係和室.....綠箭咀係睡房




和室~個廳都咁大!(大係夠大但係裝修舊了~)..仲要向海~住向海既溫泉定律係咩?就係陰天同落雨喇XXXXD次次都係咁既~





睡房分開!!我初頭以為係廳度鋪床訓架!!!(房是你訂的嗎?)





盥洗室....右邊就係私人風呂喇~將對窗打開哂就可以對住個海浸~浸溫泉備品係左邊個籐架~





廁所都有兩個~~~~搞咩~~~~~




不過隨即發現缺點...就係間房唔夠冷氣......但係個冷氣制唔俾我自己調溫度....問工作人員點樣較低一d溫度..佢話無得較XXXXD......呢件係我地揀既浴衣款~




裝野去浸溫泉個籐籃靚到...我已盡量揀隻傷害性低既顏色




到左預約免費用貸切風呂時間~去大堂攞風呂鎖匙同埋佢地帶我地去~我地3選1揀左岩風呂~




唔....我覺得佢d備品同埋地下有d污糟...水也不算太熱....只夠2人浸~(有d掛住噚日哥個免費又夠大既貸切風呂)





(圖片from官網)早知預約另一個啦!!呢個大好多~呢個係庭風呂




(圖片from官網)另一個係樽風呂




45分鐘後我地還左鎖匙又去浸公眾風呂....好似係頂樓~





(圖片from官網)內湯比較大.....向海的...不過都無用...因為內熱內凍有水蒸氣~唔係好睇到出面的~




(圖片from官網)佢個露天風呂官網相都影得鬼鬼祟祟就知咩事~~~係向海但勁爆細~~~我估最多只可浸5人~但個質量係浸得令人幾舒適既~好彩我地浸哥時計埋我地得3人~





浸完番入房坐下諗住食少少茶點.....點知發現.....咦...得梅干...........................




咁都.....沖杯茶飲飲啦下~





睇下今日買左咩~




上圖哥個背包係可以摺埋既~方便去旅行時行山用XXD




到左我地預約既時間就準時上到黎呀~~~好興奮呀~~~因為我第一次係自己房食~




Set枱~





今晚餐牌~點解呢間房咁貴...好大原因係因為我今晚訂左食松葉蟹宴~~~~~~~~~~~~~~~第一晚食乜都有既溫泉會席~第二晚食紅楚蟹~第三晚就食松葉蟹~~~~儘量每晚食唔同會席~~




set好喇~~~~~好豐富呀喂~~~~~~~~~~~~~~~~~~







今晚飲梅酒!!389円=25.3hkd...平到咁???仲咁大杯?!




好~食左佢set好左既先啦~我唔客氣喇~~~開動~~




先來一杯食前酒~




前菜 季節の酒肴取合せ.....全部都好味呀!!雀仔都係一個食物器皿....打開係好似芝士豆腐既物體~~~







造リ 境港の旬のどわたて盛リ....白身魚~隻蝦幾好食....開頭見到綠色膏就諗會唔會係猛者蝦...但應該唔係啦~





鉢盛 活松葉蟹あらい造リ......華~~~~~~~我期待已久呀~~~~~一隻細蟹兩份食~





超~~~~級~~~~鮮~~~~甜~~~~味~~~~美~~~~......比起紅楚蟹.....蟹肉鮮甜超多!!!!!!我仲低能到：廚師都幾好心機喎~將d肉切到一絲一絲咁~~....毛寶：佢本身係咁架嘛......................(這個blogger還有得救嗎?)





焼蟹炭火焼 甲羅味噌.....食食下工作人員又突然出然...為我地即席炮制燒蟹.....老實講...我地一路食一路聞到超香的~~~~





佢烤得十分出色!!!!!好好味~~我同毛寶都大讚~





大家看到這色會想起了什麼嗎?我想起了菓子軒小時候的爛屎.....但這個真的很好吃~




蟹すき鍋 鍋野菜.....就算係松葉蟹..我覺得咁食都食浪費左......






好...我食到黎呢度知道蟹肉本身真係一絲絲喇XXXD




蟹天婦羅 あしてい.....又估唔到個天婦羅又整得幾出色喎!好味.....加上仲有菇既天婦羅~~唔錯唔錯~~




浜茹で松葉蟹........一隻大蟹兩份分~~~~~~





蟹蓋d膏唔算多~





但蟹身非常多膏~~~~~佢d膏無紅楚蟹咁濃...但無佢咁濃唔代表唔好食!!!!!我覺得不論生食定熟食松葉蟹都好食好多!!!!!!難怪松葉蟹賣咁貴~




最大哥隻蟹腳有咁大!!!好好味~~~啖啖肉~





搞掂成個蟹餐d蟹喇~




蟹雜炊........仍然係台北合鍋物勝出~日本松葉蟹都唔夠你玩~




香の物 自家製漬物,沢庵漬け......配埋漬物一齊食蟹粥~




水菓子 旬の地產果物,自家製スイノツ.....呢個有少少啫喱都幾小清新既~不過佢生果哥度有柿喎!唔係食蟹唔好食柿既咩?蛋糕麻麻啦~好滿足呀呢餐~不過係真榻榻米食飯...對腳勁辛苦.......試一次好了~

不過夜晚訓覺太熱....我成晚無吸過被訓~








我好似無講.....
點解會去布列塔尼.....
我今年去台北時都揾唔到介紹既旅遊書.....
人人去法國都係去巴黎.....
南法睇薰衣草呀.....之類之類.....
係因為少時睇阿媽啲旅遊雜誌.....
見到介紹呢個西北邊既沿海城市.....
風光如畫.....
加上重點是出名生蠔.....crêpe.....
仲有cidre.....所以我一直都好想去.....
俾左雜誌毛寶睇佢都話想去.....想不到.....
在今年實現了<3
人生願望清單又將會實現一樣!
(其實重點還有來回商務艙體驗)
好像我的人生清單只有玩樂XD~



2019/08/31的開心事：
睇定d電器款..個人無咁心煩~



報時：距離九州自駕遊之旅仲有---34日~
報時：距離全新飛行體驗法國布列塔尼自駕遊之旅仲有---83日~~~~~~~
報時：距離宜蘭聖誕親子遊之旅仲有---109日~