日本大阪自由行之旅2017-12-09第二天Part 2(晴天)

星期五...多野做...好好玩~....放左工去華生堂飲燉湯~之後又食家和魚蛋~再同埋菓子軒玩~....星期六...中午食八分目...下午同菓子軒玩左成個下午...巧攰話~夜上去左衰婆屋企食飯~~叫左好多野食呀!!!!又生蠔又壽司又海膽又pizza~正~~~~~~~~~~~~飯後就係衰婆家上演禁室殺戮(Don't Breathe)....哈哈~....星期日....中午試左翻新過既某間cafe~但一般啦~下午毛寶幫我剪頭毛...然後耍廢..最後仲唔小心訓著左~~~~~~夜晚食紫來坊~中式齋之中我真係最鐘意佞佢~~飯後再食聰少甜品~又一個周末~星期一...跟衰婆一起番工既星期一..就是不一樣的星期一!



2017/12/09
Day 2---Part 2(日本,大阪 Japan,Osaka)
係酒店放低d野再出發~~好喇~係東梅田駅搭四つ橋線去到四ツ橋駅落車4號出口就會黎到堀江喇~~~又係行左New Balance先~但今次終於大個喇~無野買喇~~咁咪行去南堀江囉~




又行過BIOTOP~




通常鐘意行過右邊條街先既~又開始日落喇~




呢頭都幾多野岩我地行既~有d係山系野啦~




仲有毛寶好鐘意行既Paul Smith啦~同埋隔離好大間既North Face~~(有紫色哥隻Label賣架~)




我覺得最靚係佢呢頭有好幾間好靚好靚既傢品店!!d野好靚...可惜我買唔走.....嗚嗚.....




無啦啦呀毛寶今次話想行下堀江行過少少既美國村喎.....咁就行過去行下囉~




然後係呢區行唔夠5分鐘望下d鋪佢就知唔係好岩自己行~急急腳兩個人又走了~~




番到梅田......本身諗住行去食飯~有人好掛住噚日Hep Five度哥間Beams哥條褲...可憐兮兮問我係咪無機會再經過....我唔想佢往後再講自己有幾後悔無買哥條褲....所以又陪佢行番過去買~我人真好~



有人開開心心買完褲就陪我去食蟹道樂(かに道楽)啦~~我地揀左梅田店去呀~因為同我地酒店好近~地址：大阪府大阪市北區曾根崎2-15-20 SWING梅田大樓8樓....可以上網預約既!但我見要預約時點埋餐...咁我又無預約啦~又唔知自己幾點行完街~就咁衝上去~好彩都有位~




勁耐無食~有少少掛住~




梅酒...570円(稅込)=39.6hkd....好味~




我地叫左兩個唔同既set~揀d內容無咁相同既share黎食~咩都試下嘛~(講到第一次食咁~)....咁揀左個中價既一個貴少少既~貴哥個我地就揀左呢個匠味...11,880円(稅込)=825.7hkd....依家餐牌有哂中文好易理解~




前菜~不錯~




水煮毛蟹配醋~其實我叫個餐係衝著毛蟹而叫的~~毛蟹想當年第一次係日本食時一餐飯被刺傷3次...真係又期待又怕受傷害~~~




蟹蓋得半個~如果多d膏食就好啦~




係好味既~但勁似曱甴腳!




螃蟹華麗刺身~我覺得呢個真係幾勁!!好靚呀好靚呀!!好似我咁靚呀~~(比喻自己為螃蟹華麗刺身的少女)




佢有幾隻唔同種類既蟹刺身係度既~~~勁鮮甜~~我真係好鐘意食蟹刺!!!




最鐘意梗係佢啦~唔知係咪松葉蟹腳呢~睇下呢條腿勁性感咁攤係我面前誘惑我!!衰女人!(也不排除可能是個男的)




我份人係最受唔到誘惑既!!黎啦!!禮貌地...誘惑我~





蟹肉茶碗蒸~正常野~




烤帝王蟹~烤既我不嬲都覺得好香好好食~




天婦羅有長腳蟹同帝王蟹係度~

灸燒蟹壽司....好味!




最後有清湯同茶奉上~




甜品係水果~蜜瓜好好吃~




到講另一個餐喇~就係彩喜...7,128円(稅込)=495.4hkd




有頭先個餐其中兩樣~




水煮螃蟹配醋....(頭先哥個係毛蟹~)....不過呢個都好味~




螃蟹華麗刺身就同頭先哥個一樣既~~(即係我同毛寶一人一個刺身盤~~好正~~~)




碗物.....勁難食....粒肉丸狀既物體應該有蟹肉係入面但個質感好phere...好散開....好核突!!




