日本四國自駕遊之旅2017-10-16第三天Part 1(雨天)

hi~狗年第一blog~上星期二..身為綠星會員既我..梗係又要飲筋勞啦...我醒呀~熱筋勞加多個shot...飲哂成杯會好勁..所以我飲左3份1...再加入熱水~咦~又變番平時隻味~延長快樂~(蠱惑的綠星會員)....呢日番工劇多野做...我好耐未試過開113張單...(講到我好似做保險咁)...放左工我真係散哂...但係...我呢日勁想跑步..好想!!慢跑左5.49km!!一路跑一路有sunny bb在我耳中輕輕唱：唱著~幸福~之歌痾~~~~~~上星期三...飲左筋勞一大杯..但中午都係攰到訓著左...好攰....情人節丫嘛..我個情人節大餐..係同屋企人團年~食盡珍饈百味~~飯後與親愛的吃甜甜~上星期四..即係年三十晚~番半日~但都唔少野做~所以都係要飲筋勞~中午放左工同公子去日麗飲收爐茶~好開心~之後貞公子仲請我地去Blooom飲咖啡~華...又飲....仲去左朗公子屋企探孖八~好耐無見~~~~再去八分目同阿媽食二人團年飯~~食飽飯既最佳節目係：係屋企上JOOX睇supper既溫柔革命演唱會~~~~~年初一~祝大家狗年行大運~~~一早去拜老豆..再去同姑媽去日麗飲茶~(係~又係日麗~)...之後同表妹們去觀光塔飲下午茶~夜晚去左姑媽屋企食齋~之後去行下新場MGM...華!!我地去開賭場卡諗住食野有折呀~~點知入賭場俾人查證喎~野~~做咩懷疑人地唔夠廿一歲喎~~(明明暗爽)....哥度有間starbucks reserve好大好靚!!仲有affogato食!!!年初二...中午去左毛寶家拜年同埋食開年飯~下午...我記得上年既年初二我睇左套好悶既歌舞片搞到我差d訓著...所以今年決定索性真係訓下午覺算喇~夜晚同屋企人食去左食海灣~再去埋neway~~唱左好多supper既歌~~更佩服sunny bb~~因佢地d歌真係好難唱~~隔住唱都唱到氣喘~~年初三....一早起身勁頭痛...超頭暈...我以為我呢日玩完.....點知嘔左兩次後又無咩....中午去左濠璟飲茶...跟住就到一年一度既賭城群英會!!!今年有魚蝦蟹..大小..廿一點...仲有麻雀~~好忙好忙~~頂~~我地最鐘意我媽做大小莊買佢圍骰架嘛..今年開左幾廿鋪得哥一鋪圍六.....玩左成日輸左我$250!!!!不過又幾抵玩~年初四....訓到自然醒...中午去左羅浮食個中午飯~下午又番去同表妹打麻雀~大拿拿打左8圈羸左$6呀大佬~~夜晚食pizza~年初五....中午去左食MO Express..毛寶請我阿娘當拜年~多謝~食飽遊個大車河當行大運~第一次遊去澳大~遊完又係屋企耍廢~由於中午食太飽....夜晚求其食左passion就算~5日半既新年假咁就完左....點解會過得咁快?!?!?!?!星期三....番工啦...訓得哥5個幾鐘...安慰自己可以逗利是啦.....朝早買杯筋勞安慰下自己~放左工諗住自己一個去跑跑~你又點知收工下著微微細雨那種掃興?....星期四...法定筋勞日~番工順暢~最開心係唔使開ot~~周末有公子生日飯局呀~開心心~~



2017-10-16
Day 3---Part 1(香川縣,高松 Kagawa-Ken,Takamatsu->德島縣,祖谷 Tokushima-Ken,Iya)
唉唷!!!點解一早起身又係落雨架~~~~~~~呢日我地一早就check out啦~去我地第一個景點~(我記得好似係8點出門口~)




好喇~我地第一個景點就係栗林公園喇~地址：香川縣高松市栗林町1-20-16.....Mapcode：60 575 204*75...個公園勁大!呢個公園都幾早開喎~07:00就開~有露天停車場..泊車費500円=34.8hkd




係自助機買飛先~成人410円=28.5hkd





其實我地咁早黎既目的....係要先食早粥呢!!!!我地要試既就係栗林公園入面既花園亭!!而且提提你!!!!係一定要電話預約先有得食!!!係一定要電話預約先有得食!!!係一定要電話預約先有得食!!!好重要所以提你3次!!無walk in的!!!電話：087-831-5255.....而且只可預約到後天的...我地係黎到既第二日朝早(即食既前一日)請酒店幫我地打電話預約.....我地本身想約9點...點知無...得9點半或8點半...咁呀~8點半啦~所以我地先咁早出門口!!記得如果同我地一樣去食花園亭早粥既話停車場要泊係"東門"!!早粥時間到10:00....




由於我地搵東門既停車場入口搵左好一陣子點入....(始終市區d交通係難搞d)....所以..我地遲左10分鐘左右...sorly~我地遲到左同婆婆報左到先~佢就帶我地黎呢個包廂度喇~華~好靚呀~





好!靚!呀!!!!!!!!!呢個個室超細咋..得兩枱!!唔怪得要預約啦!




望住呢個景食早粥會唔會太犯規呀!?!?!?!?!?老夫人你好型呀!!!





