和歌山嘆溫泉自駕遊之旅2018-06-20第三天Part 2(大雨)

星期二.....起身見到難得一見既晴天!仲要係藍天白雲~呢日勁多野做!...隻手痕呀…但我止左痕喇~~~~請留意因間報時~~~~星期三......又係多野做~但今日又係見到藍天~阿媽去左旅行~夜晚自己搞掂~好開心我今日叫哥間外賣個例湯係蕃茄薯仔湯~~星期四......又係天氣晴朗~但個人硬係覺得好攰...係因為無跑步的緣故嗎?...下個星期跑番囉~(查實不跑步的原因係因為驚7月節.............................................唔想夜媽媽跑完黑媽媽回家)



2018/06/20
Day 3---Part 2(日本,和歌山縣,白濱町 Japan,Wakayama Ken,Shirahama chō->串本 Kushimoto)
嘆完啡又再出發啦~好似無頭先咁大雨~由於大家都話食左個勁勁早餐唔餓~所以呢日係無中午飯環節~




樹隧道!.....我好鐘意樹隧道~令我諗起塔斯曼尼亞呀~望到樹隧道覺得好舒服~




好喇~話咁快又黎到我地下一站~潮岬燈台(しおのみさきとうだい).....地址：和歌山縣串本町潮岬.....Mapcode：324 060 115*61......由三段壁黎到呢度要1小時7分鐘.....算長啦可~呢度個停車場都係要收費的~300円=18.5hkd....




泊好車仲要行一小段路入去~





如果想上燈台就要先購票啦~如果不上塔是不用買的~成人200円=12.3hkd.....記得留意參觀時間~






入場劵後面印有潮岬燈台既資料~





燈台外有幅壁畫我覺得好可愛~





hi~~~潮岬燈台~~~~~






燈塔外有個壁布版貼左d小朋友畫既潮岬燈台~~好可愛~我最鐘意第三幅~






好啦~挑戰上塔~




不過如果有老人家同行就留意下睇下佢地怕唔怕太攰啦~有68級架~





同埋上完石樓級之後仲有呢條咁樣既木樓梯要上....毛寶爹娘都幾堅挺~




行到我扯哂蝦終於到喇~~~(其實還好~無其他地方令我咁扯蝦的放心)




只開放左其中一邊~勁爆大風~~~~~~~~~








行番落黎~上塔入口既旁邊就係燈台既資料館~有時間就不妨睇埋囉~







呢個位於本州最南端既潮岬燈台值唔值得一黎~好見人見智~不過順路咪黎睇埋囉~~我對燈塔無咩特別既感覺~對燈塔最深刻既印象應該係阿根廷烏斯懷亞號稱世界最盡頭既燈塔~因為要特登坐船出海睇~



回程路見原來有間神社...諗住入去望下...入到去個感覺有少少荒涼.....er....不如走咯......





本身呢日既行程已經完結~但本團為左豐富團友見聞...於是增遊一個行程紙上無既景點~(講咁多屁話其實係仲未到check in時間攞房~搵個景點攝攝時間~).....係潮岬經過くしもと大橋....就可以去到另一個分開左既島叫大島~唔知點解我覺得呢個位有少少似釜山哥時經過某條橋而去既海雲台哥邊~






因為呢個景出發前一路無諗住黎...所以亦無搵mapcode....過左くしもと大橋之後....就跟住d路牌行.....由於大島唔算太大~指示都好清晰~




好喇~順行到左~我諗由頭先潮岬哥度黎呢度大慨10分鐘鬆少少...唔算太遠~我地呢個景既名好有氣勢架!叫海金剛(うみこんごう)....地址：和歌山県東牟婁郡串本町樫野....終於有得免費泊車~行一小段路~係靚路~行得唔辛苦~






到達海金剛!!!!挺有氣勢的說!!!!






企高影更有氣勢~~(但又驚個電話跌出公海)...我個人黎講幾滿意呢個增遊既景點~因為我係導遊~






好啦~參觀完就去酒店喇~入番串本既市區~





呢頭係無咩酒店可以揀到.....揀無可揀之下揀左一致好評既串本皇家大酒店....地址：東牟婁郡串本町サンゴ台1184-10.....有d評論話有點難找....因為在山上~...但我有搵Mapcode~所以無~難~度~(看得出我在認屎認屁嗎?快d鼓掌啦~)....Mapcode：324 214 288*40....有免費泊車!!....最驚喜係reception check in時有識廣東話既工作人員!!!!!!由頭先個景點黎到呢度大約10多分鐘~




之前諗住呢晚係便利店買d野食係酒店食當晚餐...因為當時上網睇附近好似無咩商場呀餐廳呀....同埋好驚佢地食得太多溫泉旅館既餐會怕....點知係便利店又無咩心頭好想食.....咁係check in時我地問下附近有咩食時佢話附近其實有好多餐廳~但由於係閒日有可能會唔開~既情況下.......我地就決定左留係酒店餐廳食....睇完餐牌法國餐哥邊麻麻吸引~都係揀番日式套餐啦~咁預約埋今晚食飯時間就入房喇~



一入房.....er.....其實上網睇我早就知間房係咁....係幾大既...但可能已經開左成廿年又無翻新.........好舊~望下張被d花都唔開胃~~~~~一晚1095.4hkd...每人547.7hkd(包早餐)......但入去時係覺得有陣怪味的....




