2020年生日澳門一日遊

上星期四....好喇好喇~終於feel到D涼風喇真係凍左好多~(氣溫係凍左...同埋今日有黑球)....凍左公司又少左人黎喎...咁就驚左喇?XXXXD...好緊張呀!聽日係七公子第九屆哭福宴呀!!.....上星期五...番埋今日放一星期呀~~~~~放工後哭福宴呀XXXD笑到我氣咳...遲下講~~~......星期六...朝早搞完啲野係fika食左個唔好食既早餐...跟住去左同臭蜆玩左成個下午...佢真係好得意!...好似大隻左又肥妹左!!!...夜晚同左屋企人食造節飯....有好多海鮮食~~~......星期日...中午食飽飽...做家務~夜晚在家吃~~.....星期一....放假嘛~中午帶左3隻小妖去葡京個葡餐...之後去左搞一堆銀行野....夜晚痴痴貢~~.....星期二...朝早約左神秘團友去terra食all day breakfast~~之後同臭蜆玩左成個下午...痴到我周身貓毛但我好開心...成個bb咁抱住佢訓左....心都融哂想咩都俾哂佢XXXD.....夜晚同媽媽食左鮨玥提早造冬~~.....星期三...朝早去左檢查...之後食摩珀斯lounge...再去威尼斯人買野~揾臭蜆玩...痴痴貢...又一日~~.....星期四....打算全日宅在家~~中午媽咪買左好味烏冬...下午在家為濕爬mv衝銷量(呢個都算係節目？XXXD)...洗下咖啡機....做運動...又一日~~~星期五...同左小妖們去丹桂軒飲茶~之後去D日本代購乜都買D~~之後去左臭蜆屋企打邊爐~~~~粒衰豬真係好得意<3~~~~~~........星期六....中午煮左肉醬天使麵(個醬梗係現成架啦~)....又做左成個下午家務~夜晚痴痴貢~~~~~~~



(先旨聲明此blog並非專業食評blog~只係一篇食記~我係真金白銀俾錢去試~好食唔好食只會直講~同埋係我個人口味意見~口味既野人人不同~我覺得好食又唔代表你覺得好食~我去哥次好食又唔代表你去哥次好食~佢保持唔到水準係絕對關我屁事架~要睇咩整法咩食材呢d專業意見呢度絕對絕對唔岩你~拜拜~接受到先再睇落去啦~)



係喇係喇~講到正日生日喇終於XXXXD....講極都係我同毛寶既生日既野XXXXXD....有人悄悄地問：係呢~幾時先出旅遊blog呀?.....我：無計啦~越寫越少旅行喇~要慢慢出先得架~下篇出喇~....好喇~今年我生日時係我同毛寶第2次放假~....本身都無諗住去旅行既...純放一日假開心下~哥日放假又去行行走走食食~首先中午去左食好耐無食既興記XXXD牛尾湯米~(其實係罐頭牛尾湯XXXD)....雖然自己都整到~但我都係食得好開心~

食飽飽就去搵附近一間靚景既啡嘆嘆~揀左誠品咖啡~好似去左智利valparaiso!又或者似釜山甘川洞文化村小王子哥度~最搞笑係佢附近幾間野都一齊外牆油上超鮮艷顏色~所以先似~




佢環境都ok既~




但重點係上佢頂層有個小小半戶外位(真係好細架XXXD...就係得一排4個位).....打開哂排窗咁樣望出去飲啡係幾靚既~但前提下係要非常秋涼先得~但哥日都幾熱幾曬~





我地叫左兩款手沖仔試試~啡不錯~蛋糕就.....唔係幾岩我地口味~





多謝~今年又有生日卡收~(舊年生日係去迪迪尼架...嗚嗚~)





靜靜的飲完咖啡....我地就去左當時得令又大熱同埋俾成個fb洗版既景點~就係黑沙水庫既粉紅芒草~哥日閒日唔算多人...但以閒日黎講都唔算少人~(毛寶又話：全世界得你一個人放假咩!)...唔好以為呢個係我喎~呢個毛寶黎架喎XXXD...同埋其實D芒草唔係太密太粉紅~都幾難影得靚~(好喇~係我影得唔好~)