螃蟹醬烤蟹肉通心粉....兩人share黎食就覺得唔錯既~如果一人食哂會太漏~




烤螃蟹...呢個就無頭先哥個咁正啦~因為貴哥個餐係烤king crab~~




蟹肉天婦羅~正常野~




呢個平少少既餐我除左期待哥個華麗蟹刺身之外就係最想食呢個蟹肉釜飯~~~我地食緊前面d野哥時佢已經開始整緊~





我估整左30分鐘度~就有得食喇~~wow~




都幾香既~但我覺得個飯既口感濕左少少~乾番少少會好d~




食完原味之後試二食~我唔記得係加入清湯定係茶...再加埋紫蘇葉...也不錯吃~(紫蘇葉好香~)...不過我唔明如果一個人點食得哂...我記得我同毛寶每人食左兩碗~




湯就兩個餐一樣~




貴d既餐水果就係蜜瓜同橙....平既餐水果就係火龍果同橙~




呢餐食左20,148円=1,400.3hkd....每人700.1hkd~都唔平~




你話蟹道樂好好好食咩?又唔係.....但耐無食個心又覺得有d痕囉~~~痕咪間唔中食一次囉~哈哈~(咩事相入面既女仔咁靚?!)




本身諗住去中之島哥頭睇聖誕燈飾架....不過食飽飽我又覺得晏晏地....同埋去到咁遠轉兩次車我都唔知確位置係邊~作罷~就咁經過噚日見到既阪急地下層睇下都算係睇左燈飾啦~都靚既~都係順便行過je~唔使特登去~




櫥窗d佈置都整得幾靚架~大人細路都睇得開心~







好啦~番酒店~毛寶去洗白白~我又玩下今日既戰利品~華~收獲性甚豐喎~




藥品類~




呀哈哈哈哈哈(尷尬笑).....左邊哥個就係我買俾sunny bb個保暖杯喇....你話喇....啞黑色係咪好型仔先?咁買左個大既俾佢...我自己又買個細既~當時買既時候毛寶問我：做咩買兩個一模一樣既?我答：er~~靚丫嘛~~咪買多個囉~~(個藉口都唔合理既).....至於最後sunny bb有無用或者會唔會俾女朋友用都無咩所謂~最緊要已親手送上及收下~(花痴到我).........右邊哥個我買俾我姑媽~




呢個當時買覺得自己好醒...諗住買黎做下手部運動...but you know...後生仔...做左一次之後......依家成條野攤左係房無出過廳~




當時仲未買電話但已經覺得自己一定買iPhoneX之我一定要買定mon貼同埋殼.......個殼開頭覺得唔錯...但係佢竟然係我無跌過個電話之下...用左唔夠兩個月已經有d裂裂地!(個角位)...嬲你呀!




粉紅色的夢~粉紅色的氣味~粉紅色的人生~貞成日都話我好香噴噴架~~




呢個set真係勁抵買!送埋hand cream同埋一支個價係一樣~可惜得5盒~~~(其實我同人地黎澳門掃哂藥房d沖涼液係一樣既行為)




我好鐘意食無印呢隻魷魚....唔知香港有無得賣同埋賣幾錢呢??(因為我之前去台灣時見到賣貴過日本一倍)...個口依家睇見就痕~日本賣108円(稅込)=7.5hkd




唉呀!我竟然影漏左兩樣今日買既野呀!!Porter仲要係老闆送我的~多謝毛寶~




條褲就我自己買既~~哈哈~




多謝老闆多謝老闆~~兩樣我都好鐘意~鎖匙包4,700円(稅拔)=326.7hkd




散銀包我鐘意到攞哂命~~5,400円(稅拔)=375.3hkd....多謝多謝毛寶~





有稅退...仲要有野送....皮的吊飾..但極度醜...已入舊年哭袋~~~~~~




喂!我有少少驚喎!!!第二日咋喎~本護照合唔埋喇!










2018/04/23的開心事：
同衰婆番同一更~



報時：距離和歌山嘆溫泉自駕遊之旅2018仲有---55日~
報時：距離與毛寶慶生泰國食揼嘆之旅2018仲有---158日~
報時：距離天團蘇格蘭高地之旅2018仲有---173日~