全新飛行體驗法國布列塔尼自駕遊之旅2019-11-30第七天(陰天極凍毛毛雨)

5月20日-6月2日….法羅同哥本哈根疏乎中~~好耐無試過呢種感覺...好感動呀!!!….6月3日…番黎第一餐食左文哥~感覺正氣XXD….食完第一個要探臭蜆!!!…..夜晚回家陪老夫人吃~….6月4日…中午食左沙北..毛寶一洗完車就落雨XXD…夜晚叫外賣~聽日就放完開心旅行假要番工喇~(強調不是大假XXD)….6月5日..好開心番工賺賺旅費~….唔番工邊有錢千去下一轉~雖然放工食完飯拖埋地..9點幾坐係度睇電視就中眼瞓…緊急訓左一小時XXXD…俾毛寶笑我似阿叔~…..6月6日…訓到凌晨4點頭痛醒左~食左止痛藥坐左一個鐘5點訓番...點知訓到6點先訓得番...成日番工都呆呆下....6月7日...訓到凌晨4點又醒左...然後5點再翻訓...訓到6點先訓得番....不過今日精神過噚日少少既~起碼頭無咁痛~然後夜晚我好醒咁捕到12月其中一間溫泉旅館放房!訂左~...11點幾...無啦啦我個電子鎖猛響!嚇到我賴屎(唔係形容詞...我真係衝去痾左篤屎).....6月8日...好鬼多野做呀~仲要今日個個都騎騎呢呢XXXD.....6月9日...今日星期五又反高潮咁唔算多野做~幾好~放工去左食南湖明月同人慶生~.....6月10日....中午同左七公子去食自助餐~~笑到我標淚水~~~然後去探臭蜆~夜晚痴痴貢~



2019/11/30
Day 7(法國,布列塔尼,瓦納 France,Bretagne,Vannes->Saint Just->雷恩 Rennes)
早晨~出發喇~呢日我地會出發番首府雷恩~會去多一個景點先番去~睇番相先知....呢日好淒涼無早餐食就出發XXXXD

陰陰天~有啲凍~






大約1小時4分鐘我地就由酒店黎到我地既景點~








喂!凍凍地喎!XXXXD...黎到Espace Naturel Sensible- Mégalithes et landes de Saint-Just...法國巨石陣代表(個名我自己吹XXXXD)




我依家上網睇番D網站影既相其實用航拍機影好靚架XXXXD我地平面影就感覺不大XXXXD








但企企下...又未食早餐...好Q凍呀XXXXXD走喇!合照都無影XXXXD




走時行去攞車哥段路...凍到包到自己淨係露眼球出黎XXXXD然後我：點解你包到成粒橄欖咁?XXXXXD.......所以我地叫呢個造型做橄欖人XXXD(好似Marvel既英雄人物咁XXXXXD)




咦..原來橄欖人有求其同幾粒石合照XXXXD




走喇走喇~好鬼凍呀喂~




参觀完畢我地就番雷恩啦~入到市區還車前我地就去左入番滿油先~玩左咁多日淨係入過呢次油~入左€49.44＝435.1hkd~但我地竟然我地無影行左幾多公里!失敗~




番到黎市區就去邊都要入咪錶~(但冰島好似依家去邊都要俾停車場錢...仲要有人話明明俾左但還車又話佢無俾而要俾罰款...)




咁我地番到雷恩市區毛寶搵左呢間餐廳~食下海鮮~同埋想試下布列塔尼既一種傳統甜品~間餐廳叫La Taverne de la Marine.....地址： 2, Place de Bretagne, 35000 RENNES







我地係佢一開門就衝入去XXXXD侍應可能好驚XXXD






侍應安排我地個位幾好~自成一角~咦~仲有龍蝦食~有海鮮盤叫~但前幾日食完~決定單點~同埋依家寫blog望番...個餐牌全法文喎XXXD點解我地會識睇XXXXXD








完成左布列塔尼行程咁開心!梗係飲下酒慶祝下啦~(好像沒關係)...我叫左Rose毛寶叫左紅酒~...我既Rose係25cl...8.1€=71.3hkd~






餐前麵包~法國麵包唔會唔好食啦~




叫左成3個頭盤XXXXD其實我同毛寶都好鐘意食頭盤XXXXD成日覺得D頭盤好食過main~(可能頭盤開胃XXXD)




Soupe de poissons de la Marine...€9.5＝83.6hkd...湯...到底係乜湯...我真係忘了XXXXXD




L'ormeau en persillade...€19.5＝171.6hkd...你話...我點有可能有能力識睇呢個餸名去叫?我懷疑係有Wi-Fi上網查XXXXXD...鮑魚呀喂~我記得好食呢個~




Les Noix de St-Jacques aux 4 saveurs...€16.5＝145.2hkd....4色燒扇貝~個名我作既XXXXD....4款唔同口味燒扇貝~兩款好食兩款麻麻....但唔好問我邊兩款好食XXXXD....我淨係記得4個入面其中一個口味係黑松露~




喂!!!!原來頭盤仲未完XXXXX各位觀眾!仲有生蠔呀!!!XXXXD....叫左兩款...每款要左半打...Cancalaise No.1同款De l'ile de Brehat No.2....呢兩款半打各€12.5＝110hkd...即係每隻18.3hkd







你話好好食又無哥日蠔檔咁正~但以餐廳食黎講...18個幾一隻...又算平XXXXD都食得話既~








然後通常主菜我同毛寶就鐘意叫一個Share~叫左牛扒啦~呢個Main我地仲加左鵝肝~€34.5=303.6hkd....牛扒就一般啦~....係第一次見鮮黃色同鮮紫色既椰菜花~雖然食落一樣味~






最後重點要來試係傳統布列塔尼甜品!!!!叫Kouign Amann.....€7.8=68.6hkd




老實講...我覺得...........幾好味XXXXD....好似層層酥皮咁既質感...又唔算甜~讚一個~






食甜品梗係要叫杯咖啡襯下啦~叫左大咖啡~€2=17.6hkd...好搞笑出到黎先自己倒水~




呢餐計埋貼士食左€140=1,232hkd~都幾好~




食完野就去還埋車~拜拜~多謝你陪左我地咁多日呀~~~




原來都幾污糟XXXXXD辛苦哂~






呢晚又住番第一晚既同一間酒店~因為聽日我地就會搭TGV番巴黎~所以都係揀番近車站住~每晚534hkd...每人267hkd...以近車站黎講~幾抵住~而且又唔算細~都乾淨~








今晚決定留係酒店抖下~嘆下~所以食杯麵算喇~




然後下午沖左涼就攤係度上網~呢個旅程毛寶成日都聽Camila Cabello既Senorita.....點知佢想係JOOX開音樂聽時發現有素人翻唱呢首又係翻唱榜排第一諗住聽下.....點知XXXXXXXXXD.....我好耐無試過笑到標哂眼水XXXXD









2023/06/10的開心事:
好耐七公無食飯啦~~~~
傾得好開心~~~~~~笑到肚攣~~~~~~



報時：距離毛寶生日大阪之旅仲有---111日~
報時：距離小t生日泰仔仔之旅仲有---130日~
報時：距離東京富士山之旅仲有---182日~
報時:距離與3小妖台北聖誕美食之旅仲有---197日~