但呢度個賣點係望出去個海景~哈哈~




向左邊望...就係我地聽日既唯一景點橋杭岩~夠哂近~(一排石哥度~如果好天可以衝落去影日落景...好靚的...但依家.....




廁所係舊舊的日本酒店那種...呢張又可以睇到我係塊鏡鬼鬼祟祟個樣~~哈哈~~遮都遮唔住~




唔記得提~呢間酒店有溫泉架!!仲有提供浴衣呀毛巾呀沖涼浴球~不過呢日我無著浴衣落去浸~因為係酒店著自己覺得有d怪~~~




睇下頭先我係紀念品店買左d咩先~對比其他團友我哥d簡直小眉小眼~




頭先仲要買滿唔知幾錢送左支溫泉水噴霧~離譜~




好喇~約左佢地浸溫泉~(其實想順便沖埋涼~).....係lip口見到呢幅地圖....清楚d俾大家睇到我地頭先哥d景點....最左下角就係我地頭先去既潮岬燈台.....右邊哥個大島就係睇海金剛哥度~




住客可免費享用溫泉~男女湯分開




由於入面好多人唔影得相啦~咁圖片取自官網俾大家看看~呢個係室內大浴場~





露天風呂堅正!!!因為係對住橋杭岩架!!!超靚!佢個露天風呂既正同佢間房係成反比~~~呢個時候仲係落緊大雨~但無理~照浸~浸完再洗頭就無事~





浸完仲有野玩~~佢有個遊戲區有野玩又有得夾公仔~(當然要自費啦~)....睇下有人幾開心~




我既目標係佢!!!





最後....我用左100円將佢夾出!!!!


我係唔會話俾人知但我之後用左1,000円都夾唔到公仔~輸錢皆因贏錢起~



有人試玩波子機...但完全搞唔懂玩緊咩~哈哈~





有個女仔想夾隻比卡蕉俾自己個孫玩失敗左!好慘!




浸完玩完上房食下生果坐一陣~就食飯喇~我地check in時預約左日式餐廳~





清酒(和歌山)...750円=46.1hkd(一合)....我揀左熱既~幾抵飲同好飲~




今晚既晚餐係日式套餐每人3,700円=227.6hkd.....抵唔抵見人見智啦又係~我就ok~因為唔想再出去酒店食~呢度買個方便~





前菜~3樣都好食~個wasabi魷魚超攻鼻~







刺身都有5種~也算不錯吃~我記得期間毛寶問毛寶爸：好無味??.....毛寶爸：好味!.....毛寶：大!聲!d!(軍官狀)......我此時估唔到毛寶爸會附和毛寶玩大叫：好味!!!!!!!!!!!!!大聲到全間餐廳都聽到~~~~~~......笑到我痴線XXD....好彩當時餐廳哥時得我地一枱~~~~~~




我都唔知呢個係咩?!?!?!!?




仲有飯麵豉湯~天婦羅也不錯吃~




甜品是綠豆蓉和菓子~講真~好味過噚晚個溫泉旅館個甜品好多~





呢晚食左16,300円(稅込)=1,002.5hkd...每人250.6hkd~飽飽~




行下酒店間紀念品店~好多柑汁賣~




最後你係估唔到毛寶既斬獲....係一盒可以將水攞上手既實驗玩具一盒~~~~笑屎人XXXXD








我見到日本咁樣好心up呀...
之前就關西大地震.......
暑假又有咁多個強颱風.......
今日北海道又話有地震....
有個blog友依家仲係北海道....
希望佢平安!
見到自己去過既地方有天災...
倍感心up.....
希望天佑日本!



2018/09/06的開心事：
今!晚!食!韓!式!炸!雞!!!!!
事緣阿媽去完兩日一夜旅行番黎叫我叫外賣..
然後我叫了韓式炸雞開心一下~~~~~~~~~
(我中午飯食左包梳打餅...應該無事既)



報時：距離與毛寶慶生泰國食揼嘆之旅2018仲有---21日~
報時：距離天團蘇格蘭高地之旅2018仲有---37日~
報時：距離鳥取自駕遊之旅2018仲有---85日~
報時：距離與三大長老聖誕台中遊2018仲有---106日~
哈哈~~哈哈~~~
我同毛寶再加三大長老....
應該唔難估係邊個丫可~
個組合又幾新鮮喎~
都應該真係今年最後一次旅行黎架喇~
今年好似真係有少少誇....
飛7次.........
因為.....我係7公子既一份子!!
所以我要去7次~~~~~~~~~~~~~~~~~~~~~(爛)
仕燊哥次台北遊係夾硬bit出黎既..本身無7次咁多既...
之前手痕痕睇下d聖誕機票....
因為今年聖誕有5日連假丫嘛!
我力勸毛寶聖誕去行下....
我：出年無5日架喇.....要好好把握唔使請假出遊!!!
見去台中唔算貴得誇張.....
任性埋今年啦!
(唔好意思....最後我望下出年月曆.....
冬至原來係星期日黎既.....
如果冬至補假落23號.....
即係由回歸開始.........
原來係會連放6日...................................................
我都唔算講大話丫可...無連放5日呀..係連放6日之嘛)
(原來我今年去左3次台灣....
本來可以申請快速過關...
但想起....我的護照下年要過期了...
搞黎都浪費時間~)