呢個先係我XXXXXD....確係幾有旅行感覺既~





行左一小段行山徑XXXXD我幻想去左日本D吊橋~




夜晚毛寶就請左我去譽瓏軒食中式omakase....平時去開飲茶同單點.....睇某D FB group話原來有omakase既....咁所以就去試下....兩位起....每位最低消費$1,500起...毛寶問我想食幾錢既...我：1,800丫~......毛寶：y呀?我可以出多小小錢食好D架喎~....我：因為我想用同天頤差唔多既價錢($1,888/位)去比較下...邊間好食D~.......毛寶：真係唔使添少少?....我：唔使呀~...........然後佢有D失望XXXXXD痴線架生日哥個係我喎XXXXD......原來係佢自己想食好少少XXXXD....




咁食之前佢寫好個餐牌會send個餐牌黎既睇下你岩唔岩食.....其實成個餐牌我都覺得無咩特別XXXXD....我地唯一改左係湯哥部份...因為本身係翅....我地唔想食翅就改左.........其實望落個餐牌以omakase黎講都幾唔吸引....毛寶話咁唔吸引不如添D錢改下餐牌....我話唔使....既然佢寫得出黎...即係有信心整得好食啦....我就試下佢$1,800d野係點XXXXD.....呢個餐牌唯一有興趣係個妙齡鴿....因為係桂花南乳去炸...可以同天頤battle下~




有迎賓茶...好似叫國色天香XXXXD忘了




譽瓏軒同玥龍軒D醬料一向都ok~最靚係湯匙D花~




好啦~先上小前菜1.蝦棗 青瓜柚子沙律....唔....還好啦~我覺得佢蝦棗整得麻麻地~





我前菜部份就叫左白酒既~Grüner Veltliner, Schloss Gobelsburg, Kamptal, Austria, 2017.......$116/杯...ok~岩口味~




毛寶就叫左杯叫"翡翠 Jade"既cocktail...$80.....叫既時候佢話：呢個幾重薄荷味架喎...你ok嘛?.....咁我地都答ok既...因為細個都飲薄荷酒~同埋見佢內容物係rum,peppermint,lychee liqueur....會難飲得去邊?.......一黎到....er......杯野勁醜XXXXXD......你用肉眼睇已經覺得杯野係極難飲.....但你心諗：唔會既~話哂呢度係酒店~佢又寫住signature cocktail~試下先下定論啦~.............一試之下....唔係喎真係好難飲喎XXXXXXD....勁似只係用梳打水溝稀薄荷酒咁XXXXXD.......雖然細個我係屋企都係咁樣溝黎飲.....但佢隻味係溝到勁稀既味XXXXXD好難頂~




然後毛寶頂唔順到叫左個茶飲算XXXXXD....但佢又好神化喎....D茶應該會添得密又要keep得熱又要留意個客飲完未架嘛....毛寶有好幾次飲到見哂底都無人幫佢加之餘...有次個侍應打開個蓋睇到全清無哂茶望完行走左無番過黎XXXXXD....哥晚有客但唔算多枱...點多都唔會夠中午飲茶多啦~大佬...茶位逐個計架XXXXD




2.炸法國吉拉朶生蠔,冰梅溫室小蕃茄,黑魚籽脆皮乳豬件




先來炸蠔~隻蠔係炸得唔錯既~岩岩好~




冰梅溫室小蕃茄.....呢個唔會唔好食~因為我平時單點都會叫~下面哥D係日本梅酒啫喱~




黑魚籽脆皮乳豬件....呢個幾好食~但同之前係巴黎軒食過既差唔多~





3.淮杞花膠螺頭湯....個盅攞出黎勁大盅~





塊花膠係幾大幾厚既





螺頭都多到痴線....咁多料啖湯點會唔得~




4.花雕蛋白蒸東星斑球....廿年花雕同上湯蒸蛋白...用美國有機蛋加北海道3.7牛乳蒸.....一黎到既時候花雕味係幾香既....但舊東星斑球我覺得麻麻~...蛋白幾好食~如果差不多既菜式我覺得上次永利宮哥個好食D~佢係連魚皮都好食~(平時我好憎食蒸魚魚皮)