一入黎哥時基本野食已經準備好啦~




入座後婆婆就攞埋熱辣辣既粥黎啦~~(唔好問我點解落雨天戴黑超..因為我做自拍哥個有話事權~)..睇下老夫人幾開心~





早粥每人1,300円(稅込)=90.4hkd....有d蔬菜~有d漬物~有塊鮭魚~叫得早粥個靈魂係碗粥~都會因應季節既不同會配上唔同既野...我地呢日係有d菇有d薑蓉~~~好秋天呀~~~超好味~~個粥好綿呀~~~食完個有薑既粥成個人暖哂~~~~~~~




極度推薦栗林公園入面既花園亭早粥!!!食完個早餐個人都開心哂~有健康早粥+靚景!...提提你~入黎食早粥係要買栗林公園入場劵先入到去食~






食食下出面仲飛左隻大雀企係對面棵樹~~~勁大隻勁肥肥~





食飽飽就去行下啦~行左去遠少少地方睇番我地食早粥既地方~難怪個景咁優秀~原來個包廂已經係湖上面!!




其實俾左入場費都係值得既~因為栗林公園係有一步一景呢個美譽架~








栗林公園除左花園亭之外仲有d嘆茶既地方~幾正的~睇下落到幾大雨....都無哂心機行!





同埋栗林公園好和式佈置...處處有禪味~






好~又再~出~發~~仍在下雨~我地要離開香川縣喇~




揸車時紅綠燈位經過石鳥居~又幾得意~




呢程車都幾長..成個幾鐘~終於去到第二個縣~經過德島縣既三好市~~期間穿過一個又一個既隧道~




車程長要俾司機鬆下筋骨~求其衝入Lawson搵野咬下先~之前睇fb d唔知咩page話一定要試Lawson d炸雞嘛~就買黎試下~~




點知我好白痴咁買錯原味麥樂雞~~~216円(稅込)=15hkd....好彩都ok~





司機休息完又再出發啦~~~~使唔使咁大雨je~~~~~




途中會經過超多隧道~~同埋我覺得佢地d隧道都好靚好多樹圍住~




車程唔算好長~~不過有出錯出口又兜下咁~~大約1小時50分黎到呢日第二站景點~~~





到左呢日既第二個景點....一落車就係一埋買野既鋪.....呢兩日都狂落雨未停過.......哥兩個人出賣我呀!!原來兩個都有帶功能性外套!!!擋風擋雨!!只有我一個傻瓜蛋成身濕哂...即刻衝入Montbell睇睇先~~日本登山用品牌子~~要買買啦~~即刻睇中呢件!!靚!!有功能性!!19,500円(稅拔)=1,355.3hkd~~好野~~即刻唔使擔遮~~~




其實我地黎既景點係大步危(Ōboke)同埋小步危(Koboke)....Mapcode：357 151 826*18....佢有個觀景台可以俾錢入去睇既....但係...麻麻地~~~又有d工程機械係度(定還是有咩笨豬跳哥d吊臂黎架?).....個景一般~~可能未有紅葉又落大雨~仲埋可能係坐船欣賞呢個峽灣會好d卦~






係觀景台出番黎又逛下便利店~發現杯麵3號~唔知咩味~入左手先~




同埋都中午時間...附近無咩岩心水餐廳~便利店關東煮解決~好味丫~我鐘意食架~於是3個成年人既午餐就係車上面解決喇~




再到另一個可停車既點到望下唔知大步危定小步危...0我~咁咋~好啦~拜拜~落雨都無理由坐船仔啦~




又再出發~唔知點解覺得呢個位有d似千與千尋~




由頭先大步危小步危到下一個景點...其實只要28分鐘車程....但路程係9曲13彎..全山路...超曲折!!!仲要落雨...落雨中又帶點霧.....我知毛寶好想昏昏欲睡...慘慘!




到了!!就係呢個小便小憎~Mapcode：357 308375*47....相傳之前有小孩為挑戰膽量而係岩石上面痾尿...就係為呢件事而整左呢個銅像~...不過呢度應該幾唔方便黎.......自駕黎係無車位泊...唯有停埋一邊...快快手影~~~有點雲霧做陪襯~又幾靚既~~






衰仔表演痾尿都有人俾錢既?!?!




我覺得小便小僧靚過頭先大步危小步危~~~加上呢度d樹有少少變色~如果變左紅葉相信會更靚~~~~喂~下面條祖谷溪係咪你痾出黎既jack~~~




俾埋周邊景點地圖你參考下喇~其實呢頭應該幾多野睇~








今日陰陰天...下著微微細雨
今天天氣..濕濕的
而姐我的右腿...感到冤冤的
(唔好周圍話俾人知呀)



2018/02/22的開心事：
放完新年假番3日又再放小周末..
算係咁啦~
周末又有公子聚會~
算係咁啦~



報時：距離與媽媽慶生台北吃喝之旅2018仲有---35日~
報時：距離和歌山嘆溫泉自駕遊之旅2018仲有---115日~
報時：距離與毛寶慶生泰國食揼嘆之旅2018仲有---218日~
報時：距離天團蘇格蘭高地之旅2018仲有---233日~
咦!!得番一個月咋!!
我仲未訂枱呀d餐廳!!!
唔得~~今個星期要搞搞佢~~~