好~換換第支酒飲飲~毛寶幫我揀既~....Gevrey-Chambertin, Domaine Arlaud, Burgundy, France, 2016...$260/杯.....我同毛寶都幾鍾意~但我話：不過太貴~.....毛寶：幾錢?...我：成260一杯!...毛寶：華!乜咁貴架?我唔記得望價錢咋XXXXXD




5.桂花南乳炸妙齡鴿....用兩個禮拜大既乳鴿....攞上枱聞係幾白桂花味~





乳鴿配上既檸汁..鹽之類~




咁....隻鴿係食到目前為止最滿意既一道黎既~咬落去嫩加爆汁......但可惜我地食完天頤哥隻香茅乳鴿先食佢....天頤哥隻係食同聞都極香香茅味~呢度既就桂花味聞既大過食到~硬要比就天頤100分...譽瓏90分~(但我仲未試巴黎軒哥隻~)




6.鮮腐竹火腿浸菠菜苗....用雞湯煨...火腿好味....正常野





7.開揚蔥油黑豚腩拌麵....用蔥油撈上海白麵....麵下面有冬菇肉絲豬油渣蝦干.....濃味野....黑豚鞋~個麵食完覺得好浪胃~





8.瓏皇杏汁燕窩焦糖布甸....個外型...大到嚇親人XXXXD勁大個紫砂茶壺XXXXXD....通常D野好大攞到出黎我就會覺得好雷....但呢個我無咁認為~淨係覺得外型唔ok XXXD




甜品餐具靚




大到XXXD




外型又唔靚又難攞野食~麻鬼煩~XXXXD...其實中西結合甜品唔係唔好....只係兩樣野你還你...我還我咁....何苦放埋一齊?XXXD...加上佢個焦糖布甸又唔係整得好食過人XXXD





9.譽瓏美點+單點壽包....小茶壺插住士多啤梨味同奶茶味雪糕...小點有柑桔軟糖之類~(er....一般般啦)




毛寶事先打去寫生日牌：XX happy birthday...(唔話你知XX係咩~因為又係笑我既名XXXXD)....當日坐低都confirm左一次...仲要尷尷尬尬咁confirm~點知出到黎毛寶見我無咩反應...望下個生日牌：車!乜都無寫!唔怪得你無反應!咁為咩要同多confirm多次?....點都好~多謝你~




咸蛋黃壽桃包...ok~




呢間餐廳到式有幾鍾意用茶壺?XXXD又大又細~




送左支筆...又想再送上次本米芝蓮書(唔使喇XXXD)...呢餐飯...連埋酒...共$4,042....有新濠卡有9折....食左每位$1,800既omakase....感到錢係去左3粒星度(今次服務又一般...可以講唔夠上心)....塊花膠係幾大幾厚....仲以為佢會寫個不時不吃既餐牌....但其實我覺得成個set得個穩陣兩個字~味味都會係出面食過....無一樣係一出黎然後會：華~~~.....食完又唔會難忘....擺盤同碟又唔算特別~我見其他人係有D新穎D既菜單又同我差唔多價錢....可能我唔識同呢個師傅玩卦~....(同埋可能我地人數唔夠多)










我每日得閒都會開濕爬個online concert...
諗住幫偶像衝銷量之餘....
順便聽熟佢地新碟d歌~(基本上已熟)
我放假時大慨每日播3次XXXXD
我依家播到連毛寶得閒都會哼一兩句~
同埋佢都話聽多左幾次都覺得幾好聽~
依家順便毒下你地~

2020/12/12的開心事:
做完家務~聽日可以全心休息~
又放完一個禮拜假~
不過番一個禮拜工~
又開始放回歸聖誕假~
又有一堆野食~開心~